ကချင်ပြည်နယ် ဖားကန့်မြို့နယ်တွင်း ကေအိုင်အိုနှင့် မြန်မာစစ်တပ်တော်နှစ်ဘက်အကြား စစ်ဖြစ် ပွားနေခြင်းကြောင့် ကျောက်စိမ်းဈေးကွက်အား လှုပ်ခတ်ထိခိုက်စေသည်ဟု လုပ်ငန်းရှင်များက သုံးသပ်ပြောဆိုနေသည်။
“စီးပွားရေးထိခိုက်တာက ကချင်ပြည်နယ် တစ်ခုတည်းမဟုတ်ဘူး။ မြန်မာတစ်နိုင်ငံလုံးရဲ့ စီးပွားရေး လည်း ထိခိုက် လာနိုင်တယ်။ နောက်ဆုံး တိုင်းပြည်အုပ်ချုပ်သူအစိုးရတွေရဲ့ စီးပွားရေးမှာတောင် ထိလာနိုင်တယ်။ ဘာဖြစ်လို့လဲဆိုတော့ ဒီ ဖားကန့်မှော်မှာ သူတို့ရဲ့ စီးပွားရေး လုပ်ကွက်ရှိတဲ့ ကုမ္ပဏီ တွေ အများကြီးရှိတယ်လေ”ဟု ဖားကန့်မြို့နယ်ရှိ ကျောက်စိမ်းလုပ်ငန်းလုပ်ကိုင်နေသူ ဦးလရှီး ဂမ်ဆိုင်းက ပြောသည်။
ဖားကန့်မြို့နယ်တွင် မြန်မာနိုင်ငံအရပ်ရပ်မှ ပြည်သူများလာရောက်ကာ ကျောက်စိမ်းတူး ဖော်ရေးလုပ်ငန်းများ လုပ်ကိုင်နေကြခြင်းဖြစ်သည်။ ကျောက်စိမ်းတူးဖော်မှုကို အခြေခံကာ အခြားစီးပွားရေးလုပ်ငန်းများပါ ပူးတွဲ လုပ်ကိုင် ကြသည်။
ယခုနှစ် ဇန်နဝါရီလ (၄) ရက်နေ့တွင် ကေအိုင်အိုမှ ဖားကန့်- မြစ်ကြီးနားကားလမ်းအား(၁)လ အကြာ တရားဝင်ပိတ်ပင်ပြီးနောက် စစ်စတင်ဖြစ်ပွားခဲ့ခြင်းဖြစ်သည်။ ထို့နောက် အစိုးရမှ ကျောက်စိမ်း တူးဖော်ရေး ကုမ္ပဏီများအား မေလမှ နောက်ထပ်(၅) လကြာအထိ ကျောက်တူးဖော်မှုကို ခေတ္တ ရပ်ဆိုင်းခဲ့သည်။
ကျောက်စိမ်းကုမ္ပဏီစုစုပေါင်း (၁၀၀) ကျော်ရှိသည် ဖားကန့်မြို့နယ်ရှိ လုပ်ကွက်များအား ချက်ချင်း ရပ်ဆိုင်း လိုက်ရခြင်းဖြစ်သည်။
“ခု တရားဝင် ပိတ်ထားတာလည်း ပြည့်ခါနီးနေပြီ။ ပြန်ဖွင့်တော့လည်း လုပ်လို့မရသေးရင်တော့ ပြည်သူတွေကို ထိခိုက်မှာပဲလေ။ ဘာဖြစ်လို့လဲဆိုတော့ ပုံမှန်မလည်ပတ်နိုင်ဘူးလေ။ ရင်းနှီး မြှပ်နှံမှုအပေါ်မှာ ပြန်ပြီးတော့ အကျိုးအမြတ်မရှိနိုင်သလို ရင်းနှီးမြှပ်နှံမှုလည်း ပြန်မဖော်နိုင်ဘူး။ ဒေသ ပြည်သူကလည်း ဒီပေါ်မှာပဲ အမှီပြုနေရတာ ဆိုတော့ စားဝတ်နေရေးလည်း ရပ်ဆိုင်းသွားသလို ဖြစ်သွားတယ်” ဟု ကျောက်မြတ်ရတနာကုန်သည်များအသင်း (မြစ်ကြီးနား)မှ အတွင်းရေးမှူး ဦးသောင်းကြည်က ပြောသည်။
ဆက်လက်ပြီး စီးပွားရေးထိခိုက်မှုရှိသော်လည်း နိုင်ငံတော်အစိုးရအဆင့်ထိ ထိခိုက်မှု မရှိနိုင်ဟု ၄င်းက ဆက်လက် သုံးသပ်သည်။
“ထိခိုက်တယ်ဆိုရင်လည်း မြန်မာအစိုးရလောက် အထိတော့ မထိခိုက်ပါဘူး။ အစိုးရက ဒီမှာပဲ မှီခိုနေတာမှ မဟုတ်တာ။ ကျောက်စိမ်းက တစ်စိတ်တစ်ဒေသ တစ်ခုပဲ ရှိပါတယ်။ သူ့အကန့်အကန့် ဝင်ငွေတော့ ရှိတာပဲလေ။ တခြား သစ်တော၊ ရေနံ၊ သဘာဝဓါတ်ငွေ့တွေမှာ ဝင်ငွေရနေတာပဲ။ တအားကြီး ဆိုးဆိုးရွား ထိခိုက်မှာ မဟုတ်ဘူး။”ဟု ၄င်းက ဆက်ပြောသည်။
ထိုသို့ ကုမ္ပဏီလုပ်ငန်းရပ်နားလိုက်သော်လည်း ဒေသခံများမှ စက်ယန္တရားများမပါ တစ်နိုင်တစ်ပိုင် ကျောက်စိမ်းတူးဖော်ခြင်းဖြင့် ဝမ်းစာဖြည့်တင်းနေကြသည်။
သြဂုတ်လ (၂၁)ရက်တွင် နှစ်ဘက် စစ်ပြန်လည်ဖြစ်ပွားလာပြီး မြောက်ဖြူ၊ ဆိုင်းဂျာဘွမ်၊ မော်မောလယန်၊ နန်ပွန်၊ သူဌေးချောင်း၊ ဘလခ၊ မှော်ဝမ်းကြီး၊ မှော်ဝမ်းကလေး စသည့် ကျေးရွာ ရပ်ကွက်များရှိ ဒေသခံများအနေဖြင့်လည်း ထွက်ပြေး တိမ်းရှောင်နေရသည်။
ဖားကန့်တွင် စစ်ဘေးဒုက္ခသည်စခန်း (၃၁)ခုရှိပြီး စုစုပေါင်း လူဦးရေ ၉ သောင်းနီးပါးခန့် လာရောက် ခိုလှုံနေကြကြောင်း သိရသည်။
ကချင်ပြည်နယ် ငြိမ်းချမ်းရေး အကျိုးဆောင် အဖွဲ့မှ ဦးအင်ရှန်းဆန်အောင်က ထိုကဲ့သို့ စစ်ထပ်မံ ဖြစ်ပွားနေလျှင်မူ ကချင်ပြည်နယ် စီးပွားရေး ဆက်လက်ဆိုးရွားလာနိုင်သည်ဟု ဆိုသည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။