SSA-N တပ်များ ထပ်ဆုတ်ပေးနိုင်မည်မဟုတ်ဟု ဆို

ချင်းမိုင်(မဇ္စျိမ)။   ။ ပြည်ထောင်စုအဆင့် နှစ်ဖက်သဘောတူညီချက်အရ အခြေစိုက်နေထိုင်နေခြင်း ဖြစ်၍ အစိုးရ စစ်တပ်က ရှမ်းပြည်မြောက်ပိုင်းတပ်မတော် SSA-N တပ်စခန်းများကို ဆုတ်ခွာပေးရန် ပြောဆိုမှု လက်ခံမည် မဟုတ်ကြောင်း ပြောရေးဆိုခွင့်ရှိသူ ဗိုလ်မှူးစိုင်းလှက ပြောသည်။ 

အင်ဒိုနီးရှား-မြန်မာ ကုန်သွယ်မှု ၂၀၁၆ တွင် ဒေါ်လာသန်း တထောင်ဖြစ်ရန် မှန်း

ရန်ကုန် (မဇ္ဈိမ)။   ။ အင်ဒိုနီးရှားနှင့် မြန်မာ ကုန်သွယ်မှု ပမာဏကို လာမည့် ၂၀၁၆ ခုနှစ်တွင် ဒေါ်လာ ၁ ဘီလီယံထိ ရောက်ရှိလာရန် နှစ်နိုင်ငံ ခေါင်းဆောင်များ ဆွေးနွေးခဲ့ကြသည်။

နေပြည်တော်တွင် ကုန်သွယ်ရေးဝန်ကြီး ဦးဝင်းမြင့်နှင့် အင်ဒိုနီးရှား စီးပွားရေးဝန်ကြီး ဟတ္တာ ရာဂျာဆာ (Hatta Rajasa)တို့ ဧပြီလ ၂ ရက်နေ့က တွေ့ဆုံဆွေးနွေးအပြီး အင်ဒို နိုင်ငံပိုင် လုပ်ငန်းများ ဝန်ကြီး ဒါလန် အစ္စကန် (Dahlan Iskan)က ပြောကြားရာတွင် ၎င်းတို့၏ ကုမ္ပဏီကြီး သုံးခု မြန်မာနိုင်ငံတွင် လုပ်ကိုင်ရန် လိုင်စင်ရပြီးကြောင်း ထုတ်ဖော်ပြောကြားသွားသည်။

မြန်မာ့ ဓာတ်အား လိုင်းများ ကောင်းမွန်ရေး ကူညီရန် ထိုင်း လေ့လာနေ

မြန်မာနိုင်ငံ၏ မြင့်တက်လာသော လျှပ်စစ်မီး လိုအပ်ချက်များအရ ဓာတ်အားလိုင်းများကို အဆင့်မြှင့်တင်
ပြင်ဆင်တိုးချဲ့ရေး အတွက် ထိုင်းနိုင်ငံ တိုးတက်ရေး အေဂျင်စီမှ ချေးငွေ ဘတ် ၁ ဘီလျံအား ရရှိရန် ရန်ကုန်မြို့ လျှပ်စစ်မီး ဖြန့်ဝေပေးရေး ဘုတ်အဖွဲ့က မျှော်မှန်းလျက်ရှိသည်။

ယာယီ လျှပ်စစ် အာဏာပိုင်ပဖွဲ့ PEA အား စီမံကိန်း ကို စီမန်ခံခွဲ၍ ဦးစီးဦးရွက် ပြုလုပ်နိုင်ရန် ခန့်အပ်ထားပြီး
ဖြစ်သည်ဟု အိမ်နီးချင်းနိုင်ငံများ စီးပွားရေးဆိုင်ရာ တိုးတက်ရေးအေဂျင်စီ (NEDA)မှ ဥက္ကဌ နှင့် အမှုဆောင်အရာရှိချုပ် ဖြစ်သူ Acksiri Buranasiri မှ ပြောကြားသည်။

အိန္ဒိယတွင် ဒေါ်လာ ၃ သန်းခန့်တန် မူးယစ်ဆေးများ ဖမ်းမိရာ မြန်မာ နှစ်ဦးပါ

နယူးဒေလီ (မဇ္ဈိမ)။   ။ အိန္ဒိယနိုင်ငံ၊ နယူးဒေလီမြို့တော်တွင် ရူပီး ၁၅ ကုဋေ (ဒေါ်လာ ၂ သန်း ၇ သောင်းကျော်) တန်ဖိုးရှိ ဆူဒိုဖက်ဒရင်း ဆေးများနှင့်အတူ လူ ငါးဦး ဖမ်းဆီးရမိရာ ၎င်းတို့အထဲတွင် မြန်မာနိုင်ငံသား နှစ်ဦး ပါဝင်ကြောင်း ရဲမင်းကြီး Ravindra Singh Yadav က ထုတ်ဖော်ပြောဆိုလိုက်သည်။

“မြန်မာနိုင်ငံသား Zel Khan Mong (၄၆) နဲ့ Dongh Lian Kham (၄၁)၊ မီဇိုရမ် ပြည်နယ်က Lianza Daula (၄၆) နဲ့ C. Zoram Thanga (၂၈)၊ ဒေလီက Vikas Bathla (၄၃)တို့ကို ဆူဒိုဖက်ဒရင်း ဆေးပြား ၁၄၀ ကီလိုဂရမ်နဲ့
ဆေးမှုန့် ၅၀ ကီလိုဂရမ်တို့နဲ့အတူ ဖမ်းဆီး ရမိပါတယ်” ဟု ရဲမင်းကြီးအား ကိုးကား၍ သောကြာနေ့ထုတ် အိန္ဒိယ သတင်းစာများတွင် ဖော်ပြပါရှိသည်။

အစိုးရနှင့် KIO ဆွေးနွေးရက်ရွှေ့၊ ဧပြီနှောင်းပိုင်းမှ ပြန်တွေ့နိုင်မည်

ရန်ကုန် (မဇ္ဈိမ)။   ။ ပြည်ထောင်စုအစိုးရ ငြိမ်ချမ်းရေး ဖေါ်ဆောင်ရေး လုပ်ငန်းကော်မတီနှင့် ကချင်လွတ်လပ်ရေး အဖွဲ့ KIO တို့ ဧပြီလ ၆ ရက်နေ့တွင် မြစ်ကြီးနားမြို့၌ တွေ့ဆုံဆွေးနွေးရန် စီစဉ်ထားသော်လည်း တက်ရောက်မည့် သူများ အဆင်သင့် မဖြစ်သေး၍ ဧပြီလ ၂၂ ရက် နောက်ပိုင်းတွင်သာ တွေ့ဆုံရန် ရွှေ့ဆိုင်းလိုက်ရကြောင်း မြန်မာ ငြိမ်းချမ်းရေးစင်တာ MPC မှ ပြောသည်။

ပျောက်ဆုံးနေသူ ကိုရဲမင်းဦးကို ပုဒ်မ ၅၀၅ (ခ)ဖြင့် ရုံးထုတ်

ပုဒ်မ ၅၀၅ (ခ)ဖြင့် အစိုးရမှ စွဲချက်တင်ခံထားရသူကိုရဲမင်းဦးကို အနောက်ပိုင်းခရိုင်တရားရုံးတွင် ဧပြီလ(၄)ရက်နေ့၌ ရုံးထုတ် ရမန်ပေးခဲ့သည်။

ကိုရဲမင်းဦးကို မတ်လ(၂၅)ရက် ည(၉း၀၀)နာရီတွင် အနောက်ပိုင်းခရိုင်ရဲမှုးနှင့်အဖွဲ့က ဆွေးနွေးစရာရှိသည်ဟု လာရောက်ခေါ်ယူခဲ့ဖြင်းဖြစ်ကြောင်းနှင့်၎င်းမှာ  အင်းစိန်ထောင်၌ အချုပ်ခံထားရသူဖြစ်ကြောင်းကိုလည်း သိရှိရသည်။ အစိုးရမှ မြန်မာနိုင်ငံတွင် ဖြစ်ပေါ်နေသော ၉၆၉ ဆရာတော်များပဋိပက္ခဖြစ်စဉ်များ၏ နောက်ကွယ်၌ ကြိုးကိုင် လှုပ်ရှား နေသူဟု စွဲချက်တင်ခံနေရသူလည်းဖြစ်သည်။

ဧပြီ (၅)ရက်နေ့ မကူးမီ အလုံ EPC၀င်းအတွင်း မီးလောင်မှု ဖြစ်ပွား

ဧပြီလ(၄) ရက်နေ့ ည(၁၁)နာရီ(၄၀)မိနစ် အလုံမြို့နယ်ရှိ မြန်မာလျှပ်စစ်ဓာတ်အားပေးစက်ရုံဝင်းအတွင်း၌ မီးလောင်မူတစ်ရပ်ဖြစ်ပွားခဲ့သည်။

အဆိုပါ မီးလောင်မှုမှာ အလုံဓာတ်အားပေးစက်ရုံဝင်းအတွင်းရှိ ဓာတ်အားပေးစက်အသစ်များထားရှိရာ အခန်းရှိ မီးခိုးရေနွေးပိုက်လိုင်းမှတဆင့် မီးလောင်ကျွမ်းမှုဖြစ်ခဲ့ကြောင်း အလုံမြို့နယ်ရဲတပ်ဖွဲ့ကဆိုသည်။

ရထားလိုင်းအချို့သင်္ကြန်အတွင်း ရပ်နားမည်ဟု သိရ

မြန်မာနိုင်ငံတစ်ဝှမ်းလုံးရှိ ရထားလိုင်း အချို့အား ဧပြီ၁၄ရက်မှ ၁၆ရက်နေ့အထိ ရပ်နားသွားမည်ဖြစ်ကြောင်း မြန်မာမီရထားက သိရှိရသည်။

လက်ရှိပြေးဆွဲလျက်ရှိသော မီးရထားများ၌ သွားလာရန်ခက်ခဲသောနေရာများတွင် ပြေးဆွဲလျက်ရှိသော ရထားများအားလုံးကို ရပ်နားခြင်း မပြုကြောင်း၊ ရထားများပြုပြင်ထိန်းသိမ်းရန်နှင့် ခရီးသွားများသွားလာမှုနည်း နိုင်သည့် အချိန်ဖြစ်ခြင်းကြောင့် ရပ်နားထားခြင်းဖြစ်ကြောင်းနှင့် နှစ်ဆန်းတစ်ရက်နေ့၌ ခရီးစဉ်အားလုံးကို ပြန်လည်ပြေးဆွဲပေးသွားမည်ဖြစ်သည်ဟု သိရသည်။

လုံခြုံရေးအကူအညီဖြင့် ဘာသာရေးစတေကာများအား လူငယ်များ ဖြန့်ဝေနေ

ပြည်တွင်းရှိ လူငယ်အန်ဂျီအိုအဖွဲ့အစည်းအချို့က မြန်မာနိုင်ငံတွင်း ဖြစ်ပေါ်နေသည့် ပဋိပက္ခများ ငြိမ်းအေးစေ ရေးအတွက် ဘာသာရေးဆိုင်ရာ စတစ်ကာများကို အာဏာပိုင်အချို့၏ လုံခြုံရေးအကူအညီဖြင့် မြို့နယ်(၃)ခု နေ ပြည်သူများထံသို့ ဧပြီလ (၅)ရက်နေ့ နံနက်(၈)နာရီမှ စတင်ကာ ဝေငှလျက်ရှိကြောင်း ရှိသည်။

လူငယ်အန်ဂျီအိုအဖွဲ့အချို့မှ လိုက်လံဝေသည့် စတစ်ကာများမှာ “ ဘာသာ ၊ လူမျိုး  မခွဲခြား မြန်မာနိုင်ငံသား “ နှင့် “ကျွနိုပ်ကြောင့်…လူမျိုးရေး ၊ ဘာသာရေး ပဋိပက္ခ မဖြစ်စေရ…” ဟူသည့် စတစ်ကာများဖြစ်သည်။

ရှမ်းပြည်နယ်(မြောက်) ၌ KIA တပ်အား အစိုးရတပ်ဆက်လက် ထိုးစစ်ဆင်နေ

အစိုးရတပ်သည် ရှမ်းပြည်နယ်မြောက်ပိုင်း ကချင်လွတ်မြောက်ရေးတပ်ဖွဲ့ (KIA) နယ်မြေသို့ ဆက်လက်၍ အင်အားတိုးချဲ့ကာ ထိုးစစ်ဆင်တိုက်ခိုက်နေကြောင်း သိရသည်။

ယမန်နေ့ နံနက် ၉ နာရီခွဲမှ ၁၁ ခွဲထိ   KIAနှင့် တအောင်း (ပလောင်) အမျိုးသားလွတ်မြောက်ရေးတပ်မတော် TNLA တို့ ပူးပေါင်းပါဝင်သည့် တပ်ပေါင်းစုများတို့က မုန်းဝီး Mung Wi လှုပ်ရှားနေသော အစိုးရတပ်စစ်ကြောင်း (အင်အား ၆၀ ခန့်) တို့ နှင့် ရင်ဆိုင်တိုက်ပွဲများဖြစ်ပွားခဲ့ခြင်းဖြစ်သည်ဟု KIA ပြောသည်။

"ကျနော်တို့နယ်မြေမှာ အစိုးရတပ်က အင်အားဖြည့်Operation လုပ်လာသလို နေရာတိုင်းမှာ လှုပ်ရှားလာ တယ်။  အင်အားက အဖွဲ့ ၁ ဖွဲ့မှာ ၅၀၊ ၆၀ နဲ့ စစ်ကြောင်းများစွာနဲ့ လှုပ်ရှားနေတယ်" ဟု တပ်မဟာ (၄) အရာရှိတဦးက KNG ကချင်သတင်းဌာန သို့ပြောသည်။

ယမန်နေ့ ရှမ်းပြည်မြောက်ပိုင်း KIA တပ်ရင်း ၈ ဒေသရှိ တရုတ်ရွာ တာဘန်ကုန်း (Tabang Kung)နှင့် ရှောင်ဘန်ကုန်း (Shaubang Kung) နေရာတွင် အစိုးရတပ်နှင့် ထပ်မံတိုက်ပွဲဖြစ်ပွားခဲ့သည်။

အဆိုပါတိုက်ပွဲတွင် နှစ်ဘက်တပ် ထိခိုက်သေဆုံးမှု မသိရှိရပါ။  KIA တပ်ရင်း (၈) နှင့် တပ်ရင်း (၃၄) နယ်မြေတွင် TNLA  နှင့် KIA တပ်ပေါင်းစုတို့ ပူးတွဲလှုပ်ရှားသည့် နယ်မြေဖြစ်သည်။

ထို့ပြင် အစိုးရတပ်များနှင့် KIA တပ်မဟာ (၄) နယ်မြေ နမ်တောင်းဒေသ နမ်ဂတ် (Nam Gat) ရွာအပြန် ဘက်တွင်လည်း မတ်လ၂၉ ရက်နေ့ ညနေ ၅ ခွဲချိန်တွင် တိုက်ပွဲများဖြစ်ပွားခဲ့ပြီး ယခုစစ်အင်အားများ ဆက်လက်တိုးချထားကြောင်း သိရသည်။

KIA ၏ ပြည်သူ့စစ် MHH (Mungshawa Hpyen Hpung) တပ်ဖွဲ့ (၅) ထိန်းချုပ်နယ်မြေအတွင်း အင်အား ၇၀ ခန့်ရှိသော အစိုးရတပ်က မုန်ဘော်ပြည်သူ့စစ်တပ်ဖွဲ့ ၊ ပန်းဆေး ပြည်သူ့စစ်တပ်ဖွဲ့တို့နှင့် ပူးပေါင်းလှုပ်ရှား နေသည်ဟုသိရသည်။ အစိုးရ၏ ပူးပေါင်းတပ်များသည် နမ်တောင်းဒေသ ရှဘွတ်ကောင်းခရားတွင် အယောက် ၄၀၊  ပန်းခါးတွင် ၅၀ ယောက်၊ နမ်ဂတ်တွင် အယောက် ၅၀၊ မော်တောင်းဘက်တွင် အယောက် ၅၀ စသဖြင့် အုပ်စုခွဲပြီးလှုပ်ရှားနေသည်ဟု ဆိုသည်။  

"လူအင်အားစုပြီး ရှေ့တန်းမှာ နည်းနည်းစီဖြည့်နေတယ်။ ရှေ့မှာရှိနေတဲ့သူတွေကိုလည်း ကျန်နေတဲ့သူတွေ ကို ပြန်စောင့်ပြီးနေတယ်။ တဆင့်ပြီးတဆင့် တိုးတိုးလာလို့ ကျနော်တို့နဲ့အနီးကပ်ဆုံးနေရာမှာ ရှိနေပြီ" ဟု MHH ပြည်သူ့စစ်အရာရှိ တဦးက KNG ကချင်သတင်းဌာန သို့ပြောသည်။

ထို့အပြင် လားရှိုးဘက်မှ အစိုးရတပ် စစ်အင်အား ၂၀၀ ကျော်ကလည်း ဂစ်ပိုက်လိုင်းလုံခြုံရေးအတွက် နယ်မြေရှင်းလင်းရန် ကေအိုင်အေ နယ်မြေသို့ အင်အားထပ်ဖြည့် လာခြင်းဖြစ်သည်ဟု အဆိုပါ MHH အရာရှိက ပြောသည်။

အစိုးရနှင့် ကချင်လွတ်မြောက်ရေးအဖွဲ့ (KIO) ကြား ယခုလ ဧပြီ ၁၀ ရက်မတိုင်မီ ထပ်မံတွေ့ဆုံရန် ပြောဆိုထားသော်လည်း ယခုချိန်ထိ ရက်သတ်မှတ်ခြင်းမရှိသေးပေ။ တိုက်ပွဲလျှော့ချရေးအတွက်အင်အား တိုးချဲ့မှု ထိုးစစ်ဆင်မှုမပြုလုပ်ရန် အစိုးရထံ ကေအိုင်အို ပေးစာပေးပို့ထားကြောင်း၊ အဆိုပါတွေ့ဆုံမည့် ကိစ္စအတွက်လည်း အကြို ညှိနှိုင်းမှုများလိုအပ်နေသေးကြောင်း ဒု-အထွေထွေအတွင်း ရေးမှူး-၂ လာနန် ပြောသည်။

ဖားအံမြို့နယ်အတွင်း ဘိလပ်မြေစက်ရုံသစ်များတည်ဆောက်ရေး ဒေသခံများမလိုလား

ကရင်ပြည်နယ်၊ဖားအံမြို့နယ်အတွင်း ဘိလပ်မြေ စက်ရုံသစ်များ တည်ဆောက်လာပါက ဒေသခံများ အတွက် စားဝတ်နေရေးအပြင် သဘာဝပတ်ဝန်းကျင် များကို ပါထိခိုက်လာနိုင်သဖြင့် ထပ်မဆောက်လုပ် ကြရန် ဒေသခံများ အနေဖြင့်သက်ဆိုင်ရာဌာနများသို့ တင်ပြမည်ဟု ဒေသခံများ၏ပြောပြချက်အရ သိရသည်။

"အစိုးရဘက်ပိုင်းကတာဝန်ရှိတဲ့သက်ဆိုင်ရာ ဌာနအသီးသီးကိုတင်ပြမှာပါ။ KNU ဘက်ကိုလည်းအကူအညီ တောင်းဖို့အတွက် စီစဉ်ထားပါတယ်။ ရှိပြီးသားဘိလပ်မြေစက်ရုံတွေကို ရပ်ဆိုင်းဖို့မဟုတ်ပါဘူး။ ဆက်လုပ်ကြပါ။ ဒါပေမယ့်စက်ရုံသစ်တွေတော့ ဆက်မဆောက်စေချင်တော့ပါဘူး။"ဟုဘားအံမြို့နယ် ပရင်းကုန်းကျေးရွာ ကျောင်းထိုင် ဆရာတော် ဦးဝီရိယ က ကေအိုင်စီကို မိန့်ကြားသည်။

စိုးနိုင်ထွန်းကုမ္ပဏီကတန်ချိန်၁၀၀၀၀ခန့် ထုတ်နိုင်မည့်ဘိလပ်မြေစက်ရုံသစ် တည်ဆောက်ရန်အတွက် ဘားအံမြို့နယ်အတွင်းရှိလေထီးတောင်နှင့် လှိုင်းတွန့်တောင်များကိုကုန်ကြမ်းအဖြစ် အသုံးပြုရန်လျာ ထားပြီးအဆိုပါ တောင်များ၏အနီးတဝိုက်တွင် ပရင်းကုန်း၊ နတ်ကုန်း၊ ရသေ့ပျံ၊ ကော့ရင်း၊ ပန်းကုန်း စသည့်ကျေးရွာများ တည်ရှိရာရွာသူရွာသားအများစုသည် တောင်နှင့်တောင်ခြေရှိ လယ်မြေများကို အဓိကမှီခို လုပ်ကိုင် အသက်မွေးဝမ်းကြောင်းပြုကြသည်ဟု သိရသည်။

"ဒေသခံရွာသားတွေဟာ ဒီတောင်တွေစားကျက်မြေတွေလယ်မြေတွေနဲ့ စားဝတ်နေရေးအတွက်မှီခို နေကြရတာဖြစ်တယ်။ စက်ရုံတွေလာဆောက်မယ်ဆိုရင် တောင်တွေပျောက်မယ်။ လယ်တွေရှုံးမယ်။ ဒေသခံတွေစားဝတ်နေရေး ခက်ခဲပြီးဒုက္ခရောက်နိုင်ပါတယ်။"ဟုအဆိုပါဆရာတော်ကဆက်လက်မိန့်ကြား သည်။

စက်ရုံဟောင်းဖြစ်သောအမှတ် (၂) မြိုင်ကလေးဘိလပ်မြေစက်ရုံ တည်ဆောက်စဉ်ကလည်းကျေးရွာပိုင် စားကျက်မြေများဆုံးရှုံးခဲ့ရသည့်အပြင် စက်ရုံအနီးရှိလှာကာရွာမှ အိမ်များထဲတွင်လည်းဖုန်မှုန့်များ နေ့စဉ်ဝင်ရောက်နေသဖြင့် ရွာသူရွာသားအချို့တွင်အသက်ရှူလမ်းကြောင်းနှင့် ဆိုင်သည့်ရောဂါမျိုးဖြစ်နေသည်ကို တွေ့ရှိရကြောင်းဘားအံမြို့သူ သဘာဝပတ်ဝန်းကျင်ထိန်းသိမ်းရေးအဖွဲ့မှ ဦးဆောင်သူနော်လော်သုလော်သာက ဆိုသည်။

"လှာကာရွာကလူတွေဆိုရင်လည်း အသက်ရှုလမ်းကြောင်းလိုရောဂါမျိုးတွေ တွေ့နေရပါတယ်။ ရေမြောင်းတစ်ခု တူးထားတာရှိပါသေးတယ်။ စစချင်းတူးတုန်းက ၁၀ပေကျော်လောက်ဘဲရှိပါတယ်။ အခုဆိုပေ၄၀နီးပါးရှိနေပါတယ်။ ဒီမြောင်းထဲကိုဘယ်လိုရေတွေစွန့်ပစ်သလဲတော့မသိပါဘူး။ မြောင်းရေနဲ့ထိမိရင်ယားပြီးအဖုတွေ ထွက်လာပါတယ်။ ပညာရှင်တွေ လာရောက်စစ်ဆေးပေးရင်ကောင်း မယ်။" ဟုသူမက ရှင်းပြသွားသည်။

ကရင်အမျိုးသားအစည်းအရုံး (KNU)ဗဟိုအလုပ်အမှုဆောင်ဝင် တစ်ဦးဖြစ်သော စောသမိန်ထွန်းကထိုကဲ့သို့ ဒေသခံများ၏ ထိခိုက်နစ်နာမှုများနှင့် ပက်သက်၍ KNU ဆက်ဆံရေးရုံးများသို့ တင်ပြအကူအညီတောင်း ခံနိုင်ကြောင်း မိမိတို့ဘက်မှ ကူညီဆောင်ရွက်ပေးသွားမည်ဖြစ်ကြောင်း ဆိုသည်။

ဘိလပ်မြေစက်ရုံသစ် တည်ဆောက်ရန်ကိစ္စနှင့် ပတ်သက်၍စိုးနိုင်ထွန်းကုမ္မဏီသို့ ဆက်သွယ်မေးမြန်းရာ လက်ထောက်မန်နေဂျာ ဒေါ်ကေသွယ်အောင်မှ အထက်လူကြီးများအား မေးမြန်းပြီးမှသာပြန်လည်ဖြေကြား မည်ဟု ဆိုသည်။

သျှမ်းပါတီ ၂ ခုပူးပေါင်းရေးအတွက် ကျားဖြူပါတီမှ ကော်မတီဖွဲ့စည်း

သျှမ်းပါတီပေါင်းစည်းရေးအတွက် ကျားဖြူပါတီမှ ကော်မတီဖွဲ့စည်း ထားပြီးဖြစ်ကြောင်း၊ မည်သူက ဘာတာဝန်ဆိုတာကိုလည်း ခွဲဝေထားပြီးဖြစ်ကြောင်း ယမန်နေ့ ပြည်နယ်လွှတ်တော်အစည်းအဝေးအပြီး ကျားဖြူပါတီဝင်များတွေ့ဆုံစဉ် ပါတီဥက္ကဌဖြစ်သူ စိုင်းအိုက်ပေါင်း က ပြောသည်ဟုသိရပါသည်။

တာချီလိတ် ကျားဖြူပါတီ နှစ်ပတ်လည်ညီလာခံ

"ဧပြီ ၂ ရက်မနေ့ကလုပ်တဲ့ အစည်းအဝေးမှာ စိုင်းအိုက်ပေါင်းက ညီနောင်တိုင်းရင်းသားပါတီ ၇ ပါတီ ၁၀ ပါတီ နဲ့ပူးပေါင်းပြီးအကောင်းဆုံးဖြစ်အောင်လုပ်သွားဖို့ ပြောတယ်။ အဲဒီမှာ မိုင်းပန်က အမတ် ဦးမိုးကြည်က ထမေးတယ်။ သျှမ်းမှာက ၂ ပါတီ ၃ ပါတီဘဲရှိတယ် ဘာလို့ မပေါင်း နိုင်သေး တာလဲ - ဆိုတော့ ဥက္ကဌကြီးက လဲချားက အမတ် စိုင်းတင်ကိုကော ပါလေရော။ ဘယ်လိုလဲ ခင်ဗျားကို တာဝန် ပေးထားတာခုထိမလုပ်ရ သေး ဘူးလား ဘာညာပေါ့။ အဲတာနဲ့ စိုင်းတင်က - တာဝန်ပေးတယ်ဘဲပြောတာ။ ညွှန်ကြားမှု မှမပေးတာ- လို့ပြန်ဖြေတယ်။  ဂျန္နဝါရီလ တာချီလိတ်အစည်းအဝေးတုန်းက ကော်မတီ ၅ ဦးဖွဲ့ ထားတယ်လေ။ ကျားဖြူနဲ့ကျားခေါင်းပေါင်းစည်းရေး အတွက်ပေါ့နော်။ ကျနော်တို့ ကျားဖြူ ဒု-ဥက္ကဌ စိုင်းဆောင်ဆီက အဲ့ဒီမှာ ဥက္ကဌပေါ့" ဟု  ကျားဖြူပါတီ၏ မိုင်းတုံမြို့နယ်အမတ် စိုင်းဝင်းမြတ်ဦးကပြောသည်။

ယမန်နေ့ ဧပြီလ ၂ ရက် ညနေ ၄ နာရီကကျင်းပသော ကျားဖြူပါတီ တွေ့ဆုံဆွေးနွေးပွဲ၌ ထိုကဲ့သို့ပြောဆိုမှုရှိ ခဲ့ခြင်းဖြစ် သည်။

နှစ်ဦးပိုင်းက တာချီလိတ်၌ကျင်းပသော ကျားဖြူပါတီ နှစ်ပတ်လည်အစည်းအဝေး၌ သျှမ်းပါတီများပူးပေါင်း ရေးအတွက် လှုပ်ရှားမှု ကော်မတီ ၅ ဦးကိုဖွဲ့စည်းလိုက်သည်။ ဦးစိုင်းဆောင်ဆီက ဥက္ကဌဖြစ်ပြီး အဖွဲ့ဝင်များ မှာ လဲချားပြည်သူ့လွှတ်တော်အမတ် စိုင်းမောင်တင်၊ စဝ်ယွန်းပိုင်၊ မိုင်းကိုင်မြို့ပြည်နယ်လွှတ်တော်အမတ် စိုင်းပန်နှင့် အမျိုးသားလွှတ်တော်အမတ် ဦးကျော်ဇောသန်းတို့ဖြစ်ကြောင်း စိုင်းဝင်းမြတ်ဦးကပြောပါသည်။

အဆိုပါ ကော်မတီ မဖွဲ့မီကလည်း ကျားဖြူပါတီစတင်တည်ထောင်ရာတွင်ပါဝင်သော စဝ်ဆိုင်မိန်းပါဝင် သည့်ကော်မတီ ၆ ဦးအဖွဲ့လည်း ဖွဲ့စည်းခဲ့ဖူးကြောင်း ဆိုပါသည်။ သို့သော် တာချီလိတ်နှစ်ပတ်လည် အစည်းအဝေးတွင် စဝ်ဆိုင်မိန်း တက်ရောက်ခြင်းမရှိသဖြင့် ကော်မတီ ပြန်လည်  ဖွဲ့စည်းရာတွင်စဝ်ဆိုင်မိန်း ပါဝင်ခြင်းမရှိခဲ့ကြောင်း ယမန်နေ့အစည်း အဝေး တက်ရောက်သူများက သျှမ်းသံတော်ဆင့်အားပြောပြသည်။

တောင်သူလယ်သမား အကာအကွယ်ပေးရေး ဥပဒေရေးဆွဲ ပြဋ္ဌာန်းမည်

မြန်မာနိုင်ငံတွင် တောင်သူလယ်သမားများကို အကာအကွယ်ပေးသည့် ဥပဒေတရပ်ကို ရေးဆွဲသွားမည်ဖြစ်ပြီး ယင်းဥပဒေတွင် တောင်သူ လယ်သမာများကြုံတွေ့နေရသည့် အကြွေးပြသနာ၊ ဆင်းရဲမွဲတေမှုများကို လျော့ချနိုင်မည့် ပြဋ္ဌာန်းချက်များထည့်သွင်းရေးဆွဲမည်ဖြစ်ကြောင်း သိရှိရသည်။

မြန်မာနိုင်ငံလူဦးရေ၏ ၇၀ ရာခိုင်နှုန်းခန့်မှာ ကျေးလက်နေပြည်သူများဖြစ်ပြီး တောင်သူလယ်သမား လူတန်းစား အများစုပါဝင်နေကြောင်း၊ လက်ရှိတွင် တောင်သူလယ်သမားများသည် အကြွေး သံသရာလည်နေပြီး ဆင်းရဲမွဲတေမှုများကို ရင်ဆိုင်နေရကြောင်း၊ တောင်သူလယ်သမားများကို အကာအကွယ် ပေးမည့်ဥပဒေတရပ်ကို လွှတ်တော်က ရေးဆွဲ ပြဋ္ဌာန်းရန် စီစဉ်နေပြီး ယင်းဥပဒေတွင် တောင်သူလယ်သမား များ ကြုံတွေ့ရသည့် ပြသနာများကို လျော့ပေါ့ပေးနိုင်မည့် ပြဋ္ဌာန်းချက်များ ပါဝင်မည်ဖြစ်ကြောင်း ဧပြီလ ၁ ရက်နေ့ နေပြည်တော်၊ ပြည်သူ့လွှတ်တော်အဆောက်အအုံတွင် ကျင်းပခဲ့သော တောင်သူလယ်သမားအကာအကွယ်ပေးရေးဥပဒေဆိုင်ရာ ဆွေးနွေးပွဲ တက်ရောက် ခဲ့သူ မြန်မာနိုင်ငံဆန်စပါးအသင်းချုပ်ဥက္ကဋ္ဌဦးချစ်ခိုင်က ပြောသည်။

"လယ်သမားတွေရဲ့အကြွေးတွေလျော့ပြီးဆင်းရဲမှုလျော့ချနိုင်ဖို့အတွက်ဥပဒေထဲမှာထည့်သွင်းရေးဆွဲသွားမှာပါ။ စိုက်ပျိုးရေးသီးနှံတွေနဲ့ပတ်သက်လို့ သူတို့ဝင်ငွေကောင်းလာဖို့ တွက်ခြေကိုက်မယ့် ဈေးနှုန်း တွေဖြစ်ဖို့ကိုလည်း ဥပဒေထဲမှာထည့်သွားမှာပါ"ဟု ဦးချစ်ခိုင်က ဆိုသည်။

အစိုးရခေတ်အဆက်ဆက်တွင် တောင်သူလယ်သမားများသည်  စိုက်ပျိုးရေးစီမံချက်များအရ အစိုးရက စေခိုင်းသော စိုက်ပျိုးရေးသီးနှံများကို ရာသီအလိုက်စိုက်ပျိုးရခြင်း၊ ပွင့်လင်းမြင်သာသော ဈေးကွက် စီးပွားရေးစနစ် ဖြစ်ထွန်းလာမှု မရှိခြင်း၊ လယ်ယာမြေပိုင်ဆိုင်ခွင့်မရှိခဲ့ခြင်း အပါအ၀င် ပြသနာများစွာ ကြောင့် ခေတ်အဆက်ဆက် ဆင်းရဲနိမ့်ကျခဲ့ပြီး ဆင်းရဲမှုနှုန်းမြင့်တက်နေကြောင်း လယ်သမားများ၏ အရေး ဆောင်ရွက်ပေးနေသူ ရှေ့နေဦးမြင့်သွင်က ပြောသည်။

"အစိုးရက စပါးစိုက်ရမယ်၊ ငရုတ်စိုက်ရမယ် ဆိုပြီး ရာသီအလိုက် စိုက်ပျိုးခိုင်းတဲ့သီးနှံတွေကို တောင်သူက စိုက်ရတယ်။ အစိုးရစနစ်ကကြိုးကိုင်တဲ့ အပေါ်မူတည်ပြီး  စိုက်ပျိုးရေး လုပ်နေရတယ်။ တကယ်ဆိုရင် ဈေးကွက်တွက်ခြေ ကိုက်တဲ့သီးနှံကို တောင်သူတွေရဲ့ လွတ်လပ်တဲ့ ဆန္ဒအရ စိုက်ပျိုးခွင့်၊ရောင်းချခွင့်တွေပေးရမယ်"ဟု ၎င်းက ဆိုသည်။

အစိုးရ၏ မြန်မာ့စိုက်ပျိူးရေးဘဏ်က တောင်သူများကို ချေးငွေများ ထုတ်ချေးသော်လည်း ဆင်းရဲမွဲတေမှုနှင့် အကြွေးသံသရာလည်မှုကို မဖြေရှင်းနိုင်ကြောင်း၊ တောင်သူများ တွက်ခြေကိုက်မည့် ဆန်စပါးအခြေခံဈေးနှုန်းကိုသတ်မှတ်ပေးမှသာလျှင် တောင်သူလယ်သမားများ ပိုမိုအဆင်ပြေနိုင် တွံ့တေးမြို့နယ်၊သ၀န်းတောကျေးရွာမှ တောင်သူဦးဌေးကြွယ် က ပြောသည်။

"စိုက်ဘဏ်ကချေးငွေက စိုက်ပျိုးစရိတ်အတွက်  မသုံးရဘူး။ အပြင်ကအကြွေးတွေ ကိုရှင်းနေရတာ။ အခုက လယ်သမားတိုင်းအဆင်မပြေကြ ဘူး။ တရုတ်နိုင်ငံကလည်း ဓာတ်မြေသြဇာသုံးတာများ လို့ဆိုပြီး ဒီကဆန်စပါးကို မ၀ယ်ဘူး။ ၀ယ်လိုအားနည်းပြီး ရောင်းလိုအားများနေတော့ အခြေခံဈေးနှုန်း မသတ်မှတ်ရင် ဘယ်လိုမှ အဆင်မပြေဘူး။ ဘယ်လိုမှတွက်ခြေ မကိုက်ဘူး"ဟု တောင်သူဦးဌေးကြွယ်က ဆိုသည်။

မြန်မာနိုင်ငံတောင်သူလယ်သမားအသင်း ဥက္ကဋ္ဌ ဒေါက်တာစိုးထွန်းကမူ တောင်သူလယ်သမားများ၏ ဆင်းရဲမှုနှုန်း လျှော့ချရေးအတွက်နှစ်ရှည်ချေးငွေများ ကိုအတိုးနှုန်းသက်သာစွာ ထုတ်ချေးရန် လိုအပ်ပြီး ၊စိုက်ပျိုးသီးနှံများ ရာသီဥတုကြောင့်ပျက်စီးဆုံးရူံးမှု အတွက်အာမခံသည့် စနစ် အကောင်အထည်ဖော်ခြင်း အပါအ၀င် လယ်သမားများ၏ဘ၀ သက်သာချောင်ချိရေးကို ဦးတည်သော ပြဋ္ဌာန်းချက်များ ဥပဒေတွင် ပါဝင်သည့်ဟု အကြံပြုသည်။

တောင်သူလယ်သမားများ၏ဆင်းရဲနွမ်းပါးမှုနှုန်း ကို လျှော့ချရန် အစိုးရတခုတည်းဖြင့် မလုပ်ဆောင်နိုင်ဘဲ အရပ်ဖက်အဖွဲ့အစည်းများနှင့်  တရားဝင်ပူးပေါင်းဆောင်ရွက်ရန်  အလွန်အရေးကြီးသည်ဟု ရှေ့နေ ဦးမြင့်သွင်က ဆိုသည်။

"ဆင်းရဲနွမ်းပါးမှုလျှော့ချဖို့အစိုးရက အကုန်လိုက် လိုက်မလုပ်ပေးနိုင်ဘူး ။ ဟိုးအောက်ခြေထိ ဆင်းနိုင်ဖို့ဆိုရင်၊ အောက်ခြေက အခြေအနေတွေကို သိနိုင်ဖို့ဆိုရင်  အစိုးရမဟုတ်တဲ့ ပြည်တွင်းပြည်ပ အဖွဲ့အစည်းတွေနဲ့ ပူးပေါင်းဆောင်ရွက်သင့်တယ်" ဟု ဦးမြင့်သွင်က ရှင်းပြသည်။

နေပြည်တော်တွင် ဧပြီလ ၁ ရက်နေ့က ကျင်းပခဲ့သော တောင်သူလယ်သမားအကာအကွယ်ပေးရေး ဥပဒေ ရေးဆွဲရေး ညှိုနှိုင်း ဆွေးနွေးပွဲသို့ ပြည်သူ့လွှတ်တော်ဥက္ကဋ္ဌ သူရဦးရွှေမန်း၊ အမျိုးသား ဒီမိုကရေစီ အဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်တို့အပါအ၀င် အစိုးရဌာနဆိုင်ရာများ၊ တောင်သူ လယ်သမားနှင့် ဆန်စပါးအသင်းများ၊ တောင်သူလယ်သမားများတက်ရောက်ခဲ့ကြပြီး ဒေါ်အောင်ဆန်း စုကြည်က လည်း  ဥပဒေရေးဆွဲရေးအတွက် တက်တက်ကြွကြွ ပါဝင်ဆွေးနွေးခဲ့ကြောင်း သိရှိရသည်။

ရခိုင်ရိုးရာသင်္ကြန်ပွဲ သုဝဏ္ဏကွင်းတွင် ပြောင်းရွှေ့ ကျင်းပမည်

ရန်ကုန်မြို့ သိမ်ဖြူအားကစားကွင်း၌ နှစ်စဉ် ကျင်းပလေ့ရှိသော ရခိုင်ရိုးရာ သင်္ကြန်ပွဲတော်အား ယခုနှစ်တွင် သုဝဏ္ဏ အားကစားကွင်းသို့ ပြောင်းရွှေ့ ကျင်းပသွားမည်ဟု သိရသည်။

ယခုနှစ် ကျင်းပမည့် ရခိုင်သင်္ကြန်ပွဲတော်သည် ၁၀ ကြိမ်မြောက်ဖြစ်ပြီး ၁၉၉၄ ခုနှစ်မှစ၍ ရန်ကုန်မြို့၌ ရခိုင်ပြည်နယ်တခုလုံး ကိုယ်စားပြု၍ အစဉ်လာအတိုင်း ကျင်းပခဲ့သည်။ ၂၀၁၃ ခုနှစ် ဧပြီလ ၁၂ ရက်နေ့တွင် နံ့သာသွေးပွဲ၊ ဧပြီလ ၁၃ ရက်နေ့ နံနက် ၉ နာရီတွင် ဘုရား ရေသပ္ပာယ် ပွဲတို့ကို ကျင်ပးမည်ဖြစ်ကာ သင်္ကြန်ပွဲတော်ဖွင့်ပွဲကို သုဝဏ္ဏ အားကစားကွင်း၌ ၁၄ ရက်နေ့တွင် ကျင်းပမည်ဖြစ်ကြောင်း သိရသည်။

နံ့သာသွေးပွဲနှင့် ဘုရား ရေသပ္ပာယ်ပွဲကို ရွှေတိဂုံစေတီတော် ရင်ပြင်တော်ရှိ ရခိုင်ပြည်နယ် ဓမ္မာရုံတွင် ကျင်းပမည် ဖြစ်ကြောင်း၊ ထိုအခမ်းအနားသို့ ရန်ကုန်တိုင်း ၀န်ကြီးချုပ်နှင့် အစိုးရအဖွဲ့ဝင်များ၊ လူမှုအဖွဲ့များမှ ဧည့်သည်တော်များကိုလည်း ဖိတ်ကြားထားသည့်အတွက် လုံခြုံရေးအရ ဓမ္မာရုံသို့ ပြောင်းရွှေ့ ကျင်းပရခြင်းဖြစ်ကြောင်း ရခိုင်ရိုးရာ သင်္ကြန်ပွဲတော် ဖြစ်မြောက်ရေး ကော်မတီ နာယက ဒေါ်စောခင်တင့်က ဧရာဝတီသို့ ပြောသည်။

"လက်ရှိဖြစ်နေတဲ့ ပဋိပက္ခတွေကြောင့် လုံခြုံရေးအရ တခုခုဖြစ်ရင် အခမ်းအနားကို ထိခိုက်မှာ စိုးရိမ်တဲ့အတွက် နံ့သာသွေးပွဲနဲ့ ဘုရား ရေသပ္ပာယ်ပွဲကို ဓမ္မာရုံမှာပဲ ကျင်းပဖို့ စီစဉ်တာပါ။ တခြား အစီအစဉ်တွေတော့ နှစ်တိုင်းလိုပဲ ကွင်းထဲမှာ ရိုးရာ အစဉ်အလာမပျက် ကျင်းပသွားမှာပါ" ဟု ၎င်းက ဆိုသည်။

လုံခြုံရေးအတွက် CCTV ကင်မရာများ တပ်ဆင်၍ မိမိတို့ အစီအစဉ်ဖြင့်လည်း လုံခြုံရေး ဆောင်ရွက်သွားမည် ဖြစ်ကြောင်း၊ သုဝဏ္ဏကွင်းကိုလည်း ရန်ကုန်တိုင်း အစိုးရအဖွဲ့က ကူညီဆောင်ရွက်ပေးခြင်း ဖြစ်ကြောင်း ဒေါ်စောခင်တင့်က ပြောသည်။

သိမ်ဖြူ အားကစားကွင်းအား နိုင်ငံတကာအဆင့် အားကစားပွဲတော်များ ကျင်းပနိုင်ရန် ကြိုတင် ပြင်ဆင်မှုများ ဆောင်ရွက်နေခြင်းကြောင့် သုဝဏ္ဏကွင်းသို့ ပြောင်းရွှေ့ ကျင်းပရခြင်း ဖြစ်ကြောင်း၊ နေရာပြောင်းသွားသည့်တိုင် အစီအစဉ်များ အားလုံးကို  အပြောင်းအလဲ မရှိဘဲ ကျင်းပသွားမည်ဖြစ်ပြီး လာမည့်နှစ်တွင်မူ သုဝဏ္ဏကွင်း၌ပင် အစအဆုံး ခမ်းနားစွာ ကျင်းပသွားမည်ဟု သိရသည်။

သို့သော် ပွဲတော်အတွင်း ရောင်းရမည့် ရခိုင်ရိုးရာ အစားအစာများ၊ မြန်မာ အစားအစာများနှင့် တခြား အစားအစာများ ရောင်းချမည့် ဆိုင်ခန်း အရေအတွက်သည် ယခင်နှစ်များတွင် ၅၀ ၀န်းကျင်အထိ ရှိခဲ့သော်လည်း ယခုနှစ်တွင် ဆိုင်ခန်း ၃၀ သာရှိမည်ဟု ဖြစ်မြောက်ရေး ကော်မတီအဖွဲ့က ဆိုသည်။ ယခုနှစ် သင်္ကြန်ပွဲတော်အား ရန်ကုန်တိုင်း အစိုးရ၊ ရခိုင် တိုင်းရင်းသားရေးရာ ၀န်ကြီးဌာနက ဦးဆောင် ကျင်းပမည် ဖြစ်သည်။

ရခိုင်သင်္ကြန်ဖွင့်ပွဲရက်နှင့် တခြားရက်များတွင် ရခိုင်အဆိုတော်များ၊ ရခိုင်အနုပညာရှင်များ၊ လေးဝတီအဖွဲ့၊ ရခိုင်ယဉ်ကျေးမှု အဖွဲ့များ စသည့် အနုပညာရှင်များကလည်း ပါဝင်ဖျော်ဖြေကြမည် ဖြစ်သည်။ ရခိုင်သင်္ကြန်ပွဲတော်သို့ ပါဝင်ဆင်နွဲလိုကြသည့် သူများကို ၀င်ကြေးအဖြစ် တဦးလျှင် ၅၀၀ ကျပ် သတ်မှတ်ထားသော်လည်း အခက်အခဲရှိသူများကိုမူ အခမဲ့ ပါဝင်ဆင်နွှဲနိုင်ရန် စီစဉ်ပေးထားသည်။

ရခိုင်သင်္ကြန်ပွဲတော်တွင် ရခိုင်ပြည်နယ်မှ မြို့နယ်အလိုက် ကိုယ်စားပြုသည့် ရေလောင်းမဏ္ဍာပ်များ ပါဝင်မည်ဖြစ်ကာ  မဏ္ဍာပ်တိုင်း၌ ရခိုင်ရိုးရာအတိုင်း လောင်းလှေများတွင် ရေထည့်ပြီး ရေလောင်းပွဲ ကျင်းပမည်ဖြစ်သည်။

ရခိုင်ရိုးရာ သင်္ကြန်ပွဲတော်အား ရခိုင်တပြည်လုံး၌ တပြိုင်တည်း ကျင်းပလေ့ရှိပြီး ရန်ကုန်မြို့၌ သိမ်ဖြူကွင်း၌လည်း ရခိုင် ပြည်နယ်တခုလုံး ကိုယ်စားပြုကျင်းပလေ့ ရှိသည်။ ရန်ကုန်မြို့တွင်းနှင့် အလှမ်းဝေးကွာသော လှိုင်သာယာ၊ သံလျင်၊ ရွှေပြည်သာ၊ မင်္ဂလာဒုံ စသည့် မြို့နယ်များတွင်လည်း ရခိုင်သင်္ကြန်မဏ္ဍပ်များ တည်ဆောက်၍ ရိုးရာအစဉ်အလာအတိုင်း စည်ကားစွာ ကျင်းပလေ့ရှိသည်။

ထို့အတူ ထိုင်းနိုင်ငံ၊ မလေးရှား၊ စင်ကာပူ၊ အိန္ဒိယ၊ ဘင်္ဂလားဒေ့ရ်ှရောက် ရခိုင်လူမျိုးများကလည်း မိမိတို့နေထိုင်ရာ မြို့များ၌ ရခိုင်ရိုးရာ အတိုင်းကျင်းပလေ့ရှိပြီး၊ အမေရိကန်၊ ဥပေရောပ နိုင်ငံတချို့တွင်လည်း ၎င်းတို့နိုင်ငံ၏ ရာသီဥတု အပေါ်မူတည်၍ ကျင်းပလေ့ရှိကြသည်။

ရခိုင်ရိုးရာ သင်္ကြန်ပွဲတော်သည် ဓည၀တီပြည့်ရှင် ဘုရင် စန္ဒာသူရိယမင်းကြီးက မဟာမုနိ ဗုဒ္ဓရုပ်ရှင်တော်မြတ်အား အမွှေးနံ့သာရည် ပက်ဖျန်း၍ မျက်နှာတော် ဖွင့်ပေးခဲ့ရာမှ စတင်ကာ နှစ်စဉ် ကျင်းပလာခဲ့ကြောင်း ရခိုင်သမိုင်း မှတ်တမ်းများအရ သိရသည်။ ရခိုင်ရိုးရာ သင်္ကြန်သည် ဗုဒ္ဓဘုရားအား ပထမဦးစွာ အမွှေးနံ့သာရည်ဖြင့် ရေသပ္ပာယ်ပြီးမှသာ လူအချင်းချင်း ရေပက်ကစားရသည့် ဓလေ့ရှိသည်။

ငွေကျပ် ၁၅၀၀ တန် ဖုန်းကတ် အကန့်အသတ်ဖြင့်သာ ရောင်းမည်

မြန်မာ့ဆက်သွယ်ရေးလုပ်ငန်းက ဧပြီလ ၂၄ ရက်နေ့မှစတင်ပြီး ငွေကျပ် ၁၅၀၀ တန် မိုဘိုင်းလ် ဖုန်းကတ်များ ကိုရောင်းချပေးမည်ဖြစ်သော်လည်း စတင်ရောင်းချချိန်တွင် ပြည်နယ်နှင့် တိုင်းအားလုံးသို့ ဖုန်းကတ် အရေအတွက် အကန့်အသတ်ဖြင့်သာ ရောင်းချပေးမည်ဖြစ်ကြောင်း သတင်း ရရှိသည်။

လတ်တလောအနေအထားတွင် တနိုင်ငံလုံးလွှမ်းခြုံနိုင်သော ဆက်သွယ်ရေးကွန်ရက်၊စက်ပစ္စည်းနှင့် ဆက်သွယ်ရေးဆိုင်ရာ အခြေခံအဆောက်အအုံများ အပြည့်အ၀ တပ်ဆင် နိုင်ခြင်း မရှိသေး သည့်အတွက် ဖုန်းကတ်အရေအတွက်ကို အကန့်အသတ်ဖြင့်သာ ချထား ပေးနိုင် ခြင်းဖြစ်ပြီး တလလျှင် CDMA 800 MHZ  နှင့် WCDMA 3 G စနစ်သုံး ဖုန်းကတ် အရေအတွက် ၃၅၀၀၀၀ ကတ်သာ ချထားပေးမည် ဖြစ်ကြောင်း မြန်မာ့ ဆက်သွယ်ရေး လုပ်ငန်းမှ သိရှိရသည်။

"တနိုင်ငံလုံးကို တလ ဖုန်းကတ် ၃ သိန်းခွဲ ထုတ်ရောင်းမယ်။ပြည်နယ်နဲ့တိုင်းတခုချင်းစီ အလိုက် သူ့ အချိုးအစား တခု ရလိမ့်မယ်။ ဥပမာ- ရန်ကုန်တိုင်းတခုလုံးအတွက် တလကို ဖုန်းကတ် ၅ သောင်းလောက် ရရင်လည်း ရမှာပေါ့ဗျာ။

လစဉ်လတိုင်းအထိ အရေအတွက် ကတော့ အကန့်အသတ်ရှိမယ်"ဟု မြန်မာ့ဆက်သွယ်ရေးလုပ်ငန်းမှ မိုဘိုင်းလ် အင်ဂျင်နီယာချုပ် ဦးဌေးဝင်းက ဧရာဝတီသို့ ပြောသည်။

ဖုန်းကတ်များကို ရောင်းချရာတွင်  ပြည်နယ်နှင့် တိုင်းဒေသကြီး အစိုးရအဖွဲ့များက တိုက်ရိုက် ကွပ်ကဲ စီစဉ်ရောင်းချမည်ဖြစ်ကြောင်း အင်ဂျင်နီယာချုပ်ဦးဋ္ဌေးဝင်းက ဆိုသည်။

ရန်ကုန်တိုင်းဒေသကြီးအစိုးရ၊ အထွေထွေအုပ်ချုပ်ရေးဦးစီးဋ္ဌာန ဒုတိယညွှန်ကြားရေးမှူး ဦးအောင်ကျော်စိုးက ဖုန်းကတ်များကို တိုင်းဒေသကြီးအစိုးရက စီမံကွပ်ကဲရောင်းချမည်မှာ မှန်ကန်သော်လည်း မည်သို့မည်ပုံ ရောင်းချရမည်ကို ညွှန်ကြားချက်တစုံတရာမရရှိသေးကြောင်း ဧရာဝတီသို့ ရှင်းပြသည်။

အစိုးရက မိုဘိုင်းလ်ဖုန်းကတ်များကို ငွေကျပ် ၁၅၀၀ ဖြင့် ရောင်းချမည်ဟု ကြေညာလိုက်သည့်အပေါ် ပြည်သူများက ကြိုဆိုလိုက်ကြသော်လည်း ဖုန်းကတ်အရေအတွက်အကန့်အသတ်ရှိသည့်အတွက် ဖုန်းကတ် ၀ယ်ယူမရမည်ကို စိုးရိမ်လျက်ရှိကြသည်။

"ဖုန်းကတ်ဈေးက ၁၅၀၀ ပေမယ့် အရေအတွက် အကန့်အသတ်ရှိတော့ ဘယ်လိုလုပ်မလဲ။ ကိုယ်ဝယ်တဲ့အချိန်မှာ ရပါ့မလား။ မှောင်ခိုဈေးကွက် ကတော့ ဖြစ်လာဦးမယ်လို့ထင်တယ်။ ရန်ကုန်လူဦးရေ ခြောက်သန်းရှိတယ်။ အဲဒီခြောက်သန်းလုံးအတွက် ဘယ်လိုလုံလုံလောက်လောက်ရနိုင်မလဲ။ မှောင်ခိုဈေးကွက်နဲ့ ဖုန်းကတ်ဈေးကြီးပေးဝယ်ရတာတွေတော့ လောလောဆယ် ဖြစ်နေဦးမယ်ထင်တယ်" ဟု ရန်ကုန်မြို့ခံတဦးက ဆိုသည်။

ငွေကျပ် ၁၅၀၀ ဖြင့် ရောင်းချမည့် ဖုန်းကတ် များကြောင့် ဖုန်းဟန်းဆက်ဈေးကွက် သိသိသာသာ လှုပ်ရှား မည်ဖြစ်ပြီး ဈေးနှုန်းများ မြင့်တက်ဖွယ်ရှိသည်ဟု ရန်ကုန်မြို့အပါအ၀င် နိုင်ငံတ၀န်း ဟန်းဆက် အရောင်းဆိုင်များဖွင့်လှစ်ထားသော  လူကြီးမင်း မိုဘိုင်းဖုန်းဆိုင်မှမန်နေဂျာ ဦးကိုကိုအောင်က ပြောသည်။

"ဟန်းဆက်က ဈေးကွက် မာလာလိမ့်မယ်။ဆိုင်တော်တော် များများက ကတ်ထွက်လာရင် ရောင်းဖို့ ဆိုပြီး တော့ GSM တွေ ၀ယ်ထားကြတာ။အခုက CDMA 800 ဖုန်းကတ်တွေ ရောင်းမှာဆိုတော့ အဲဒီ ဟန်းဆက် ကို ပြန်လိုက်ဝယ်တဲ့ သဘော ဖြစ်တာပေါ့။ဈေးနှုန်းတွေကတော့တသိန်းအောက်လည်း ရှိမယ်။ တသိန်းအထက်လည်း ရှိမယ်"ဟု ဦးကိုကိုအောင်က  ဆိုသည်။

အစိုးရက ရောင်းချမည့် ဖုန်းကတ်များသည် ဖုန်းခေါ်ဆိုခ တမိနစ်လျှင် ငွေကျပ် ၅၀ သတ်မှတ်ထားပြီး ဖုန်းအ၀င်အတွက် ငွေကြေးကုန်ကျမည်မဟုတ်ကြောင်း၊ နယ်ဒေသများတွင် ချထားပေးမည့် WCDMA 3G များတွင် အင်တာနက်လိုင်းပါး တပါတည်း ပါဝင်မည်ဖြစ်ကြောင်း အင်ဂျင်နီယာချုပ်ဦးဌေးဝင်း၏အဆိုအရ သိရှိရသည်။

အစိုးရက မိုဘိုင်းလ်ဖုန်းစီမံချက်အသစ်ကို ထပ်မံရေးဆွဲလိုက်ပြီး ၂၀၁၃-၂၀၁၄ ခုနှစ်တွင် မိုဘိုင်းလ်ဖုန်း လိုင်း ၈ သန်း၊ ၂၀၁၄-၂၀၁၅ ခုနှစ်တွင် ၁၈ သန်းတိုးချဲ့မည်ဖြစ်ပြီး အစိုးရသက်တမ်းကုန်ဆုံးသည့်အချိန်အထိ မိုဘိုင်းလ်ဖုန်း လိုင်း ၂၆ သန်းချထားပေးမည်ဖြစ်ကြောင်း မြန်မာ့ဆက်သွယ်ရေးလုပ်ငန်းထံမှ သိရှိရသည်။