Saturday, May 25, 2013

ပုံတောင်ပုံညာ ဒေသများတွင် မိုးရွာသွန်းမှုကြောင့် ပခုက္ကူနှင့် ပေါက်မြို့နယ်တို့ရှိ သဲချောင်းများတွင် တောင်ကျရေများ စတင်ကျဆင်း


5.25.20

လမ်းကြိတ်စက် တင်ဆောင်လာသည့် ဆောက်လုပ်ရေးလုပ်ငန်းသုံး ကားကြီးတစ်စီး သီးခြောက် သဲချောင်းကိုဖြတ်သန်းစဉ် (ဓာတ်ပုံ - အောင်ဇော်ထွန်း)

မကွေးတိုင်း ဒေသကြီးအတွင်းရှိ ပုံတောင် ပုံညာဒေသများတွင် မိုးရွာသွန်းမှုကြောင့် ပခုက္ကူ၊ ပေါက်မြို့နယ် စသည့် မြို့နယ်များရှိ သဲချောင်းများတွင် မေ ၂၀ ရက် ၀န်းကျင်မှ စတင်ပြီး တောင်ကျချောင်းရေများ စတင်ကျဆင်းနေပြီ ဖြစ်ကြောင်း အဆိုပါ ဒေသခံများ၏ ပြောပြချက်အရ သိရသည်။

ယင်းဒေသများရှိ သဲချောင်းများတွင် နှစ်စဉ် မေလကုန်ဝန်းကျင်မှ စတင်ပြီး ယခုကဲ့သို့ တောင်ကျရေများ ကျဆင်းတတ်ခြင်းဖြစ်ပြီး ယခုနှစ်တွင် မေလ ၁၉ ရက်နေ့မှ စတင်ကျဆင်းခြင်း ဖြစ်ကြောင်း ပေါက်မြို့နယ် ရှခွကြီးကျေးရွာမှ ဦးခင်အောင်လေးက ပြောကြားသည်။

''ဦးတို့ဆီမှာ မိုးမရွာလဲ အထက်ဘက်မှာရှိတဲ့ ပုံတောင်ပုံညာက တောင်တွေပေါ်မှာ မိုးရွာရင် ဦးတို့ဆီက သဲချောင်းတွေဆီ ချောင်းရေကျတာပဲ၊ နှစ်စဉ်မေလနှောင်းပိုင်းတွေ လောက်ဆိုရင် ဒီလိုတောင်ကျရေတွေ ကျတာပဲ၊ ချောင်းတွေက ချောင်းခြောက်တွေ များပါတယ်။ အပေါ်ပိုင်းမှာ မိုးများရင် များသလို ချောင်းရေကျချိန် ကြာတတ်တယ်၊ ပုံမှန်ကတော့ နှစ်နာရီ ၀န်းကျင်လောက်တော့ ကြာတာပေါ့'' ဟု ဦးခင်အောင်လေးက ဆိုသည်။

ပခုက္ကူနှင့် ပေါက်မြို့နယ်အကြား ဆက်သွယ်ထားသည့် မော်တော်ကားလမ်းသည် ပေ ၂၀ မှ ပေ ၂၀၀၀ ကျော်အကြား ကျယ်ဝန်းသော သဲချောင်းစုစုပေါင်း သုံးဆယ်ဝန်းကျင်ကို ဖြတ်သန်းရပြီး ထိုသို့ သဲချောင်းများအတွင်း တောင်ကျရေများ ကျဆင်းပါက သွားရေးလာရေး ခက်ခဲကြောင်း သိရသည်။ ပုံတောင်ပုံညာ ဒေသတွင် မိုးရွာသွန်းမှုများပြားလျှင် ချောင်းများသာမက အဆိုပါဒေသများရှိ ကျေးရွာများတွင်ပါ ရေလွှမ်းမိုးမှုများ ရှိခဲ့ကြောင်းနှင့် ထိုနှစ်များတွင် လူသေဆုံးမှုများပင် ဖြစ်ပွားခဲ့ကြောင်း သိရသည်။

''ဒီဒေသက လူတွေကတော့ သဲချောင်းတွေရဲ့ အထာကို သိနေတော့ သွားရေးလာရေး သိပ်မခက်ဘူး။ တစ်ခါမှ မရောက်ဖူးတဲ့ လူတွေကျတော့ ချောင်းရေကျရင် ဖြတ်ဖို့အဆင်မပြေဘူး။ ကျွန်တော်တို့အနေနဲ့ သဲချောင်းရေ ကျပြီဆိုရင် ကားတွေကို ကူညီပြီး လမ်းပြပေးပါတယ်။ စေတနာရှိလို့ ပိုက်ဆံပေးရင် ယူပါတယ်။ တကယ်လို့ ကားတွေ သဲနစ်တယ်ဆိုရင်လဲ လူအင်အားသုံးပြီး ဆွဲထုတ်ပေးပါတယ်။အဲဒီအခါကျရင်တော့ ကျသင့်တဲ့ အခကြေးငွေ ယူပါတယ်'' ဟု ကမ်းပါးဖြူချောင်းတွင် မော်တော်ယာဉ်များကို လမ်းပြပေးနေသည့် ကိုဇော်ဦးက ဆိုသည်။

ပခုက္ကူနှင့် ပေါက်မြို့နယ်ကြားရှိ ကျောချောင်း၊ သီးခြောက်ချောင်း၊ ရေပြာချောင်း၊ မုံဘို့ချောင်း၊ ဆင်ပေါက်လှချောင်း၊ ရှခွလေးချောင်းစသည့် သဲချောင်း ၃၃ ချောင်းရှိကြောင်း သိရသည်။

ပုံမှန်သဲချောင်းများသည် နွေကာလတွင် ရေပြတ်လပ်သော်လည်း ကျောချောင်း၏ အချို့နေရာများတွင် တပေါင်းလမှလွဲ၍ ရေပုံမှန် စီးဆင်းလျက်ရှိကြောင်းနှင့် အချို့နှစ်များတွင် တစ်နှစ်ပတ်လုံး ရေစီးဆင်းသည့် ကာလများလည်း ရှိကြောင်း သိရသည်။ ထိုသို့ တောင်ကျရေများ ကျဆင်းချိန်တွင် ပုံမှန်မိုးရေချိန် ရွာသွန်းပါက နှစ်နာရီဝန်းကျင်ခန့်သာ စောင့်ဆိုင်းရသော်လည်း မိုးဆက်တိုက် ရွာသွန်းမှုရှိပါက တစ်ရက်မှ သုံးရက်ခန့်အထိ စောင့်ဆိုင်းဖြတ်သန်း ရသည်များလည်း ရှိကြောင်း ဒေသခံများက ပြောကြားခဲ့သည်။

No comments:

Post a Comment

စာဖတ်သူများကွန်မန်.ပေးနိုင်ပါသည်။