US-ASEAN စီးပွားရေးကောင်စီမှ ပူးတွဲဒါရိုက်တာ Anthony Nelson
မြန်မာနိုင်ငံ၏ အခြေခံ အဆောက်အဦ၊ ပို့ဆောင်ရေးနှင့် ဆက်သွယ်ရေးလုပ်ငန်းများမှာ နိုင်ငံ ခြားမှ စီးပွားရေးလာရောက် လုပ်ကိုင်မည့်သူများအတွက် စိန်ခေါ်မှုများ ဖြစ်နေသည်ဟု US-ASEAN စီးပွားရေးကောင်စီ၏ ပူးတွဲဒါရိုက်တာ Anthony Nelson က ဇူလိုင်လ ၁၆ ရက်နေ့က ဆီဒိုးနား ဟိုတယ်တွင် ပြုလုပ်ခဲ့သော သတင်းစာရှင်းလင်းပွဲ တစ်ရပ်တွင် ပြောကြားသွားခဲ့သည်။
“ မြန်မာနိုင်ငံက ၀န်းကျင်အသစ်ဖြစ်နေလို့ လေ့လာစရာတွေကတော့ အများကြီးပါပဲ။ ကြုံရသလောက်ဆိုရင်တော့ စီးပွားရေး လုပ်ငန်းလုပ်မယ့်သူတွေ အတွက် အခြေခံအဆောက်အဦ၊ ပို့ဆောင်ရေးနဲ့ ဆက်သွယ်ရေးတွေက စိန်ခေါ်မှုတွေဖြစ်နေပါတယ်” ဟု ၄င်း က ပြောကြားခဲ့သည်။
၎င်းက ဖြေရှင်းရမည့် ကိစ္စများစွာ ကျန်နေသေးကြောင်း၊ မြန်မာနိုင်ငံကိုယ်၌က ဒေသတွင်း နှင့် ကမ္ဘာကြီးကို မည်သို့ဆက်စပ်နိုင်မည်ကို အချိန်နှစ်အနည်းငယ် ယူရဦးမည်ဖြစ်ကြောင်း သုံးသပ်သည်။
“ ဆက်စပ်တဲ့နေရာမှာ ရထားလမ်း၊ ကားလမ်းတွေလို ရုပ်ပိုင်းဆိုင်ရာ အခြေခံအဆောက်အဦတွေတင် မဟုတ်ပဲ ဒစ်ဂျစ်တယ်အခြေခံ အဆောက်အဦနဲ့ ICT အခြေခံ အဆောက်အဦတွေလည်း လိုအပ်ပါတယ်။ ငွေကြေးဆိုင်ရာ အဖွဲ့အစည်းတွေကိုလည်း ခရက်ဒစ်ကဒ်တွေ လုပ်ကိုင်ခွင့်ပေးဖို့၊ လူတွေကို ခရက်ဒစ်ကဒ်တွေ အသုံးပြု ခွင့်ပေးဖို့တွေလည်း လုပ်ဆောင်ပေး ဖို့လိုပါတယ်။ ဒါမှ ငွေကြေးတွေကို အလွယ်တကူ ရွှေ့ပြောင်းနိုင်မှာပါ” ဟု ၄င်းက ဆက်လက်ပြောကြားခဲ့သည်။
၎င်းတို့ US-ASEAN စီးပွားရေးကောင်စီသည် မြန်မာနိုင်ငံသို့ အမေရိကန်ထိပ်တန်း ကုမ္ပဏီ ၃၈ ခုနှင့်အတူလာရောက်ပြီး ၄င်းကုမ္ပဏီများထဲတွင် ဘဏ္ဍာရေး၊ စွမ်းအင်၊ ကျန်းမာရေး၊ အခြေခံ အဆောက်အဦ၊ အကြံပေး၊ ထုတ်လုပ်ရေး ကဏ္ဍများမှ ကုမ္ပဏီများ ပါဝင်သည်ဟု သိရသည်။
၎င်းအမေရိကန် စီးပွားရေး လုပ်ငန်းရှင်များသည် မြန်မာအစိုးရနှင့် အမေရိကန် အစိုးရတို့မှ Stakeholders များနှင့် တွေ့ဆုံကာ အနာဂတ်တွင် မည်ကဲ့သို့လုပ်ဆောင်နိုင်မည့် အကြောင်းများနှင့် ပတ်သတ်၍ ဆွေးနွေးခဲ့ပြီး မြန်မာနိုင်ငံအကြောင်းကို အမှန်တကယ် စတင် လေ့လာနေပြီဖြစ်ကြောင်း ပြောကြားခဲ့သည်။
၎င်းတို့ အမေရိကန် စီးပွားရေး အဖွဲ့သည် မြန်မာနိုင်ငံသို့ ပထမဆုံး လာရောက်နိုင်သော အမေရိကန် စီးပွားရေးအဖွဲ့ဖြစ်ပြီး စီးပွားရေး ကောင်စီ၏ သက်တမ်းမှာ ၂၇ နှစ် ရှိသွားပြီဖြစ်ကြောင်း သိရသည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။