ထိုင်းနှင့်မြန်မာ နှစ်နိုင်ငံ သဘောတူ သတ်မှတ်ထားသော နယ်စပ် ၀င်/ထွက်ပေါက် လေးခုဖြစ်သည့် မြ၀တီ၊ တာချီလိတ်၊ ကော့သောင်း၊ ထီးခီး ၀င်/ထွက်ပေါက်များအား အပြည်ပြည်ဆိုင်ရာ ၀င်/ထွက်ပေါက်အဖြစ် ထိုင်းနှင့် အခြားနိုင်ငံသား ကမ္ဘာလှည့် ခရီးသွားများကို စတင်ဝင်ရောက်ခွင့် ပြုလိုက်ကြောင်း သတင်းရရှိသည်။
နှစ်နိုင်ငံ နယ်စပ် ၀င်/ထွက်ပေါက်များဖြစ်သည့် တာချီလိတ်-မယ်ဆိုင်၊ မြ၀တီ-မဲဆောက်၊ ကော့သောင်း-ရနောင်းနှင့် ထီးခီး-ဖူနာရွန် နယ်စပ်ဂိတ်ပေါက်များအား အပြည်ပြည်ဆိုင်ရာ ၀င်/ထွက်ပေါက်များအဖြစ် ပြောင်းလဲသတ်မှတ်၍ ဗီဇာပါရှိသော နိုင်ငံကူးလက်မှတ်၊ ခိုင်လုံသော ခရီးသွားလက်မှတ် ပါရှိသည့် မြန်မာ၊ ထိုင်း နှစ်နိုင်ငံသားများနှင့် တတိယနိုင်ငံသား (မြန်မာ၊ ထိုင်းအပြင် အခြားနိုင်ငံများမှ) ခရီးသွား ဧည့်သည်များအား သြဂုတ် ၂၈ ရက် နံနက်ပိုင်းမှ စတင်၍ ၀င်/ထွက်ခွင့် ပြုလိုက်သည်ဟု သိရသည်။
"လက်ရှိကျင့်သုံးနေတဲ့ စနစ်အရ နိုင်ငံတော်ရဲ့ နယ်နိမိတ် ပိုင်နက်အတွင်း နိုင်ငံတကာ ခရီးသွားများနဲ့ ပတ်သက်ပြီးတော့ ဗီဇာအမျိုးအစား ခြောက်မျိုးနဲ့ ခွင့်ပြုထားပြီး ရန်ကုန်၊ နေပြည်တော်၊ မန္တလေး စတဲ့အပြည်ပြည်ဆိုင်ရာ ၀င်ထွက်ပေါက်သုံးခုမှ ဆိုက်ရောက်ဗီဇာနဲ့ ၅၁ နိုင်ငံကို ခွင့်ပြုပြီး ဖြစ်ပေမယ့် အခုဖွင့်လှစ်တဲ့ နယ်စပ်လေးခုမှ ဆိုက်ရောက်ဗီဇာ ခွင့်မပြုသေးပါဘူး။ BP : TBP ယာယီနယ်စပ် ဖြတ်သန်းခွင့် လက်မှတ်နဲ့ နှစ်နိုင်ငံ နယ်စပ်အတွင်း သွားလာလည်ပတ်ခွင့်ကိုလည်း နယ်မြေအကွာအဝေး တိုးမြှင့်ခွင့်ပြုဖို့ နှစ်နိုင်ငံ ဆွေးနွေးနေပါတယ်" ဟု မြ၀တီမြို့ရှိ ချစ်ကြည်ရေးတံတား မုခ်ဦး၌ သြဂုတ် ၂၈ ရက် နံနက်က ပြုလုပ်သော အပြည်ပြည်ဆိုင်ရာ ၀င်/ထွက်ပေါက်အဖြစ် ဖွင့်လှစ်သည့် အခမ်းအနားတွင် လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာနမှ ပြည်ထောင်စုဝန်ကြီး ဦးခင်ရီက ပြောကြားသည်။
တနင်္သာရီတိုင်း ဒေသကြီးတွင် ကော့သောင်းနယ်စပ်၊ ထီးခီးနယ်စပ်၊ ကရင်ပြည်နယ်တွင် မြ၀တီနယ်စပ်၊ ရှမ်းပြည်နယ်တွင် တာချီလိတ် နယ်စပ်များမှတစ်ဆင့် ကမ္ဘာလှည့် ခရီးသွားများ ၀င်/ထွက်သွားလာ လည်ပတ်နိုင်သဖြင့် ကမ္ဘာလှည့် ခရီးသွားလုပ်ငန်း လျင်မြန်စွာ ဖွံ့ဖြိုးတိုးတက် လာနိုင်သည်ဟု သိရသည်။
မြန်မာ-ထိုင်းနယ်စပ် ကော့သောင်းဂိတ်မှ ၀င်ရောက်လာသည့် နိုင်ငံခြားသား ခရီးသည်များအား စစ်ဆေးနေစဉ် (ဓာတ်ပုံ-ရဲမြင့်ဝင်း)
"နှစ်နိုင်ငံ ကူးလူးသွားလာမှုကို မြှင့်တင်လိုက်တာ၊ ဧည့်သည်တွေ သွားလာမှု လျှင်မြန်လွယ်ကူစွာ သွားလာနိုင်အောင် စီစဉ်ပေးလိုက်တဲ့ ရည်ရွယ်ချက် ဖြစ်ပါတယ်" ဟု ဟိုတယ်နှင့် ခရီးသွားလာရေးလုပ်ငန်း ၀န်ကြီးဌာနမှ ပြည်ထောင်စုဝန်ကြီး ဦးဌေးအောင်က ပြောကြားသည်။
ယခင်က နယ်စပ်ဝင်ပေါက်များမှတစ်ဆင့် ခရီးသွား ဧည့်သည်များအား တစ်ရက်သို့မဟုတ် တစ်ပတ်ဝင်ရောက်ခွင့်ဖြင့် ခွင့်ပြုထားရာ၌ နယ်စပ်မြို့နှင့် အနီးဝန်းကျင် မြို့အချို့၌သာ လည်ပတ်ခွင့် ရရှိပြီး ယခုဖွင့်လှစ်သည့် အပြည်ပြည်ဆိုင်ရာ ၀င်/ထွက်ပေါက်များမှ ၀င်ရောက်လာသော ခရီးသွားများမှာမူ ကန့်သတ်ဒေသများမှအပ မြန်မာနိုင်ငံရှိ အခြားခရီးသွား ဒေသများသို့ ၀င်ရောက်လည်ပတ်ခွင့် ရရှိမည် ဖြစ်သည်။
ပတ်စပို့၊ ဗီဇာပါသည့် ထိုင်းနိုင်ငံသားများနှင့် တတိယနိုင်ငံသားများအား ပြည်တွင်းသို့ သွားလာလည်ပတ်ခွင့် ပြုရာတွင် အလည်အပတ် ဗီဇာနှင့် ၂၈ ရက် လည်ပတ်ခွင့်ရှိပြီး အလုပ်ဗီဇာဖြင့် ရက် ၇၀ ခွင့်ပြုမည်ဖြစ်ကာ သက်တမ်းကျော်လွန်ပါက ဒဏ်ကြေးငွေ ပေးဆောင်ရမည် ဖြစ်ကြောင်းလည်း သိရသည်။
ယင်းသို့ ၀င်ရောက်ပြီးပါက ခရီးသွား ဧည့်သည်များသည် ရန်ကုန်၊ နေပြည်တော်၊ မန္တလေး အပါအ၀င် နိုင်ငံတော်မှ တရားဝင် ဖွင့်လှစ်ထားသည့် မည်သည့်ထွက်ပေါက်မှမဆို ပြန်လည်ထွက်ခွာခွင့်ရှိကြောင်း၊ နယ်စပ်ဖြတ်ကျော် ဂိတ်များမှ ၀င်ရောက်လည်ပတ်ခွင့် ပြုရာ၌ ဗီဇာနှင့် နိုင်ငံကူးလက်မှတ် ပါရှိရမည်ဖြစ်ပြီး ဗီဇာအမျိုးအစား၊ နေထိုင်ခွင့် သက်တမ်းအလိုက် သတ်မှတ်ထားသည့် နှုန်းထားအတိုင်း ကောက်ခံမည်ဖြစ်ကြောင်း သိရသည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။