Wednesday, May 9, 2012

HIMO High Art ဆံပင်တုစက်ရုံလုပ်သားများ မကျေနပ်မှု အလုပ်သမားရုံးသို့လာရောက်တိုင်ကြား

မွန်လွဲ ၃ နာရီ၊ မေလ ၉ ရက်၊ ၂၀၁၂ ခုနှစ်- အိမ့်ခိုင်ဦး (YPI)

လှိုင်သာယာ စက်မှုဇုန် ၄ ရှိ ကိုးရီးယား နိုင်ငံသားပိုင် HIMO Hight Art ကုမ္ပဏီပိုင် ဆံပင်တုစက်ရုံမှ အလုပ်သမား ၄၀၀ ကျော်တို့ အခြေခံလစာနည်းပါးမှုနှင့် အခြေခံ အလုပ်သမား အဖွဲ့အစည်းဖွဲ့စည်းရာတွင် အခက်အခဲရှိခြင်းတို့ အပေါ် မကျေနပ်သဖြင့် ယနေ့ မွန်းတည့်ချိန်မှစ၍ မရမ်းကုန်းမြို့နယ်ရှိ အစိုးရ ပြည်ပအလုပ်သမားဆိုင်ရာ အေဂျင်စီရုံး သို့ တိုင်ကြားရန် စုရုံးရောက်ရှိနေကြသည်။
 
ယနေ့ မွန်းတည့် ၁၂ နာရီဝန်းကျင်မှ စ၍ မရမ်းကုန်းမြို့နယ် ၈ မိုင် မဟာစည်မှတ်တိုင်အနီးရှိ အလုပ်သမားရုံးရှေ့တွင် HIMO စက်ရုံမှ လုပ်သား ၄/ ၅ ရာကျော် စုရုံးရောက်ရှိနေကြသည်။

ယင်းစက်ရုံ အလုပ်သမားများအနေဖြင့် အခြေခံ လုပ်ခလစာနည်းပါးခြင်း၊ အချိန်ပိုကြေးနည်းပါးခြင်း၊ ယင်းစက်ရုံ လုပ်သားများက အခြေခံအလုပ်သမား အဖွဲ့အစည်း ဖွဲ့စည်းရာတွင် အလုပ်ရှင်က ယင်းအဖွဲ့ကို တရားမ၀င်ဟု ပြောဆိုခြင်း နှင့် လုပ်ခွင်လုံခြုံမှုမရှိခြင်းတို့ကို တိုင်ကြားရန် ယနေ့မွန်းတည့်ပိုင်းမှ စ၍ ရောက်ရှိနေကြသည်ဟု စက်ရုံလုပ်သား တဦးဖြစ်သူ မယမင်းလွင်က ၀ိုင်ပီအိုင်သို့ပြောသည်။

၎င်းက “ကျွန်မတို့ဘာဖြစ်လို့လာလဲဆို အခြေခံလစာနည်းလွန်းလို့ ၀င်ခါစ အလုပ်သမားလည်း အခြေခံလစာ ၇ ထောင်ပဲ၊ ၄၊ ၅ နှစ်ကြာတဲ့သူလည်း အခြေခံ လစာ၇ ထောင်ပဲ၊ အခြေခံလစာနည်းတော့ အချိန်ပိုကြေးလည်း နည်းတယ်၊ တနေ့လုံးလုပ်မှ အလုပ်သမားတယောက်က ၂၉၆ ကျပ်ပဲရတယ်” ဟု ၎င်းက ရှင်းပြသည်။

စက်ရုံလုပ်သားများ ယခုကဲ့သို့ အလုပ်သမားရုံးတွင် မကျေနပ်ချက်ကို တင်ပြရန်လာရောက်ကြပြီး မကြာမီ အလုပ်ရှင်ကိုယ်စားလှယ် ဒေါ်နန့်သောင်းရင် ရောက်ရှိလာပြီး ပြန်လိုက်ခဲ့ရန် အလုပ်သမားများအား ပြောသော်လည်း အလုပ်သမားများက ငြင်းဆိုလိုက်ကြသည်ဟု အလုပ်သမားတဦး သိရသည်။

စက်ရုံတွင် ၎င်းတို့ အလုပ်သမားများ ဖွဲ့စည်းသည့် အလုပ်သမားအဖွဲ့အစည်းကို တရားမ၀င်ကြောင်းနှင့် စက်ရုံပိုင်ရှင်အလိုကျဖွဲ့စည်းသည့် အဖွဲ့အစည်းသာ တရားဝင်ကြောင်း ပြောဆိုသည်ကိုလည်း စက်ရုံလုပ်သားများက မကျေနပ်ကြကြောင်း လုပ်သားများက ပြောသည်။

HIMO စက်ရုံတွင် အလုပ်သမား ၁၈၀၀ ကျော်ရှိပြီး ၂၀၀၅ ခုနှစ်မှ စတင်လုပ်ကိုင်ခဲ့သည်ဟုသိရှိရသည်

လုပ်ငန်းတူရာ စက်ရုံ အလုပ်ရုံများတွင် အလုပ်သမားအဖွဲ့အစည်းများဖွဲ့စည်းခွင့်ကို နိုင်ငံတော် အစိုးရမှ တရားဝင်ခွင့်ပြုလိုက်ပြီးနောက် ယခုအခါ အနည်းဆုံး အလုပ်သမား အဖွဲ့အစည်း ၈ ဖွဲ့ ဖွဲ့စည်းမှတ်ပုံတင်ပြီးဖြစ်သည်။

ယခုနှစ် ဖေဖေါ်ဝါရီလကလည်း လှိုင်သာယာ တိုင်ရီရှုးဖိနပ်စက်ရုံ အလုပ်သမား တထောင်ကျော်တို့ လုပ်ခလစာတိုးမြှင့်ပေးရေးအတွက် ၃ ပတ်ကျော်ကြာ ဆန္ဒပြခဲ့ကြပြီးနောက် အလုပ်သမား ၀ါဏိဇ္ဖခုံရုံးသို့ တိုင်ကြားသည်အထိ ဖြစ်ပွားခဲ့သည်။ ။
 Yangon Press International

No comments:

Post a Comment

စာဖတ်သူများကွန်မန်.ပေးနိုင်ပါသည်။