ကျိုက်ထီးရိုးမှ လက်လုပ်လက်စားဒေသခံများ ပထမဆုံးအကြိမ်ဆန္ဒထုတ်ဖော်

ကျိုက်ထီးရိုးစေတီတော်သို့ ပြေးဆွဲနေသည့်  မော်တော်ယာဉ်လိုင်းနှင့် ပတ်သက်၍   တာဝန်ရှိသူများမှ အမြန်ဆုံးညှိနှိုင်းဖြေရှင်းပေးရန် ဒေသခံ လက်လုပ်လက်စားအများစုက ဇန်နဝါရီလ(၁၅) ရက်နေ့က ပထမဆုံးအကြိမ် ဆန္ဒထုတ်ဖော်တောင်းဆိုမှုပြုလုပ်ခဲ့သည်။

 

တောင်းဆိုမှုများတွင် အချက်(၄)ချက်ပါဝင်ပြီး လက်ရှိပြေးဆွဲနေသည့် ယာဉ်လိုင်းများအား ထပ်မံတိုးချဲ့ကာ မည်သူမဆို လိုင်းဆွဲခွင့်ပြုရန်၊ ယာဉ်စီးခများ လျှော့ချပေးရန်၊ ကားများကို အချိန်မှန်ထွက်ပေးရန်နှင့် ရသေ့တောင်တွင် ဂိတ်ဆုံးပေးရန် စသည့်အချက်များကို   တောင်းဆိုခဲ့ကြခြင်း ဖြစ်သည်။

 

ဆန္ဒထုတ်ဖော်ပွဲကို ဂေါက်ကွင်းမှ ကျိုက်ထိုမြို့တော်ခန်းမအထိ လမ်းလျှောက်ဆန္ဒထုတ်ဖော်ကာ ၎င်းတို့ တောင်းဆိုချက်များအား (၅)ရက်အတွင်း ညှိနှိုင်းဆောင်ရွက် ပေးခြင်းမရှိပါက ထပ်မံ၍ ဆန္ဒထုတ်ဖော်သွားမည်ဖြစ်ကြောင်း ဆန္ဒထုတ်ဖော်ရာတွင် ဦးဆောင်သူ ဦးဇော်ဝင်းက ပြောသည်။

 

၎င်းတို့ တောင်းဆိုရခြင်းမှာ ကျိုက်ထီးရိုးစေတီတော်ကြီးအား အမှီပြုလုပ်ကိုင်စားသောက်လျက်ရှိသော လက်လုပ်လက်စားများအနေဖြင့် အခက်အခဲအကျပ်အတည်းများရှိလာသည့်အတွက်ကြောင့် ဆန္ဒ ထုတ်ဖော်ရခြင်းဖြစ်ကြောင်းကိုလည်း သိရသည်။

 

"ကားတွေကိုအချိန်မှန်သတ်မှတ်ပေးဖို့ဆိုတာက သူတို့ကအရင်ကအချိန်သတ်မှတ်ထားတယ်။ မနက် (၆) နာရီ၊ ည (၆) နာရီပေ့ါ။ ခုက ဘုရားဖူးတဲ့သူတွေလာတော့ မနက် (၂) နာရီ လိုင်းဆွဲချင်ဆွဲတယ်။ ညဆိုလည်း (၈) နာရီလောက် မှ ဂိတ်ပိတ်တော့ ဈေးသူဈေးသားတွေ အနေနဲ့ ဈေးရောင်းချလို့မရဘူး။ ဘုရားဖူးတွေက ညကတည်းက ၀င်တယ်။ အဲ့တော့ဆိုင်တွေက မဖွင့်သေးဘူး။ ဆိုင်တွေဖွင့်တော့ ဘုရားဖူးတွေက မရှိတော့ဘူး။"ဟု ကျိုက်ထီးရိုးတောင်ခြေတွင် ဈေးရောင်းချသူတစ်ဦးက ပြောသည်။

 

ထိုသို့ အခက်အခဲများကြုံတွေ့နေရာသည်မှာ အချိန်ကာလကြာမြင့်နေပြီဖြစ်သော်လည်း တာဝန်ရှိ သူများမှ လုပ်ဆောင်ပေးခြင်း မရှိကြောင်း ဈေးသည်တို့ကဆိုသည်။

 

'အဲ့လိုဈေးသည်တွေ ထိခိုက်တယ်ဆိုတာ မှန်ပေမယ့် ဘုရားဖူးတွေအတွက်တော့ ခရီးကိုမြန်မြန် ရောက်တယ်။ အရင်ကဆိုရင် ကင်ပွန်းစခန်းကို ညအချိန်မတော်ရောက်ရင် လမ်းလျှောက်နေရတယ်။ ကင်ပွန်းစခန်းမှာအိပ်စရာနေရာမရှိလို့ လက်ဖက်ရည်ဆိုင်ထိုင်နေရတယ်။' ဟု ကျိုက်ထီးရိုးသို့ မကြာခဏ ဘုရားဖူး လာရောက်သူ တစ်ဦးက ပြောသည်။

 

ဈေးသည်များအနေဖြင့် ကျိုက်ထီးရိုးစေတီတော်ကြီးအား အမှီပြုကာ ဈေးရောင်းချနိုင်ရန်အတွက် ဂေါပကလူကြီးများကို ကွင်းယာဆိုင် တစ်ဆိုင်လျှင် တင်ဒါကြေး ကျပ် (၁၃) သိန်းနှင့် (၁၄) သိန်းခန့် ပေးဆောင်ရနေရကာ ဈေးဝယ်ယူသူမရှိသဖြင့် အခက်အခဲများနှင့် ရင်ဆိုင်နေရခြင်းဖြစ်သည်။

 

"ကျွန်တော်တို့က တင်ဒါငွေမသွင်းတော့ ဂေါပကလူကြီးကလာပြောတယ်။ ဒီကိစ္စကိုသူပြေလည်အောင်လုပ်ပေးမယ်။ ကားတွေကိုလည်း ရသေ့တောင်မှာ ဂိတ်ဆုံးအောင်သူလုပ်ပေးမယ်လို့ပြောပြီး တင်ဒါငွေတွေ ဘုရားအလှူငွေတွေ ထည့်ခိုင်းတယ်။ အဲ့တော့လည်း ကျွန်တော်တို့က ထည့်လိုက်တယ်။ ဒါပေမယ့်အခုချိန်ထိ မလုပ်ပေးသေးဘူး။" ဟု ဦးဇော်ဝင်းက ဆက်ပြောသည်။

 

ကျိုက်ထီးရိုးစေတီတော်တွင် ဈေးဆိုင်ခန်းပေါင်း ၁၅၀ ၀န်းကျင်ခန့်ရှိကြောင်း သိရသည်။