(ဓာတ်ပုံ - သိန်းလှိုင်၊ မဇ္ဈိမ)
စစ်တွေ(မဇ္ဈိမ)။ ။ ရေနံနှင့် သဘာဝဓာတ်ငွေ့ ပိုက်လိုင်းလုပ်ငန်းများ လုပ်ဆောင်နေသည့် တရုတ်နိုင်ငံပိုင် CNPC ကုမ္ပဏီအား ခွင့်ပြုချက်မဲ့ ဆန္ဒပြခဲ့၍ ကျောက်ဖြူမြို့နယ်၊ မဒေး (မြဒေး)ကျွန်းသား အနည်းဆုံး ၁၁ ဦးအား မဒေးကျွန်းရဲစခန်းမှ အရေးယူထားကြောင်း သိရသည်။
ဒေသဖွံ့ဖြိုးရေးများ လုပ်ဆောင်ပေးရန် ပါဝင်သည့် တောင်းဆိုချက်များ ရရှိရေးအတွက် ဧပြီ ၁၈ ရက်နေ့ ညနေက
မဒေးကျွန်း၌ ရုံးစိုက်လျက်ရှိသော CNPC ကုမ္ပဏီအား ဒေသခံရွာသား ၈၀၀ ခန့်က ဆန္ဒပြခဲ့ကြခြင်း ဖြစ်သည်။
"ဒီနေ့မနက် ၈ နာရီမှာ သုံးဦးကို မဒေးရဲစခန်းက ခွင့်ပြုချက်မဲ့ဆန္ဒပြလို့ စတင်အရေးယူပါတယ်။ သူတို့တွေ အပါအဝင်
အားလုံး ၁၀ ဦးကို အရေးယူမယ်လို့ စခန်းမှူးက ပြောလိုက်တယ်။ အဲဒီမှာ ကျောက်တန်းရွာမှ သုံးဦး၊ ပြိန်ရွာမှ သုံးဦး၊
ရွာမမှ လေးဦးနှင့် ပန်းထိမ်ဆည်မှ တဦး ပါတယ်။ ကျနော့်ကိုတော့ ကျနော်မရှိတုန်း ရဲတွေက အိမ်မှာ လာရှာသွားတယ်။ ပြန်ရောက်ရင် စခန်းကို လာခဲ့ဖို့ မှာသွားတယ်။ အခု အားလုံးနီးပါး ပုဒ်မ ၁၈ နဲ့ အရေးယူခံ ထားရပြီးတော့ အာမခံနဲ့ ပြန်လွှတ်ထားတယ်" ဟု မဒေးကျွန်း ဒေသဖွံ့ဖြိုးရေးကော်မတီ ဥက္ကဋ္ဌ ဦးထွန်းကြည် က မဇ္ဈိမကို ပြောသည်။
အရေးယူခံရသူ ၁၀ ဦးမှာ ကျောက်တန်းရွာမှ ကိုမျိုးနိုင်၊ ကိုမောင်မောင်မြင့်၊ ကိုယဉ်လှ၊ ပြိန်ရွာမှ ကိုဆန်းအေး၊ ကိုမောင်မောင်စိုး၊ ကိုမြင့်စိုး၊ ရွာမရွာမှ ဦးထွန်းကြည်၊ ကိုအောင်သိန်းထွန်း၊ ကိုမောင်ဖြူသီး၊ ဦးထွန်းခိုင်နုနှင့် ပန်းထိမ်ဆည်ရွာမှ ကိုတင်ဦးကျော် တို့ ဖြစ်ကြသည်။
ကိုအောင်မြင့်စိုးမှာ ဆန္ဒပြမှုဖြစ်ပွားချိန်တွင် မဒေးကျွန်း၌ ရှိမနေခြင်းကြောင့် အရေးယူခံရမည့် မူလစာရင်း ၁၁ ဦးထဲမှ ၎င်းအားဖယ်ထုတ်လိုက်ကြောင်း ရဲဌာနမှအကြောင်းကြားလာသည်ဟု ဒေသဖွံ့ဖြိုးရေးကော်မတီ ဥက္ကဋ္ဌ ဦးထွန်းကြည်က ပြောသည်။
ဆန္ဒမပြမီ တရက်အလို ဧပြီလ ၁၇ ရက် (နှစ်ဆန်းတရက်) နေ့ကလည်း ဆန္ဒပြမှုကို တားဆီးရန် ကြိုးပမ်းချက် တရပ်
အနေဖြင့် ခွင့်ပြုချက်မဲ့ ဆန္ဒမပြပါ ဟူသော ခံဝန်ချက်ကို CNPC က အလုပ်သမားများအား လက်မှတ်ရေးထိုး
စေခိုင်းခဲ့ရာ အချို့မှာ လက်မှတ်ထိုးရန် ငြင်းဆန်ကြ၍ မဒေးကျွန်းမှ အလုပ်သမား ၅၀ ကျော်အား ထိုနေ့၌ပင် အလုပ်မှ ထုတ်ပစ်ခဲ့သည်ဟုလည်း ဒေသဖွံ့ဖြိုးရေး ကော်မတီက ပြောဆိုသည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။