လက်ပန်းတောင်းတောင် ကြေးနီစီမံကိန်းနဲ့ ပတ်သက်ပြီး ကော်မရှင်ရဲ့ လေ့လာတွေ့ရှိ အကြံပြုချက်တွေအတိုင်း ပြင်ဆင်မယ်ဆိုရင် စီမံကိန်းကို ဆက်လက်ဆောင်ရွက်စေသင့်ပါကြောင်း မတ်လ ၁၂ ရက် ဒီကနေ့မှာထုတ်ပြန်တဲ့ စုံစမ်းစစ်ဆေးရေးကော်မရှင်ရဲ့ အစီရင်ခံစာမှာ ဖေါ်ပြထားပါတယ်။
အစီရင်ခံစာမှာပါတဲ့ တွေ့ရှိချက်တွေထဲက တစ်ချို့ကတော့ ဆန္ဒပြသူတွေကို အကြမ်းဖက်ဖြိုခွဲရာမှာ မီးစုန်းဓာတ် (ဖော့စဖောရပ်) ဓာတ်ပါဝင်သည့် မီးခိုးဗုံးကို အသုံးပြုခဲ့တဲ့အကြောင်း၊ ဒီလိုသုံးခဲ့တဲ့အတွက် ရဟန်းသံဃာနဲ့ လူပုဂ္ဂိုလ်အချို့မှာ မီးလောင်ဒဏ်ရာတွေ ရရှိခဲ့တဲ့အကြောင်းကိုလည်း ဖော်ပြ ထားပါတယ်။
ဒါ့အပြင် မြေယာသိမ်းဆည်းမှုတွေမှာ ပွင့်လင်းမြင်သာမှု မရှိခဲ့တဲ့အတွက် ပြဿနာတွေ ပိုကြီးထွားလာခဲ့ကြောင်းလည်း ဝေဖန်ထောက်ပြထားပါတယ်။
ကော်မရှင်အနေနဲ့ ကြေးနီစီမံကိန်းနဲ့ ပတ်သက်ပြီး ဘက်ပေါင်းစုံက လေ့လာတွေ့ရှိချက်တွေကို တင်ပြထားတာသာဖြစ်သလို အဲဒီအစီရင်ခံစာမှာပါတဲ့ အကြံပြုတင်ပြချက်တွေကို ဆက်လက်အကောင်အထည်ဖေါ်မယ့် ကော်မတီတရပ်ကိုလည်း ဖွဲ့စည်းထားလိုက်ပါတယ်။
ဒီကော်မတီမှာ ဥက္ကဌအဖြစ် ပြည်ထောင်စုဝန်ကြီး ဦးလှထွန်း ဦးဆောင်ပြီး စစ်ကိုင်းတိုင်းဒေသကြီး အစိုးရအဖွဲ့ ၀န်ကြီးချုပ် ဦးသာအေးက ဒုတိယဥက္ကဌအဖြစ် တာဝန်ယူထားသလို အဖွဲ့ဝင် (၁၅) ဦးထဲမှာ ပြည်ထဲရေးဝန်ကြီး ဒုတိယဗိုလ်ချုပ်ကြီး ကိုကိုအပြင် မြန်မာ့စီးပွားရေး ဦးပိုင်လီမိတက်က စီမံကိန်းဒါရိုက်တာ ဦးမောင်မောင်တင့်နဲ့ မြန်မာဝမ်ပေါင် ကုမ္ပဏီလီမိတက်က ညွှန်ကြားရေးမှူး Mr.Geng Yi တို့လည်းပါဝင်တယ်လို့ အစိုးရက သတင်းထုတ်ပြန်ထားပါတယ်။
No comments:
Post a Comment
စာဖတ်သူများကွန်မန်.ပေးနိုင်ပါသည်။