Tuesday, November 27, 2012

လက်ပန်းတောင်းအရေး ဆန္ဒပြသူ ၆ ဦးကို ဖမ်းဆီးတရားစွဲ


2012-11-27
နိုဝင်ဘာ ၂၆ ရက်နေ့က ရန်ကုန်မြို့လယ်မှာ လက်ပန်းတောင်းတောင် ကြေးနီစီမံကိန်း ရပ်ဆိုင်းပစ်ရေးအတွက် တောင်းဆို ဆန္ဒပြသူတွေထဲက ဦးဆောင်သူ ၆ ဦးကို ဒီကနေ့ နိုဝင်ဘာလ ၂၇ ရက်နေ့မှာ တရားရုံးတင် စစ်ဆေးပြီး အင်းစိန်အကျဉ်းထောင်ကို ဒီကနေ့ ပို့လိုက်ပါတယ်။


Photo:RFA/Thiha Htun
နိုဝင်ဘာ ၂၆ ရက်နေ့က လက်ပန်းတောင်းတောင် ကြေးနီစီမံကိန်း ရပ်တန့်ရေးအတွက် ရန်ကုန်မြို့၊ ဆူးလေဘုရားအနီးတွင် ဆန္ဒပြနေသူတစ်ဦးကို တွေ့ရစဉ်။
ဆန္ဒပြသူတွေထဲက ကိုရဲလင်း ၊ ကိုဝေဠု၊ ကိုမျိုးချစ် ၊ ကိုညီညီ၊ ဒေါ်နော်အုံးလှ နဲ့ ဒေါ်ရှမ်းမတို့ကို  ပုဒ်မ ၁၈၊ ပုဒ်မ ၅ဝ၅(ခ)နှစ်ခုနဲ့ တရားစွဲဆိုလိုက်ပြီး အင်းစိန်အကျဉ်းထောင်ကို ခေါ်သွားတာဖြစ်ကြောင်း ဆန္ဒဖော်ထုတ်ရာမှာ ပါဝင်ခဲ့သူတစ်ဦးဖြစ်တဲ့ ကိုမိုးသွေးက RFA ကို ပြောပါတယ်။
တစ်ချိန်တည်းမှာလည်း နောက်ထပ် ၄ ဦးဖြစ်တဲ့ ကိုဟန်ဝင်းအောင်၊ ကိုအောင်နိင်သူ ၊ ကိုမိုးသွေး ၊ ကိုသီဟဝင်းတင် တို့ကို အာဏာပိုင်တွေက လိုက်လံဖမ်းဆီးနေတယ်လို့ သိရပါတယ်။
ဒီကနေ့ မနက် (၁ဝ) နာရီလောက်က စတင်ဖမ်းဆီးခံရစဉ်က ကိုဝေဠု ကို RFA က အဆက်အသွယ်ရခဲ့ပါတယ်။ အဲဒီအချိန်ကသူပြောတာက  သူ့အနေနဲ့ ပုဒ်မ ၁၈ နဲ့သာ အခေါ်ခံရတာဖြစ်တဲ့အတွက် နေ့ချင်းဖြေရှင်းနိုင်ပြီး ပြန်လည်လွတ်မြောက်လာဖို့ မျှော်လင့်ကြောင်း အခုလို ပြောခဲ့ပါတယ်။
"ပုဒ်မ ၁၈ ဆိုတာ ကိုယ်ပိုင်ခံဝန်နဲ့ တရားရုံးကို ရင်ဆိုင်ခွင့်ရှိပါတယ်။အရင့်အရင် ပုဒ်မ ၁၈ နဲ့စွဲဆိုခဲ့တဲ့ အမှုတွေကိုလည်း ကိုယ်ပိုင်ခံဝန်နဲ့ တရားရင်ဆိုင်နေပါတယ်။အခုလည်း ကိုယ်ပိုင်ခံဝန်နဲ့ တရားရင်ဆိုင်ခွင့်ရှိမယ်လို့ ထင်ပါတယ်"
ကျောက်တံတားရဲစခန်းနဲ့ ပန်းဘဲတန်း ရဲစခန်းတွေကို RFA က ဆက်သွယ်မေးမြန်းတဲ့အခါမှာ ဒီကိစ္စနဲ့ ပတ်သက်ပြီး တစ်စုံတစ်ရာဖြေကြားခွင့်မရှိဘူးလို့ ပြောပါတယ်။ အင်းစိန်ထောင်ကြီးချုပ်ကို ခေါ်ဆောင်ခံရတဲ့ ဆန္ဒပြ ဦးဆောင်သူတွေကို လာမယ့်ဒီဇင်ဘာလ ၃ ရက်နေ့မှာ ရုံးထုတ်မယ်လို့ သိရပါတယ်။
လက်ပန်းတောင်းတောင်ကိစ္စနဲ့ ပတ်သက်ပြီး အဖမ်းခံခဲ့ရတဲ့ ၆ ဦးနဲ့အတူ ရှိခဲ့တဲ့ မျက်မြင်သက်သေတစ်ဦးကို RFA သတင်းထောက် ကိုကျော်ဇောဝင်းက တွေ့ဆုံမေးမြန်းထားပါတယ်။
အသံဖိုင်နားထောင်ရန်
အသံဖိုင်ယူရန်။

No comments:

Post a Comment

စာဖတ်သူများကွန်မန်.ပေးနိုင်ပါသည်။