ဧရာဝတီတိုင်း နှင့် ပဲခူးတိုင်း ရေကြီးမှုကြောင့် လယ်စိုက်ဧက တသိန်းကျော် ရေအောက် ရောက်သွားသော်လည်း ပြည်တွင်း ဆန်စပါးဈေးကွက်၊ ပြည်ပ ဆန်တင်ပို့မှုတို့ကို ထိခိုက်မည်မဟုတ်ဟု မြန်မာနိုင်ငံ ဆန်စပါးလုပ်ငန်းအသင်းက ကြာသပတေးနေ့တွင် ပြောလိုက်သည်။
“သိပ်ပြီး စိုးရိမ်စရာ မရှိပါဘူး။ ရေကျတာနဲ့ စပါးပြန်စိုက်နိုင်အောင် ကျနော်တို့ အားလုံးစီစဉ်နေပါတယ်။ အစပိုင်းမှာ ရေနစ်မြုပ်ထားတဲ့ အတွက် နောက် ပြန်စိုက်တဲ့ စပါးကို အလေအလွင့် မရှိအောင် စောင့်ကြည့်ဖို့တော့ လိုပါတယ်” ဟု ဆန်စပါးလုပ်ငန်းအသင်းမှ အထွေထွေ အတွင်းရေးမှူး ဦးရဲမင်းအောင်က သတင်းထောက်များနှင့် တွေ့ဆုံစဉ် ပြောလိုက်သည်။
မျိုးစပါး တင်းပေါင်း လေးသောင်းနီးပါးခန့် စုဆောင်းထားပြီးဖြစ်ကာ အရန်ပျိုးစနစ်၊ ပျိုးခင်းများကိုလည်း စီစဉ်ထားသည်ဟု သိရသည်။
“အရံဆန်တွေလည်း ရှိနေပါတယ်။ နောက်ပြီး အထူးပြုကုမ္ပဏီတွေရဲ့သီးခြားပံ့ပိုးမှု အစီအစဉ်တွေလည်း ရှိပါတယ်။ ကျနော်တို့ တောင်သူလယ်သမားတွေ စိတ်ဓာတ် ကျ မသွားဖို့လည်း ကျနော် ပြောချင်ပါတယ်” ဟု ဦးရဲမင်းအောင်က ဆိုသည်။
မျိုးစပါးလိုအပ်ချက်အနေအထားမှာ အမြင့်ဆုံးဖြစ်နေပြီး အတိအကျ ဖော်ထုတ်ရန် ခက်ခဲကြောင်း၊ လိုအပ်သည့် မျိုးစပါး အချိန်မှီ ဖြန့်ဖြူးနိုင်ရန် သတင်းစာများမှ တဆင့် တင်ဒါ ခေါ်ယူသွားမည်ဖြစ်ကြောင်း သိရသည်။
မိုးကြီး၊ ရေလွှမ်းမိုးမှုကြောင့် ဧရာဝတီတိုင်းတွင် ၁၁၅,၇၇၇ ဧက၊ ပဲခူးတိုင်းဒေသကြီးတွင် ၃၈,၇၂၄ ဧက ရေမြှုပ်သွားသည်ဟု ဆန်စပါးအသင်းက ကောက်ယူထားသည့် စာရင်းတွင် ဖော်ပြထားသည်။
ရေမြှုပ်နေသော စပါးခင်းအားလုံး ပျက်စီးသွားမည်မဟုတ်ဟု ပဲခူးတိုင်းဒေသကြီး လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနမှ ညွန်ကြားရေးမှူး ဦးအေးကိုကို က ရှင်းပြသည်။
“စပါးမျိုးက ရေကြီးရေနက်ကွင်းတွေမှာ စိုက်တဲ့ စပါးပါ။ မေလဆန်းကတည်းက စိုက်ပါတယ်။ ခုချိန်မှာ ရက် ၉၀ လောက် ရှိပြီး ၃ ပေ၊ ၄ ပေ လောက်မြင့်နေပါပြီ။ သူ့ သဘောသဘာဝက ရေပေါ်မှာ နှာဖျားလေးလောက် ပေါ်နေရင်ပဲ စပါးပင်က မသေပါဘူး” ဟု ဦးအေးကိုကိုက ပြောသည်။
“အဲဒီလို မျှော်လင့်ချက်တွေရှိသလို မနှစ်က အတွေ့အကြုံအရ ကျနော်တို့မှာ အရံမျိုးတွေလည်း အဆင်သင့် ရှိနေပါတယ်။ ရေကျသွားလို့ သြဂုတ်လကုန် စက်တင်ဘာလဆန်း ပြန်စိုက်နိုင်ရင် ရက် ၉၀၊ ရက် ၁၀၀ ဆိုရင် ထွက်နိုင်ပါပြီ” ဟု သူက ဆက်လက် ရှင်းပြသည်။
ဤအတောအတွင်း နိုင်ငံ၏ စပါးကျီဒေသဟု ခေါ်ဆိုနိုင်သည့် ဧရာဝတီနှင့် ပဲခူးဒေသတို့တွင် ရက်ပေါင်းများစွာ ရေလွှမ်းနေမှုကြောင့် ဈေးကွက်တွင် ဆန်စပါး ၀ယ်ယူသိုလှောင်မှု များလာပြီး ဈေးနှုန်းအနည်းငယ် မြင့်တက်လာကြောင်း သိရသည်။
ယမန်နှစ်က အလားတူရေလွှမ်းမိုးမှု၊ ဒေါ်လာဈေးကျဆင်းလာမှုတို့ ဖြစ်ပွားခဲ့ရာ လယ်သမားများ အခက်အခဲ မဖြစ်စေရန် အစိုးရ အရန်ဆန် ၀ယ်ယူစေခဲ့သည်။
ယခုနှစ်အတွင်း ဆန်တန်ချိန် တသန်း ပြည်ပတင်ပို့ရန် လျာထားပြီး ပထမဆုံးအနေဖြင့် ဇန်န၀ါရီလက တန်ချိန် တသောင်းခွဲ တင်ပို့နိုင်ခဲ့သည်။
မြန်မာနိုင်ငံသည် နှစ်စဉ် ဆန်တန်ချိန် ၁၇ သန်းကျော် ထွက်နှုန်းရှိပြီး ပြည်တွင်း စားသုံးမှုမှာ ၁၁ သန်းမှ ၁၃ သန်းအထိ ရှိကြောင်း သိရသည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။