ကိုမင်းလွင်၊ ကိုစိုးလင်း(အနကလ)နှင့် ကိုဇာနည်အောင်တို့ကို Eleven Media Group ၏ ၁၁-၁၁-၁၁ (၁) ခြောက်လုံး ဆုံသည့်နေ့ အထိမ်းအမှတ် ဂုဏ်ပြုဆုတောင်းပွဲ အခမ်းအနားတွင် တွေ့ရစဉ်
၁၉၈၈ ခုနှစ်ပြည်သူ့အရေတော်ပုံကြီးအပြီးတွင် မြန်မာနိုင်ငံနယ်စပ်စခန်းများရှိ လက်နက်ကိုင်အဖွဲ့အစည်းများ ရှိရာသို့ ကျောင်းသားလူငယ်များ ၎င်းတို့၏နိုင်ငံရေးယုံကြည်ချက်ကိုအကောင်အထည်ဖော်ရန် သွားရောက်ခဲ့မှု များရှိခဲ့ပါသည်။ ABSDF ဆိုသည့် မြန်မာနိုင်ငံလုံးဆိုင်ရာ ကျောင်းသာများဒီမိုကရက်တစ်တပ်ဦးကို ဖွဲ့စည်းတည်ထောင်ခဲ့ပြီး ဒီမိုကရေစီ ရရှိရန် ကြိုးပမ်းခဲ့ကြသည်။ ထိုကဲ့သို့ကြိုးပမ်းနေစဉ် ကချင်ပြည်နယ် ၀ိုင်းမော်မြို့နယ် ပါဂျောင်ဒေသ၌ ကျောင်းသားအချင်း ချင်း တပ်မတော်ထောက်လှမ်းရေးမှဟုစွပ်စွဲကာညှင်းပန်းသတ်ဖြတ်ခဲ့မှုဖြစ်စဉ်များပေါ်ပေါက်ခဲ့ပါသည်။ အဆိုပါစွပ်စွဲ သတ် ဖြတ်မှုမှာ မြောက်ပိုင်းဒေသဟုခေါ်တွင်နေသည့် ပါဂျောင် ဒေသမှသည် တောင်ပိုင်းဟုခေါ်သည့် မာနယ်ပလောဒေသသို့ပါ ကူးစက်သွားခဲ့သည်။ မြောက်ပိုင်းဒေသမှ နှိပ်စက်သတ်ဖြတ်မှုများနှင့် ပတ် သက်ပြီး နှစ်ပေါင်း ၂၀ ကာလကျော်လွန်ခဲ့ပြီး နောက် ရှုထောင့် အသီးသီးမှ ပြောဆိုမှုများပေါ်ထွက်လာခဲ့သည်။ ထို့ကြောင့် မြောက်ပိုင်းဒေသမှ ဗဟိုညီလာခံတက်ရောက် ရန် တောင်ပိုင်းဒေသသို့သွားရောက်ရင်း ထောက်လှမ်းရေးဟူသောစွပ်စွဲချက်ဖြင့် ဖမ်းဆီးခံရကာ စစ်ဆေး နှိပ်စက်ခံရပြီး ABSDF စစ်ကော်မတီ၏ ထောင်ဒဏ် ၁၀ နှစ်အပြစ်ပေးခြင်းခံခဲ့ရသူ ကိုစိုးလင်းနှင့်တွေ့ဆုံပြီး ထိုစဉ်ကကြုံတွေ့ခဲ့ရသော အဖြစ်အပျက်များကိုမေးမြန်းခဲ့သည်များအား ပြန်လည်တင်ပြအပ်ပါသည်။
မေး - ၈၈ အရေးအခင်းအပြီးမှာ နယ်စပ်ကိုဘယ်လိုရောက်သွားခဲ့တာလဲဆိုတာက စပြီးရှင်းပြပေးပါလား။
ဖြေ - ၈၈ ကာလမှာတုန်းကတော့ မန္တလေးသပိတ်တပ်ပေါင်းစုမှာပါခဲ့တာပေါ့။ အဲဒီမှာ သပိတ်တပ်ပေါင်းစုရဲ့ လုံခြုံရေးကို စက်မှုကျောင်းသားတွေကတာဝန်ယူရတယ်။ အာဏာသိမ်းပြီးတဲ့နောက်မှာ လူကြီးတွေက အမျိုးသားနိုင်ငံရေးတပ်ပေါင်း စုပါတီ၊ သံဃာတွေက သံဂ္ဂသမ္မဂီဆိုပြီးပြောင်းသွားကြတယ်။ ကျွန်တော်တို့ ကျောင်းသားတွေကတော့ မန္တလေးမှာရှိတဲ့ တစ်ခြားကျောင်းသားတွေနဲ့ပေါင်းပြီး အမျိုးသားနိုင်ငံကျောင်းသားလူငယ်ဆိုပြီး အဖွဲ့ ဖွဲ့လိုက်တယ်။ အဲဒီလိုဖွဲ့ပြီးတဲ့အချိန်မှာ အဲဒီခေတ်ကခေတ်စားတဲ့အတွေးအခေါ်အတိုင်းပဲ လက်နက်ကိုင်အစိုးရကို လက်နက်ကိုင်ပြီးတိုက်မှရမယ်ဆိုတဲ့အတွေးအ ခေါ်နဲ့ လက်နက်ကိုင်အဖွဲ့တွေနဲ့ဆက် သွယ်တယ်။ မြောက်ပိုင်းမှာရှိတဲ့ ကချင်နဲ့ဆက်သွယ်တာပေါ့။ လုပ်ရင်း လုပ်ရင်းနဲ့ မြို့ပေါ်မှာဘယ်လိုမှနေလို့မရတော့တဲ့အတွက် မြောက်ပိုင်းကိုရောက်သွားတယ်။
မေး - အစ်ကိုတို့မြောက်ပိုင်းကိုရောက်သွားတဲ့အချိန်က အဲဒီမှာအခြေအနေ ဘယ်လိုရှိသလဲ။
ဖြေ - မြောက်ပိုင်းကိုရောက်သွားတဲ့အချိန်မှာ ကချင်ကော်မတီနဲ့ ကျောင်းသားတွေကြားမှာ အဖုအထစ်လေး တွေရှိနေတယ်။ ကျောင်းသားအင်အားက ၂၀၀ လောက်ရောက်နေပြီ။ ကျွန်တော်က အပတ်စဉ်(၅)။ အပတ်စဉ် ၁ နဲ့ ၂ ကို KIA က သင်တန်း ပေးတယ်။ အပတ်စဉ် ၃ ကနေစပြီး ကျောင်းသားတွေက သင်တန်းပေးတယ်။ ကျွန်တော် တို့ရောက်တဲ့အချိန်မှာ သံချောင်း တို့ မျိုးဝင်းတို့ ရောက်နေပြီ။ ကိုထွန်းအောင်ကျော်နဲ့ အောင်နိုင်က ကျွန်တော့် ထက်တစ်လ လောက်စောတယ်။ မျိုးဝင်တို့ပါ တဲ့ ကချင်ကော်မတီကို အပတ်စဉ် ၅ က ကျောင်းသား ငါးယောက် ကဦးဆောင်ပြီး အတိုက်အခံပြုရာကစပြီး ပြဿနာဖြစ် တယ်။ ဘာကြောင့်ဖြစ်တာလဲဆိုတော့ တပ်တွင်းဒီမိုက ရေစီမရှိလို့။ အာဏာရှင်ဆန်ဆန်အုပ်ချုပ်တာကို ကျောင်းသားတွေက မကြိုက်ဘူး။ အဲဒီတော့ ရွေးကောက်ပွဲ လုပ်မယ်ဆိုပြီး ကော်မတီဖွဲ့တယ်။ မျိုးဝင်းဆိုတာ စက်မှုကျောင်းသား။ စတုတ္ထနှစ် Mining ။ မိုးညှင်းမြို့နယ် နမားက။ ရွေးကောက်ပွဲမှာ မဲအများဆုံးရတဲ့သူတွေနဲ့ ကော်မတီဖွဲ့မယ်ဆိုပြီး တပ်ရင်းအသီးသီး ကိုလှည့်ပြီး ဆန္ဒမဲကောက်တယ်။ မဲအများဆုံးရတာကတော့ သံချောင်းနဲ့လဆိုင်းပဲ။ မဲအများဆုံးရတဲ့ သူတွေကို စဉ်လိုက်တဲ့ အခါမှာ မျိုးဝင်းပါမလာဘူး။ ပြဿနာက ဘာလဲဆိုတော့ နောက်ရောက်တဲ့လူတွေရဲ့ သဘောထားကြီးမှုပေါ့။ တစ်ချိန် ချိန်ကြရင် ကိုယ့်လည်ပင်းကိုယ် ကြိုးကွင်းပြန်စွပ်မယ့်အလုပ် လုပ်မိခဲ့ကြတယ်။ ဘာလုပ်မိလဲဆိုတော့ အရင် ကော်မတီမှာ တကယ်အလုပ် လုပ်ခဲ့တာက မျိုးဝင်းပဲ။ အဲဒါကြောင့် နောက်ဖွဲ့တဲ့ အဖွဲ့မှာ မျိုးဝင်ကို ပါစေချင်ကြတယ်။ မဲပိုရတဲ့ ဘဂျမ်းဆိုတဲ့ သူက ကျွန်တော်က ကော်မတီ မလုပ်ချင်ဘူး။ စစ်ပဲတိုက်ချင်တာဆိုတော့ မျိုးဝင်းကို ဆွဲတင်လိုက်တာပေါ့။ ဥက္ကဋ္ဌက ကိုထွန်း အောင်ကျော်၊ ဒု- ဥက္ကဋ္ဌ(၁)က သံချောင်း၊ ဒု-ဥက္ကဋ္ဌ(၂)က အရင် ဥက္ကဋ္ဌဟောင်း ကျော်ကျော်၊ ဒုဥက္ကဋ္ဌ (၃) ကတပ်ရင်း ၄၀၁ က ကို သံလွင်ကို ထားလိုက်တယ်။ အထွေထွေအတွင်းရေးမှူးက ကိုအောင်နိုင်ကိုခန့်လိုက်တယ်။ တွဲဖက်အတွင်းရေးမှူး (၁) က ကိုလဆိုင်းကိုထားတယ် တွဲဖက်အတွင်းရေးမှူး(၂)ကို ကိုမျိုးဝင်း။ နောက်ရောက်လာတဲ့သူတွေက နယ်တွေဘာ တွေ ဆင်းပြီး စည်းရုံးရေးကောင်းတဲ့အခါကျတော့ အဖွဲ့အစည်းက အင်အားကြီးလာတယ်။ အဲဒီမှာ မျိုးဝင်းက ဒီလူလေးနဲ့ တောင် သူပြုတ်ကျခဲ့တာ ဒီ့ထက်အင်အားကြီးလာရင် သူ့နေရာပျောက်သွားမှာ ကို ကြောက်တယ်။ ဘယ်လို လူတွေကိုရှင်း ရမလဲဆိုတာ စပြီးစဉ်းစားလာတယ်။ သူ့ရဲ့အကျင့်က အဲဒီအတိုင်းပဲ။ ကချင်ကော်မတီမှာတုန်းကလဲ ကိုလှဋ္ဌေး(ဦးစီး)နဲ့ ကို ကျော်ကျော်(ကချင် AB ဥက္ကဋ္ဌ)ကို ဗဟိုကို ခရီးထွက် ခိုင်းပြီး လိုင်စင်မှာ မရှိအောင် လုပ်ခဲ့ဖူးတယ်။ အခုလည်း ဒီအဖွဲ့မှာ ကိုထွန်းအောင်ကျော်ကို ဖြိုမှရမယ် ဆိုတာ သူသိတယ်။ ကျောင်းသားတပ်မတော်မှာ အဖွဲ့ဝင်ဖြစ်ရင် အားလုံးစစ်သင်တန်း တက်ရတယ်။ အဲဒီမှာ အပတ် စဉ်(၆)တက်နေရင်း တစ်ညနေ ကျွန်တော်နဲ့အောင်နိုင် ချောင်းဘေးမှာလမ်းလျှောက်နေခိုက် ထွန်းအောင်ကျော် က ထောက်လှမ်းရေးဆိုပြီး ရဲဘော်တစ်ယောက်ပြောသံကြားလိုက်ရတယ်။ အဲဒီရဲဘော်က ရဲဘော် အောင်ဗိုလ်။ အဲဒီစကားကို ကျွန်တော်တို့နှစ်ယောက်အပြင် ဇော်ဇော်မင်းဆိုတဲ့ တစ်ယောက်လည်း ကြားတယ်။ သူက မျိုးဝင်းရဲ့ လူ။ စောစောကပြောတဲ့ရဲဘော်က ဘယ်သူလဲ၊ ဘယ်ကလဲမေးတော့ သင်တန်းဌာန စားဖိုဆောင်ကတဲ့။ အဲဒီမှာ ကျွန်တော်က အောင်နိုင် ဒီအတိုင်း နေလို့တော့မဖြစ်ဘူး။ အစ်ကိုကြီး(ကိုထွန်းအောင်ကျော်) ကိုတော့ တိုက်ခိုက်နေပြီ။ မဖြစ်တော့ဘူး။ သွားပြောမှ ရမယ်ဆိုပြီး သင်တန်းမှူးကိုသွားပြောတယ်။ အခုလို စကားသံတွေထွက်လာတာဟာ အဖွဲ့အ စည်းအတွက် မကောင်းဘူး။ ကိုယ့်လူကိုယ်ထိန်းပါလို့ပြောခဲ့တယ်။ တစ်ဆက်ထဲပဲ မျိုးဝင်းကို ဆင်းလာခဲ့ ပြောစရာရှိလို့ဆိုပြီး ရဲမေ ဂျူးဂျူးကနေတဆင့် လှမ်းမှာတယ်။ အဲဒီအချိန်မှာ မျိုးဝင်းကလိုင်စင် ဗဟိုမှာ ရှိနေတယ်။ ကျွန်တော်က မျိုးဝင်း ဒီစကား သံတော့ ထွက်လာတယ်။ မင်းလည်းထိန်းပါ။ အဖွဲ့အနာဂတ်အတွက် မကောင်းဘူးလို့တောင် ပြောမိပါသေးတယ်။ ဒါပေမယ့် သူက အဲဒီအချိန်ကတည်းက ကြံနေပြီ။ စခန်းမှာရှိတဲ့လူတွေကို လူစုခွဲနေပြီ။ ဖြစ်ချင်တော့ ABSDF ဗဟိုက တတိယအကြိမ် ညီလာခံခေါ်မယ်။ ကိုယ်စားလှယ်တစ်ယောက်ရှာပါဆိုပြီး ကြေးနန်းဝင်လာတယ်။ အဲဒီမှာ မျိုးဝင်းနဲ့ သံချောင်းက ကိုစိုးလင်း သွားသင့်ပါတယ်ဆိုပြီး ထောက်ခံကြတယ်။ သူတို့က ဒီလိုပြောတဲ့အခါမှာ ကျန်တဲ့ ကော်မတီဝင်တွေကလည်း ကိုစိုးလင်းဆို ရင် သင့်တော်ပါတယ်ဆိုပြီး ၀ိုင်းထောက်ခံကြတယ်။ သံချောင်းနဲ့ မျိုးဝင်းက တကယ်တော့ လက်ဝါးချင်းရိုက်ပြီးသား။ သံချောင်းကလည်း ကျွန်တော့်ကို အမြင်သိပ်မရှင်းဘူး။ ဘာဖြစ်လို့လဲဆိုတော့ ကျွန်တော်က သူ့ ရဲ့တပ်မှူးတွေနဲ့ရင်းနှီးလို့။ အပတ်စဉ်(၆-ခ)က စပြီး ကျွန်တော်က သင်တန်းသားတွေကို နိုင်ငံရေးလက်ချာပေးရတယ်။ ရှေ့အပတ်စဉ်တွေက မသင် ပေးလိုက်ရတဲ့အတွက် ကျွန်တော်က တပ်မှူးတွေရောက်လာရင် ရင်းရင်းနှီးနှီးနေတယ်။ အထူးသဖြင့် ကိုအောင်ဆွေဦး၊ ကိုသာဓုတို့နဲ့ ပိုတွဲဖြစ်တယ်။ ကျွန်တော့်အယူအဆက နိုင်ငံရေးအယူအဆကို တပ်မှူးတွေဆီပို့နိုင်ရင် သူ့လက်အောက်က တပ်သားတွေဆီပျံ့မှာပဲဆိုပြီး တပ်မှူး တွေနဲ့စကားပြောတာ။ သံချောင်းက အဲဒါကိုမကျေနပ်ဘူး။ နိုင်ငံရေးမှူးက တပ်ကို ဘာလို့စည်းရုံးနေတာလဲဆိုပြီး အမြင်ရှိတယ်။ မျိုးဝင်းက ဗဟိုကော်မတီကိုဖြိုမယ်ဆိုရင် စိုးလင်း မရှိမှဖြစ်မှာဆိုပြီး သူတို့ နှစ်ယောက်တိုင်ပင်ပြီး ဗဟိုကိုပို့တာ။ အဲဒါကို ပြီးခဲ့တဲ့ ဇန်န၀ါရီမှထောင်က လွတ်လာတဲ့ စောသက်ထွန်းဆီက သိရတာ။ သူက သာယာဝတီထောင်မှာ သံချောင်းနဲ့ ၆ နှစ်လောက်နေလာခဲ့တာ။ မျိုးဝင်းက တစ်ခုခုရှင်းချင်ရင် ဗဟိုမှာရုံခါပြီးတော့ ရှင်းတဲ့အကျင့်ရှိတယ်။
မေး - ပါဂျောင်စခန်းမှာ အချင်းချင်းရက်ရက်စက်စက်သတ်ဖြတ်မှုတွေဖြစ်တဲ့အချိန်က အဲဒီစခန်းမှာ ကိုစိုးလင်း ရှိနေသလား။
ဖြေ - အဲဒီအချိန်က ပါဂျောင်မှာ ကျွန်တော်မရှိဘူး။ ABSDF ဗဟိုက ညီလာခံလုပ်ဖို့ မြောက်ပိုင်းက ကိုယ်စားလှယ်တွေ ခေါ်လို့ ၁၉၉၀ နှစ်ကုန်လောက်မှာ မာနယ်ပလောကိုသွားရတယ်။ ၉၁ ဧပြီလောက်မှာ မာနယ်ပလော ကိုရောက်တယ်။ ညီလာခံက ဇွန်မှာကျင်းပမယ်လို့ပြောပေမယ့် အခြေအနေအကြောင်းကြောင်းကြောင့်မကျင်း ပနိုင်သေးဘူး။ သြဂုတ် လောက်မှာ ကျင်းပနိုင်လောက်တယ်ပြောလို့ အားနေတဲ့အချိန်မှာ တောင်ပိုင်းကစခန်းတွေရဲ့အခြေအနေကို လေ့လာဖြစ် တယ်။ မြောက်ပိုင်းကိုပြန်ရောက်ရင် ဒီစခန်းတွေရဲ့အားသားချက်ကိုပြန်ပြီ အသုံးချရအောင်လို့ စခန်းတွေအားလုံးကို လှည့်တယ်။ ညီလာခံက သြဂုတ် ၁၁ လားမသိဘူး စဖြစ်တယ်။ နှစ်ပတ်လည်ပြီးတဲ့နောက်မှာပေါ့။ အဲဒီအချိန်က မြောက်ပိုင်း မှာ ဖမ်းတော့ဖမ်းနေပြီ။ ဗဟိုက မသိရသေးဘူး။
မေး - မာနယ်ပလောမှာ ညီလာခံတက်ရင်း ထောက်လှမ်းရေးဆိုပြီး ဘယ်လိုအဖမ်းခံလိုက်ရတာလဲ။
ဖြေ - ညီလာခံ တက်ရင်းတက်ရင်းနဲ့ ကျွန်တော်တို့ကို အုပ်စုနှစ်စုကအပြိုင်စည်းရုံးကြတာ။ ကိုမိုးသီးရဲ့အုပ်စုနဲ့ ကိုနိုင်အောင် အုပ်စုပေါ့။ ကိုမိုးသီးဇွန်အုပ်စုမှာ အမာခံဘယ်သူရှိလဲဆိုတော့ အောင်သူငြိမ်း( အခု ဗဟုအဖွဲ့)၊ နောက် ၀င်နိုင်ဦး(ဘီဘီစီ ကိုရင်မောင်)၊ ကိုဌေးအောင်( အခုကယန်းပြည်သစ်ပါတီမှာ ဗိုလ်မှူးစောလွင်ဆို ပြီးဖြစ်နေတဲ့သူ)။ သူတို့က မိုးသီးရဲ့ အမာခံ တွေ။ သူတို့ကလည်း ကျွန်တော်တို့နဲ့ မင်းသမီးစခန်းကလူတွေကို စည်းရုံးတယ်။ ဘာဖြစ်လို့လဲဆိုတော့ အဲဒီစခန်းနှစ်ခုက အင်အားကောင်းတော့ မဲများလို့စည်းရုံးတယ်။ ကိုနိုင်အောင်ဖက်မှာ အမာခံဘယ်သူရှိလဲဆိုတော့ အခု DVB တာဝန်ခံဖြစ်တဲ့ ခင်မောင်ဝင်း၊ ဒေါက်တာ သောင်းထွန်း၊ ဒေါက်တာကျော်သက်ဦး။ သူတို့အုပ်စုကလည်း ကျွန်တော်တို့ကိုစည်းရုံးတယ်။ အဲဒီတော့ ညီလာခံသာတက်နေရတယ် ဘယ်သူမှန်တယ် ဘယ်သူမှားတယ်ဆိုတာ မသိရဘူး။ ကိုမိုးသီးကလည်း အပြိုင် တင်တယ်။ နိုင်အောင်ဘာတွေလုပ်တယ်။ နိုင်အောင်က ပျော့ညံ့တဲ့ကောင်၊ တော်လှန်ရေးမှာ မရှိသင့် ဘူး။ ဘာညာနဲ့ပေါ့။ နိုင်အောင်ကလည်း ကိုမိုးသီးဇွန် မလုပ်သင့်တဲ့အလုပ်ကိုလုပ်တယ်။ တော်လှန်ကော်မတီကို ဥက္ကဋ္ဌအနေနဲ့နောက်ကပါတယ် ဆိုပြီး အပြန်အလှန်စွပ်စွဲကြတာ။ အပြိုင်တိုက်ကြတာပေါ့။
ကိုနိုင်အောင်ဖက်က တိုက်တာရှိသေးတယ်။ ကိုမိုးသီးဇွန်တို့က ကွန်မြူနစ်တွေ။ ကျောင်းသာတွေထဲမှာ ကွန်မြူနစ်တွေကို လက်မခံနိုင်ဘူးဆိုပြီးပေါ့။ မင်းသမီးစခန်းကလူတွေရော ကျွန်တော်တို့ရောက ကြားနေတွေ။ အဲဒီလို တိုက်နေရင်းနဲ့ မြောက်ပိုင်းကြေးနန်းက မာနယ်ပလောက KIA ရုံးကိုဝင်တယ်။ KIA ကလည်း လက်ရှိ ဥက္ကဋ္ဌက ကိုမိုးသီးဇွန်ဆိုတော့ သူ့ဆီသွားပေးလိုက်တယ်။ အမှန်က ညီလာခံလုပ်တဲ့အချိန်မှာ ကော်မတီဟောင်းက မရှိတော့ဘူး။ ညီလာခံကျင်းပတဲ့နေ့မှာတာဝန်ကျတဲ့ သဘာပတိကအမြင့်ဆုံးပဲ။ ဒါပေမယ့်လည်း သူတို့က ကိုမိုးသီးဇွန်ကိုပဲသွားပေးတယ်။ အဲဒီမှာ ကိုမိုးသီးဇွန်က ကြေးနန်းကိုကိုင်ထားလိုက်တယ်။ ဖြစ်ချင်တော့ အဲဒီ အချိန်က ကိုမိုးသီးနဲ့နိုင်အောင်တို့ အားပြိုင်မှုမှာ နိုင်အောင်ဖက်က နည်းနည်းအားသာနေတယ်။ သာတယ်ဆိုတာ တော် လှန်ကော်မတီကိစ္စပေါ့။ အဲဒီကော်မတီအကြောင်းတော့ ကျွန်တော်လည်းအသေးစိတ်မသိဘူး။ အဲဒီ တော့ ကိုမိုးသီးဇွန်က ထွက်ပေါက်ရှာနေပြီ။ ရိုးရိုးသားသားထွက်ပေါက်မရှာဘဲနဲ့ မြောက်ပိုင်းကြေးနန်းကို ကိုင်ပြီးထွက်ပေါက်ရှာတယ်။ မြောက်ပိုင်း မှာ ထောက်လှမ်းရေးတွေ လူတစ်ရာကျော်ဖမ်းမိနေပြီ။ မြောက်ပိုင်းမှာ ထောက်လှမ်းရေးတွေရောက်နေသလို ဒီညီလာခံထဲ မှာလည်း ထောက်လှမ်းရေးတွေ ဘယ်နှစ်ယောက် ရောက် နေသလဲ ကျွန်တော်မသိဘူး။ ဒီထောက်လှမ်းရေးတွေက
ကျွန် တော့်ကို တိုက်နေကြတာလို့ပြောတယ်။ အဲဒီ အချိန်မှာ ကျွန်တော်ကထပြီး ကိုမိုးသီး စကားကိုအရမ်းမပြောနဲ့။ ကျွန်တော် မြောက်ပိုင်းကလာတဲ့ရဲဘော်။ မြောက်ပိုင်းအကြောင်းကို ကျွန်တော်ခင်ဗျားထက် ပိုသိတယ်။ မြောက်ပိုင်းကိစ္စ တစ်ခုခုမှား နေပြီ။ ဒါမျိုးမဖောက်ခွဲပါနဲ့။ ခင်ဗျားကို ပုဂ္ဂိုလ်ရေးလေးစားတယ်။ ဒါမျိုးနိုင်ငံရေးဖောက်ခွဲတာကိုတော့ မကြိုက်ဘူး။ အဲဒီမှာ မြောက်ပိုင်း ကိုယ်စားလှယ်တစ်ယောက်ဖြစ်တဲ့ ကိုလှဋ္ဌေးက ကျွန်တော့်ကိုဆွဲထိုင်ခိုင်းတယ်။ သူက မြောက်ပိုင်းကိစ္စကို ဒီညီလာခံမှာ မရှင်းပါနဲ့။ ခင်ဗျားတို့နှစ်ယောက်ရဲ့ပြဿနာကိုပဲအရင်ရှင်းပါလို့ပြောတယ်။ မိုးသီး-နိုင်အောင် အုပ်စုနှစ်စုက ပြိုင်ရင်းကွဲတော့ မလိုဖြစ်လာတယ်။ အဲဒီမှာ မဟာမိတ်ဖြစ်တဲ့ KNU က မင်းတို့ စစ်ရေးလည်း အခြေအနေမကောင်းဘူး။ ပေါင်းခိုင်းလို့ရမယ်ထင်ပြီး မာနယ်ပလောမှာလာပြီးလုပ်လှဲ့ဆိုပြီး ခေါ်လိုက်တယ်။ အမှန်ကတော့ KNU က အဖွဲ့မကွဲ စေချင် လို့ခေါ်လိုက်တာ။ ဗိုလ်ချုပ်မြကိုယ်တိုင်လာပြီး မကွဲကြဖို့ပြောတယ်။ ကျောင်းသားတွေမကွဲကြပါနဲ့။ ရအောင်ညှိကြပါ။ သမိုင်းမှာကျောင်းသားကွဲတယ်ဆိုရင် ငါတို့လည်းမကောင်းဘူး ရအောင်ညှိဆိုပြီးပြန်သွား တယ်။ ညှိကြတယ်။ ညှိရင်း ညှိရင်း မရတော့ဘူး။ နောက်ဆုံး KNU က ရာဇသံပေး တယ်။ ကွဲမယ်ဆိုရင် သူတို့ စခန်းမှာအကွဲမခံနိုင်ဘူး ပြန်ကြတော့ဆိုပြီးပြောတယ်။
မာနယ်ပလောကိုလာတုန်း က တစ်စုတစ်စည်းထဲ။ အခုပြန်ရွှေ့တဲ့အခါမှာ နှစ်စုကွဲသွားတယ်။ မိုးသီးဇွန်ဦးဆောင်တဲ့ အဖွဲ့က အောင်သူငြိမ်း တို့တပ်ရင်း ၂၁၂ မှာ နေလိုက်တယ်။ ပြီးတော့ တတိယညီလာခံကို ဆက်လုပ်တယ်။ ညီလာခံက ကော်မတီတစ် ခု ဖွဲ့လိုက်တယ်။ အဲဒီ ကော်မတီမှာ မိုးသီးဇွန်က ဥက္ကဋ္ဌ။ အောင်သူငြိမ်းက ဒုဥက္ကဋ္ဌလား အထွေထွေအတွင်း ရေး မှူးလား မမှတ်မိတော့ဘူး။ ကော်မတီဝင်တွေက အရင် AB ပထမစဖွဲ့တော့ အထွေထွေအတွင်းရေးမှူးလုပ်တဲ့ သန်းဝင်း တို့ ဌေးနိုင် တို့ပါသွားတယ်။ မြောက်ပိုင်းရော မင်းသမီးစခန်းကလူတွေရော ကိုနိုင်အောင်တို့နဲ့ သံလွင်စခန်းကို လိုက်ပြီး တော့ ညီလာခံတစ်ခုလုပ်တယ်။ လူများတာကတော့ ကိုနိုင်အောင်တို့ဖက်ကများတယ်။ အဲဒီကနေ ဗဟိုကော်မတီတစ်ခုဖွဲ့ လိုက်တယ်။ ဥက္ကဋ္ဌက ကိုနိုင်အောင်၊ ဒုဥက္ကဋ္ဌက ကျော်ကျော်(ကျော်ကျော်ဆိုတာ ဆယ်ပြား ကျော်ကျော်)၊ အထွေထွေ အတွင်းရေးမှူးက မင်းသမီးစခန်းက မျိုးဝင်း။ နှစ်ခြမ်းကွဲပြီးသွားတဲ့ အချိန်မှာတော့ မြောက်ပိုင်းသည် ကိုနိုင်အောင်ရဲ့ လက် အောက်ကိုရောက်သွားပြီ။ ကျွန်တော်ကပြန်ဖို့ရက်ကို စောင့်နေတာ။ ဒါပေမယ့်အဲဒီအချိန်မှာ ကိုလှဌေးဆီကို မြောက်ပိုင်းက ကြေးနန်းရောက်နေပြီ။ ကျွန်တော်က မသိသေးဘူး။ ညီလာခံပြီးလို့ ငါးရက်မြောက်နေ့မှာ သိရတာ။ သံလွင်စခန်းမှာက သူငယ်ချင်းများတယ်။ ဥက္ကဋ္ဌ က စိုင်းမင်းသူ လည်း RIT က သူငယ်ချင်းပဲ။
အောက်တိုဘာလကုန်ပိုင်းမှာ ဘုရားကန်တော့ပြီး အခန်းကို အပြန်မှာ သေနတ်တွေနဲ့ဝိုင်းလာပြီး ကိုစိုးလင်း ခင်ဗျားကိုကျွန်တော်တို့ဖမ်းတယ်ဆိုပြီးဖမ်းလိုက်တယ်။ ဘယ်လို ဖြစ်တာ လဲဆိုပြီး ကျွန်တော်ကမေးတဲ့ အခါ ကျော်ကျော်(အပု)က ကျွန်တော့်လက်မောင်းက AB တံဆပ်ကိုဆွဲခွာပြီး မင်းနဲ့ ဒီတံဆိပ်နဲ့မတန်ဘူးလို့ပြောတယ်။ ချုပ်မယ့်နေရာကို လက်ထိပ်ခတ် ဇွတ်ဆွဲလာရင်း နောက်ကနေ ကိုနိုင်အောင်ရောက်လာ တယ်။ ကျွန်တော်က ကိုနိုင်အောင် အစ်ကိုကြီး ဘယ်လိုဖြစ်တာလဲ။ကျွန်တော့်ကို ဖမ်း ပြီလို့ မေးတော့ သူက လက်ထဲက ကြေးနန်းစာရွက်ကိုထုတ်ပြပြီး မင်းဖတ်ကြည့်လို့ပြောတယ်။ ကြေးနန်းထဲမှာ စစ်ဆေးတွေရှိချက်များအရ ကိုစိုးလင်းမှာ န၀တသူလျှိုဖြစ်ပါသဖြင့် လိုအပ်သလိုဆက်လက်အရေးယူဆောင် ရွက်ပါရန် အောက်က အောင်နိုင်ဆိုပြီးပါတယ်။ အဲဒီမှာ ကျွန်တော်က ဥက္ကဋ္ဌ ကျွန်တော်တို့အဖွဲ့မှားတော့မယ်။ ခင်ဗျားမှာတာဝန်အရှိဆုံးလို့ ကျွန်တော်ကပြောတယ်။ ဥက္ကဋ္ဌ ခင်ဗျား အသေအချာဖြေရှင်းပါ။ သမိုင်းမှာလည်း သင်ခန်းစာယူစရာတွေအများကြီးရှိပါတယ်လို့ပြောတော့ သူက စိတ်ချညီလေး မင်းကိစ္စအမှန်အတိုင်း ဖြစ်စေ ရမယ်။ ကိုယ် မြောက်ပိုင်းကို သွားမယ်။ မင်းကိစ္စကို တရာမျှတအောင်ရှင်းပေးမယ်။ အဲဒီလို ပြောပြီး နောက် သူ့ ကိုမတွေ့ရတော့တာ။ အဲဒီနောက်မှာ ကျွန်တော့်ကို အကျယ်ချုပ်နဲ့ထားတယ်။ မာနယ်ပလောကျတဲ့ အချိန်မှာတောင် ထိုင်းဖက်ကမ်းမှာ အကျယ်ချုပ်နဲ့ထားတယ်။ အကျယ်ချုပ်နဲ့နေရချိန်မှာ ကျွန်တော့်ကိုထားတဲ့ အခန်း အောက်မှာ ABSDF ဗဟိုရုံးရှိတယ်။ တစ်ရက်က ဗဟိုရုံးကဖွင့်ထားတဲ့ ရေဒီယိုမှာ ဘီဘီစီနဲ့ ABSDF အတွင်း ရေးမှူး ကိုအောင်ထူးတို့ အင်တာဗျူးလာနေတယ်။ ဘီဘီစီက မြောက်ပိုင်းမှာ သတ်တာဖြတ်တာတွေကို ဗဟိုက ဘယ်လို သဘောထားလဲမေးတော့ သူကတာဝန်ယူတယ်လို့ပြောတာကြားလိုက်ရတော့ မြောက်ပိုင်းမှာတော့ သတ်ကြဖြတ်ကြပြီ လို့သိလိုက်ရတယ်။ ကိုထွန်းအောင်ကျော် ပါ မပါတော့ မသိဘူး ၁၅ ယောက် အသတ်ခံ ရတယ်ဆိုတာလောက်တော့ သိလိုက်ရပြီ။ သင်္ကြန်အပြီးမှာ ထိုင်းဖက်ကမ်းကနေ ညဖက်ကြီးလှေနဲ့ အမှတ် ၂၁၀ တပ်ရင်း အပေါ်ကုန်းမှာရှိတဲ့ ကျောင်း သားစစ်ကြောရေးစခန်း ကိုပြောင်း တယ်။ လှေပေါ်မှာ မင်း လိမ်ဖို့ မကြိုးစားနဲ့။ ဥက္ကဋ္ဌလည်းမြောက်ပိုင်းကပြန်ရောက်နေပြီ။ ငါတို့အကုန်သိ ပြီးသားဆိုပြီး ခြိမ်းခြောက်တဲ့စကား စပြောတယ်။ စစ်ကြောရေးစခန်းမှာ ခွေးအိမ်လေးနဲ့ထားတယ်။ ခွေးအိမ် ဆိုတာ အိမ်ရင် ခြေထောက်ကို ဆန့်ပြီး အိပ်လို့မရဘူး။ ထောင်ပြီးအိပ်မှရတယ်။ အဲဒီနောက် စစ်ကြောရေးစတော့တာပဲ။ စစ်ကြောရေးကို တာဝန် ယူတာက ကိုလှဋ္ဌေး။ ပထမ နှစ်ရက် သုံးရက်လောက်ကတော့ ရိုးရိုးမေးနေတာ။
ကျွန်တော်က မဟုတ်ဘူးလို့ အေးအေးဆေးဆေးရှင်းပြပါတယ်။ အဲဒီကနေသူတို့က မင်းတို့ထောက်လှမ်းရေးတွေက အသားမနာရင်မရဘူး ဆိုပြီး စလာတယ်။ မရိုက်ပါနဲ့။ ကျွန်တော်က အနာမခံနိုင်ဘူး။ အသားနာလာရင် လိမ်ပြောမိလိမ့်မယ်။ ငိုယိုပြီး တောင်းပန် တာကို မရဘူး။ ရိုက်တာပဲ။ ရိုက်ရင်း ရိုက်ရင်းနဲ့ မင်းက well train ပဲ။ မင်းလိုပေါက်စမပြောနဲ့ ထွန်းအောင်ကျော်လို ဆင်ကြီး ကိုတောင် ဖြိုလာတာဆိုတဲ့ အသံတွေလည်း ကြားလာရတယ်။ ရိုက်ပြီးရင် ခွေးအိမ်လေးထဲကိုပြန်ထည့်။ ထမင်းကလည်း ကျွေးတစ်ရက်မကျွေးတစ်ရက်နဲ့ စိတ်ဓာတ် စစ်ဆင်ရေးလုပ် တယ်။ ထုတ်ပြီးပြန်ရိုက်နဲ့ ရက်တွေဆက်လာတဲ့အခါကျတော့ စဉ်းစားမိတယ်။ ဟိုလူတွေလည်း အသတ်ခံလိုက် ရပြီ။ ငါလည်း ဒီအတိုင်းအသတ်ခံရမလား။ ၀န်ခံလိုက်ရင် လောလော ဆယ် သက်သာမယ်။ လွတ်လမ်းမြင်ရင် မြင်လာနိုင်တယ်ဆိုပြီး စဉ်းစားမိတယ်။ အဲဒီလိုနဲ့သူတို့ဆီကို ခွင့်တောင်းတယ်။ နှစ်ရက် လောက်အချိန်ပေးပါ။ စဉ်းစားပါဦးမယ်လို့ပြောပြီး ဘယ်လိုပြောရင်ရမလဲဆိုပြီး စဉ်းစားတယ်။ ရိုးရိုး ထောက်လှမ်း ရေးပါလို့ပြောရင် သူတို့ကလက်တံရှည်လို့ လိမ်တာနေမှာစိုးလို့ အထူးထောက်လှမ်းရေးဆိုပြီးပြောရ တယ်။ သူတို့က အဲဒါကို လက်ခံတယ်။ ဒါပေမယ့် ဘာသွားဖြစ်လဲဆိုတော့ မြောက်ပိုင်းနဲ့ဆက်စပ်တာကို ဘာမှ မပြောနိုင်ဘူး။ ရိုက်လေ မပြောနိုင် လေ။ အဲဒီမှာ ဘာဖြစ်လဲ ဆိုတော့ မြောက်ပိုင်းက ကိုထွန်းအောင်ကျော်တို့ ကိုချိုကြီးတို့ နန်းအောင်ထွေးကြည်တို့ ၀န်ခံတာကို ရိုက်ထားတဲ့ ဗွီဒီယိုကို ၂၀၁ တပ်ရင်းဖက်မှာ အသံအကျယ်ကြီးနဲ့ဖွင့်ပြတယ်။ တမင်ဖွင့်ပြတာလားတိုက်ဆိုင် တာလားတော့ မသိဘူး။ အဲဒါတွေကိုကြားပြီး ကျွန်တော်လည်း သူတို့ပြောတဲ့ အတိုင်းပဲလိုက်ပြောတာပေါ့။ သူတို့က နောက်တစ်ခုထပ်ပြော ခိုင်းပြန်တယ်။ မင်းဒီကိုလာတာ ဘယ်သူ့ အချိတ်အဆက်နဲ့လာတာလဲ လုပ်ပြန်တယ်။ အပြင်လူတွေ လျှောက်ပြောတာ လက်မခံဘဲ အတွင်းကလူကို ဖော်ခိုင်းတယ်။ အဲဒီမှာ ဆရာနေ၀င်းအောင် ဖမ်းထားပြီးပြီ လား မဖမ်းရသေးဘူးလားမသိဘူး။ ကျွန်တော် လည်း မခံနိုင်တဲ့အဆုံး ဆရာ့နာမည်ကိုပြောလိုက်ရတယ်။ တစ်ရက်တော့ ဆရာ့ကို ရိုက်နှက်ပြီးစစ်နေတာကို ကျွန်တော့်ခွေးအိမ်လေးထဲက မြင်လိုက်ရတယ်။ နောက်ဆုံး ဆရာရော ကျွန်တော်ရော ၀န်ခံတဲ့အခံကျတော့လည်း သူတို့က တစ်ဆင့်တက်ပြီး မိုးသီးဇွန်ကထောက်လှမ်းရေးလား လုပ်ပြန်တယ်။ နှစ်ယောက်စလုံးက မဟုတ်ဘူးလို့ဆိုတဲ့အခါ မိုးသီးဇွန် ထဲမှာ မင်းတို့လူဘယ်သူရှိလဲလို့ မေးတယ်။ ကျွန်တော်တို့နှစ်ယောက်လုံး ကပဲ ကိုဌေးနိုင်ကိုသွားထွက်မိတယ်။ အဲဒီမှာ ကျွန် တော်စဉ်းမိတာ ဆရာနေ၀င်းအောင်ကိုပြောတော့ ဆရာ့ကို ဖမ်းတယ်၊ ကိုဌေးနိုင်ကိုပြောတော့ ကိုဌေးနိုင်ကိုဖမ်းတယ်။ ဒီအ တိုင်းဆို လူတွေအများကြီး ဒုက္ခရောက် ရတော့မှာပဲ။ မင်းတို့ဖမ်းချင်ရင်ဖမ်းကွာဆိုပြီး ဗဟိုကော်မတီ ဒုဥက္ကဋ္ဌကစပြီး သံလွင် စခန်းမှာတွေ့တဲ့လူတွေ အကုန်လုံးရဲ့ နာမည်တွေလျှောက်ပြောလိုက်တယ် ။ အဲဒီနည်းကမှန်လား မမှန်လားတော့ မသိဘူး။ လူတွေတော့ မဖမ်းတော့ဘူး။
မေး - ဒီလိုမျိုး သံလွင်စခန်းမှာ ရိုက်နှက်စစ်ဆေးတာတွေလုပ်ဖို့ ဘယ်သူက စီစဉ်တာလဲ။
ဖြေ - ဒီလိုမျိုးစစ်ကြောရေးစခန်းဖွင့်ပြီး ကျောင်းသားအချင်းချင်းရိုက်နှက်စစ်ဆေးဖို့ ကိုနိုင်အောင် အမိန့်ပေး တာ။ သူအမိန့် ပေးလို့ ဒီလိုလုပ်ရဲတာ။ စစ်ကော်မတီဥက္ကဋ္ဌကလည်း သူပဲ။ သူအမိန့်ပေးတာ။ ကျွန်တော် နိုင်ငံခြားသူတစ်ယောက်ရှေ့မှာ “ကျွန်တော်ထောက်လှမ်းရေးမဟုတ်ဘူး” တစ်ခွန်းထွက်မိလို့ တစ်ညလုံး အရိုက်ခံရတာ သူ့ရှေ့မှာပဲ။ သူ လက်ဖျောက်တီး ခေါ်ပြီး အရိုက်ခိုင်းတာ။ ညှင်းဆဲမှုတွေအကုန်လုံး ကိုနိုင်အောင်ရဲ့ အမိန့်နဲ့ လာတာ ဆိုတာ သေချာတယ်။ မြောက်ပိုင်းကိစ္စ မှာ ကိုနိုင်အောင်ပတ်သက်မှုရှိလား မရှိလားဆိုတာက တော့ အဲဒီအချိန်က မြောက်ပိုင်းမှာ ရှိမနေတဲ့အတွက် မပြောနိုင်ဘူး။ မြောက်ပိုင်း ကိစ္စနဲ့ပတ်သက်ပြီး ဗဟိုကော် မတီက မတ်လ ၁ ရက်နေ့မှာ စာထုတ်တယ်။ မြောက်ပိုင်းက အစီရင်ခံစာကို အခြေတယ်ပြီးရေးထားတာ။ သာမန်တာဝန်ခံတာ မဟုတ်ဘူး။ နှစ်နှစ်ကာကာကို တာဝန်ခံပြီးထုတ်ထားတာ။ ဗဟိုကော်မတီ တစ်ခုလုံး တာဝန်ခံပြီးထုတ်ထားတာ။ အတွင်းရေးမှူး(၁)အောင်ထူး(အခု ရှေ့နေများကောင်စီ)ဆိုပြီး လက်မှတ်ထိုးထုတ် ထားတာ။ နောက်တစ်ခါ မေလ ၃၁ ၇က်နေ့မှာ ကိုနိုင်အောင်ကိုယ်တိုင် စာတစ်စောင်ထုတ်တယ်။ အဲဒီမှာလည်း မြောက်ပိုင်း ကိစ္စတွေကို ဥက္ကဋ္ဌတစ်ယောက်အနေနဲ့လက်ခံတယ်ဆိုတဲ့သဘောမျိုးနဲ့ စာထုတ်တာ။ စာတွေဖတ် ကြည့် ရင်ပေါ်ပါတယ်။ ပြောမယ်ဆိုရင် မြောက်ပိုင်းကနေ မာနယ်ပလောကိုလာတာ လေးလကြတယ်။ လမ်းလျှောက်လာရတယ်။ စက်နဲ့ဆက်သွယ် တာကလည်း KIA ကတစ်ဆင့်ဆက်သွယ်ရတာဖြစ်လို့ အရမ်းခက်ခဲတယ်။ ကျွန်တော့်ကိုဖမ်းထာက အောက်တိုဘာလကုန် ၉၁ ခုနှစ်။ မြောက်ပိုင်းမှာ ခေါင်းဖြတ်သတ်တာ ၉၂ ဖေဖေါ်ဝါရီ။ အဲဒီကြားထဲမှာသုံးလလောက်ကွာတယ်။ ၉၂ ဖေဖော်ဝါရီ ၁၂ ရက်မှာ ခေါင်းဖြတ် သတ်တယ်။ ၉၂ က ရက်ထပ်နှစ်ဆိုတော့ ဖေဖေါ်ဝါရီလက ၂၉ ရက်ရှိတယ်။ သူတို့စာထုတ်တာက မတ် လ ၁ ရက်။ ပြောချင်တာက ၁၇ ရက်လောက်အတွင်းမှာ စာထုတ်တယ်။ ၁၇ ရက်အတွင်းမှာ သေသေချာချာမလေ့လာဘဲ မြောက်ပိုင်းကိစ္စကို ဗဟိုကစာထုတ်တာဟာ မင်းသမီးစခန်းလိုပဲ အားကြီးတဲ့မြောက်ပိုင်းရဲ့ အင်အားကိုလိုချင်လို့ လုပ်တဲ့သ ဘောပဲ။ ဒေါက်တာ သောင်းထွန်းကလွဲပြီး လက်မှတ်ထိုးခဲ့တဲ့သူတွေအားလုံးမှာ တာဝန်ရှိတယ်။ မြောက်ပိုင်းကိစ္စမှာ ထောက် လှမ်းရေးကိုဖော် ထုတ်နိုင်တယ်ဆိုတဲ့အတွက် နိုင်အောင်ဟာ ပြင်ပမှာနိုင်ငံရေးတော်တော်တက်သွားတယ်။ မိုးသီးဇွန်ကလုံးဝ မြောင်းထဲကိုပြုတ်ကျသွားတယ်။ အဲဒီအရှိန်နဲ့ပဲ လက်ရှိမှာ သူလုပ်နေတဲ့ ပြည်တွင်းမှာထောက်ပံ့ရေး အဆက်အသွယ်တွေ ဆိုတာ အဲဒီအရှိန်နဲ့ရခဲ့တဲ့ နိုင်ငံရေး figure နဲ့ ရသွားတဲ့ အနေအထား။
မေး - စစ်ကြောရေးစခန်းက ဘယ်အချိန်မှာ လွတ်မြောက်ခဲ့သလဲ။
ဖြေ - ဖမ်းဆီးစစ်ဆေးပြီး ကျွန်တော်ကိုထောင် ဆယ်နှစ်ချလိုက်တယ်။သူရဲ့စာတွေမှာ လူ့အခွင့်အရေးတွေ ဘာတွေပြော ထားပေမယ့် ဘာလူ့အခွင်အရေးမှ မပေးဘူး။ ဆရာနေ၀င်းအောင်ကတော့ သူ့အမျိုးသမီးနဲ့ နှစ်လတစ်ခါလောက် တွေ့ခွင့် ရတယ်။ အဲဒီမှာလည်း ပေးတဲ့ပစ္စည်းတွေကို ဖြတ်စားလာဘ်စားလည်း လုပ်သေးတယ်။ ကျွန်တော်တို့ကြားဖူးတဲ့ ထောင်တွေ ထက် တောင်ဆိုးသေးတယ်။ မာနယ်ပလောကျပြီးသွား တော့ ဒေါင်းဂွင်ကိုပြောင်းရတယ်။ ဒေါင်းဂွင်ကမှတစ်ဆင့် ကရင်နီကို ပြောင်းရတယ်။ ကရင်နီကိုပြောင်းတဲ့အခါမှာ ဖြစ်ချင်တော့ အချုပ်ခန်းကို ကိုယ်တိုင်ဆောက်ရတယ်။ အဲဒီအချိန်မှာကျွန်တော် တို့အဖွဲ့က လေးယောက် ဖြစ်သွားပြီ။ ဆရာနေ၀င်းအောင်၊ မြင့်ဦး၊ ကိုထင်ကျော်နဲ့ ကျွန်တော်။ သူတို့သုံးယောက်က ဘယ်လို တွေးလဲဆို တော့ စစ်ရေးအခြေအနေအရ နောက်ထပ် စခန်းတစ်ခုပြောင်းရင်ခေါ်မသွားဘူး။ သတ်ပြီးထားခဲ့နိုင်တယ်ဆိုတာ ကိုသိတော့ ပြေးဖို့လုပ်နေကြတာ။ ကျွန်တော့ကို ကြိုပြီးအသိမပေးဘူး။ ဘာလို့လဲဆိုတော့ ကျွန်တော်က အဖွဲ့အစည်းအပေါ် မှာစိတ်မနာနိုင်သေးလို့ဆိုပြီး သူတို့က အသိမပေးဘူး။ ပြေးမယ့်အချိန်မှ အသိပေး တယ်။ အဲဒီအချိန်မှာ ကိုယ်ထင်ကျော်က အစောင့်တွေကိုသတ်ပြီးမှသွားမယ်ဆိုလို့ ကျွန်တော်တို့ကတားခဲ့ရ သေးတယ်။ မြန်မာပြည်ဖက်ပြန်ရင် ကရင်နီနဲ့အစိုးရတပ် တွေတိုက်ပွဲဖြစ်နေလို့ ထိုင်းဖက်ကိုထွက်ပြေးရတယ်။ ထိုင်းမှာပြေးရင်းလွှားရင်း နောက်ဆုံး လူဝင်မှုကြီးကြပ်ရေးကအဖမ်းခံ ရပြီး မြန်မာ ပြည်ပြန်ရောက်လာခဲ့တယ်။
မေး - ဘာဖြစ်လို့ မြောက်ပိုင်းကိစ္စတွေက နှစ် ၂၀ ကျော်လာမှ အစပေါ်လာတာလဲ။
ဖြေ - ပြည်တွင်းကိုပြန်ရောက်လာတဲ့အခါမှာ ကိုယ့်ဘ၀ကိုယ် အတော်ပြန်တည်ဆောက်ယူရတယ်။ ဖြစ်ပျက်ခဲ့တဲ့အဖြစ်တွေ ကြောင့် အဖွဲ့အစည်းဂုဏ်သိက္ခာထိခိုက်မှာလည်းစိုးတယ်။ ဒီကိစ္စတွေအခုလိုပြန်ပေါ်လာတာကတော့ ကိုထိန်လင်းကြောင့် ဖြစ်ပါတယ်။ ကိုထိန်လင်းရဲ့ သန်းကြီးမတို့ လူကက်ဆက်လို့ထွက်လာပြီး အောင်မိုးဝင်းရဲ့ မြောက်ပိုင်းဒေသမှအရိုးတွန်သံ များထွက်လာတယ်။ ပြည်တွင်းမှာတော့ ဒီလိုပေါ်ပေါ်ထင်ထင် ဖြစ်လာတာကတော့ ကိုညီညီကျော်ကစတာပါ။ ပြောရရင် တော့ Social Media တွေ အားကောင်းတဲ့အချိန်လည်းဖြစ် လို့ပါ။ ပြည်ပမှာရောက်နေတဲ့ကလေးတွေ ဒီကိစ္စကိုအစဖော်ဖို့ ကြိုးစားတိုင်း နှုတ်ပိတ်ခံရမယ်ဆိုပြီး ခြိမ်းခြောက်ခံရတာတွေလည်းရှိတယ်။ ဒါကြောင့်ပါ။
မေး - ပြီးခဲ့တဲ့ မတ်လ ၂၅ ရက်နေ့မှာ ကိုနိုင်အောင်က မြောက်ပိုင်းကိစ္စတွေနဲ့ပတ်သက်ပြီး ပြန်ရှင်းခဲ့တယ်။ အဲဒီရှင်းလင်းချက်ကို ဘယ်လိုသဘောပေါက်ပါသလဲ။
ဖြေ - အဲဒီစာထဲမှာ ကိုစိုးလင်းနဲ့ ကိုနေ၀င်းအောင်တို့က တပ်ဖွဲ့ဝင်တွေ ဒုက္ခရောက်အောင်လျှောက်ပြောတယ်လို့ရေးထား တယ်။ သူတို့ပြောတဲ့လူတွေထဲမှာ လက်ရှိနိုင်ငံရေးနယ်ပယ်ထဲမှာ တက်ကြွစွာ ဦးဆောင်လှုပ်ရှားတဲ့ သူတွေပါနေတယ်တဲ့။ အဲဒီအတွက်ကြောင့် ထုတ်ဖော်ရန်မသင့်ဆိုပြီး သူရေးတယ်။ အဲဒီစာနဲ့ပတ်သက်ပြီး ၂၆ ရက်မှာ ကျွန်တော့် facebook မှာ ပြန်ရေးတယ်။ ရဲရဲသာဖွင့်ချလိုက်ပါ ကိုနိုင်အောင်ဆိုပြီး။ အဲဒီစာမှာ ကျွန်တော်တို့က တပ်ဖွဲ့ဝင်တွေဒုက္ခရောက်အောင်လုပ် တယ်၊ တစ်ခြားနာမည်တွေထည့်လို့မကောင်းဘူးလို့သာပြောထား ပြီး ကျွန်တော်တို့ကို ရိုက်နှက်စစ်ဆေးတာ တစ်လုံးမှထည့် မထားဘူး။ ကျွန်တော်တို့ ရိုက်နှက်စစ်ဆေးလို့သာ ထွက်ရတာ။ ကနေ့အထိ သူ့စာကိုတောင်းပန်စာလို့မယူဆဘူး။ သူ့ရဲ့ အနာဂတ်နိုင်ငံရေးမှာ သူ့ရဲ့ပုံရိပ်ကို မထိခိုက်အောင် တခြားလူတွေကိုဆက်နင်းသွားတယ်လို့ပဲယူဆတယ်။
မေး - ဘာဖြစ်လို့ ဒီလိုယူဆနိုင်တာလဲ။
ဖြေ - ကျွန်တော်ယူဆတဲ့ ယူဆချက်မှန် မမှန် ဒီနေ့အခြေအနေတွေက သက်သေပြနေတာပဲလေ။ ကိုနိုင်အောင် ပြန်လာ တော့မယ်ဆိုတဲ့ သတင်းတွေ လွန်ခဲ့တဲ့တစ်ပတ်လောက်ကစပြီးကြားလာရတယ်။ ကြားခါစက လုံးဝမယုံဘူး။ ဘာဖြစ်လို့ လဲဆိုတော့ ကိုနိုင်အောင်ဟာ သူဖြေရှင်းစရာကိစ္စတွေကို လုံးဝမဖြေရှင်းရသေးဘူး။ ရှောင်နေ သေးတယ်။ ယောက်ျားပီသပါ ဆိုပြီး ကျွန်တော်ရေးခဲ့တယ်။ ဒီနေ့အချိန်ထိ ဘာမှမလုပ်သေးဘူး။ ကျွန်တော်က ကိုယ့်စိတ်နဲ့နှိုင်းပြီး သူတော့ ဒါတွေမဖြေရှင်း သေးဘဲ မလာလောက်သေးဘူးတွက်ထားတာ။ နောက်တစ်ခုက ABSDF ကနေပြီး ဒီကိစ္စနဲ့ပတ်သက်လို့ အမှန်တရားဖော် ထုတ်ရေးကော်မတီဆိုပြီးဖွဲ့တယ်။ အဲဒီကော်မတီရဲ့စာထဲမှာလည်း ၂၀၁၃ ခုနှစ် မေလမှ အစီရင်ခံစာထွက်မှာ။ အဲဒီအစီရင် ခံစာမထွက်သေးခင်တော့ လာမှာမဟုတ်ဘူးလို့ယုံထားတာ။ အခု အဲဒီလိုမဟုတ်ဘူး။ နောက်ဆုံးပြီးခဲ့တဲ့ တစ်ရက်နှစ်ရက်က ဆိုရင် ကိုနိုင်အောင် ဒီနေ့ပဲ မဲဆောက်ကနေ ဘန်ကောက်ကိုတက်သွားပြီ။ ကိုနိုင်အောင်တို့ မဲဆောက်ကရုံးကို နိုင်ငံခြားက အထောက်အပံ့မပေးတော့ဘူး။ ပြည်တွင်းကိုပဲဝင်ဖို့ နိုင်ငံခြားကဖိအားပေးနေပြီ။ အထောက်အပံ့ကို Indirect မပေးတော့ ဘူး။ Direct ပဲပေးတော့မယ်။ ပြည်တွင်းကိုသာရအောင်ပြောင်းလို့ ပြောသံတွေကြားရတယ်။ တစ်ချို့လည်း ပြန်ဖို့ပြင်ကြပြီ။ သူ့အိမ်မှာလည်း ပြန်ဖို့ ငါးယောက်လောက် ရောက်နေပြီ။ သူလည်း တစ်ချို့ပိုင်ဆိုင်မှုတွေ ပြည်တွင်းကို ပြောင်းနေပြီ။ ဒါမျိုး တွေကြားနေရတယ်။ အဲဒီလိုကြား နေရတဲ့အချိန်မှာ ကိုနိုင်အောင် သြဂုတ်လ ၃၁ ရက်နေ့ နေ့လည် ၁ နာရီ ၅၅ မိနစ်မှာ TG ဘယ်လောက်နဲ့ ရောက်မယ်ဆိုတာကြားတော့ လုံးဝမယုံလို့ မရတော့ဘူး။ လက်ခံလိုက်ရတယ်။ အဲဒီတော့ ဒီလူဟာ သူနဲ့ ပတ် သက်တာတွေ ရှင်းစရာရှိတာတွေ မရှင်းဘဲ ပြန်လာရင် မြောက်ပိုင်းကျောင်းသားအများစုနဲ့ ထိပ်တိုက်တွေ့မှာ။ နောက် မြောက်ပိုင်းကိစ္စကို စာနာ နားလည် တဲ့ ပြည်သူတွေနဲ့တွေ့မှာ။ ဒါကနောက်တစ်ချက်။ ဒါတွေကို သူဂရုမ စိုက်ဘူးလား။ နောက်သူနဲ့ ညှိနှိုင်းခဲ့တဲ့ အစိုးရ၀န်ကြီးတွေ။ အစိုးရ၀န်ကြီးတွေကလည်း ဒီမြောက်ပိုင်းကိစ္စတွေ ကိုသိတယ်။ သိရက်သားနဲ့ နိုင်အောင် တောင်းပန်ဝန်ချမှုမလုပ်ဘဲနဲ့ လက်ခံပြီဆိုရင် ဘာလုပ်ကြမလဲ။ သေချာတယ် ကိုနိုင်အောင်မှာ အကြံအစည် တစ်ခုခုတော့ ရှိနေပြီ။ လက်ဝါးချင်းရိုက်ထားကြပြီးပြီ။ သေချာတယ် မရိုးသားတော့ဘူး။ သူပြန်လာချင်ရင်ပြန်လာပါ ကျွန် တော် စောစောကအခမ်းအနားမှာပြောခဲ့သလိုပါပဲ။ မဟာဂန္ဒာရုံ ဆရာတော်ဘုရားကြီး စာသင် သားတွေကို ဆုံးမသလိုပဲ စိတ်ကောင်းလေးထားပြီးပြန်လာပါလို့ပဲ ပြောချင်ပါ တယ်။ အရှုပ်အရှင်းတွေ မရှင်းနိုင် သေးခင် စိတ်ကောင်းလေးတော့ ထားစေချင်ပါတယ်။
မေး - ဘာကြောင့် ဒီလိုအခြေအနေမျိုးမှာ ကိုနိုင်အောင် မြန်မာပြည်ကိုပြန်လာသလဲဆိုတာ ဘယ်လို သုံးသပ် မိပါသလဲ။
ဖြေ - ကိုနိုင်အောင်က မြန်မာပြည်ပြန်မလာခင်ကတည်းက သူ့ရဲ့ နိုင်ငံရေးရပ်တည်မှုအတွက် ကြိုတင်ပြင် ဆင်ပြီးသား။ ဗဟု အဖွဲ့လို အဖွဲ့ကို မြန်မာပြည်ထဲမှာ အခြေကျအောင် ကြိုတင်ပြင်ဆင်ခိုင်းထားတယ်။ အောင်သူငြိမ်းတို့ အောင်နိုင်ဦးတို့က သူ့ လူတွေချည်းပဲ။ နောက်တခြားအဖွဲ့အစည်းတွေကိုလည်း နောက်ကွယ်ကနေသူ ထောက်ပံ့နေတာရှိတယ်။ ပြီးရင် သူ့ကြွေး ကြော်သံရှိတယ်။ ပြည်တွင်းကိုဝင်မယ်။ သူ့နိုင်ငံရေးရှင်သန်ဖို့အတွက် ပြည်တွင်းမီဒီယာကိုလည်း ငွေအားနဲ့ဝင်ဖို့အကြံအ စည်ရှိတယ်။
မေး - အခု ကိုနိုင်အောင် မြန်မာပြည်ပြန်လာတဲ့အပေါ် ထပ်ပြောဖို့ရှိပါသေးလား။
ဖြေ - ကိုနိုင်အောင်က တစ်လျောက်လုံး မြန်မာနိုင်ငံရေးအတွက် လုပ်လာခဲ့တာ။ ဒါပေမယ့် အခုသူတော်တော် ချမ်းသာ နေပြီ။ မဲဆောက်မှာ တိုက်နှစ်လုံးရှိတယ်။ ဘန်ကောက်မှာ တိုက်ခန်းရှိတယ်။ အခုနောက်ဆုံးသိရတာဆိုရင် သူ့လုံခြုံရေး အတွက်ဆိုပြီး ကျည်ကာကားတောင်ဝယ်စီးနေတယ်လို့သိရတယ်။ ပြောရမယ်ဆိုရင်တော့ သူပြန်လာပုံကို မကြိုက်ဘူး။ မြောက်ပိုင်းကိစ္စလိုဟာမျိုး ဗဟိုမှာဖြစ်တဲ့ကိစ္စလိုဟာမျိုးတွေကို တာဝန်ယူဖြေရှင်းပြီးမှ ပြန်လာသင့်တယ်။ ပကတိအခြေ အနေ ကိုမရောက်သေးခင်မှာ လူကြီးတွေနဲ့လက်ဝါးချင်းရိုက် ပြီးဝင်တာက တော့သူ့အနာဂတ်အတွက်လုပ်တာလို့ပဲ မြင် ပါတယ်။
No comments:
Post a Comment
စာဖတ်သူများကွန်မန်.ပေးနိုင်ပါသည်။