ရုံးချိန်းများမှ ရုန်းမထွက်နိုင်သေးသည့် ရဲမင်းဦး

ရန်ကုန်မြို့ သာကေတမြို့နယ် တရားရုံးမှ ပုဒ်မ(၂)ခုဖြင့် တရားစွဲဆိုခြင်းခံထားရသူ ကိုရဲမင်းဦးကို ပုဒ်မပြောင်းလဲကာ တရားစွဲမှုပြုလုပ်ခဲ့ကြောင်း အဆိုပါမြို့နယ်တရားရုံးက သိရှိရသည်။

 

သာကေတမြို့နယ်တရားရုံး၌ တရားလိုသည် ကိုရဲမင်းဦးအား စွဲဆိုထားသည့် ပုဒ်မ ၁၅၃ (က) အား ရုပ်သိမ်းရန်တောင်း ဆိုခြင်းကို  တရားရုံးမှ ခွင့်ပြုခဲ့ပြီး တရားလိုမှ ပုဒ်မ ၅၀၅ (ခ) ဖြင့် ပြောင်းလဲကာ တရားစွဲဆိုမှုကိုလည်း တရားရုံးမှ ခွင့်ပြုကြောင်း သိရှိရသည်။

 

ဇွန်လ(၃)ရက်နေ့ ရုံးချိန်းတွင် တရားလိုအနေဖြင့် ပုဒ်မ ၁၅၃ (က) ဖြင့် တရားစွဲဆိုထားသော အမှုကို သက်သေခံပစ္စည်း ပြသရန် ချိန်းဆိုသည့်ရက်ဖြစ်သော်လည်း သက်သေခံပစ္စည်းပြနိုင်ခဲ့ခြင်း မရှိဘဲ ပုဒ်မပြောင်းလဲတရားစွဲဆိုခဲ့ကြောင်း ကိုရဲမင်းဦး၏ အမှုလိုက်ရှေ့နေထံက သိရှိရသည်။

 

တရားလိုမှ ပုဒ်မ ၁၅၃ (က) အမျိုးသားတစ်စုနှင့် တစ်စု ရန်ငြိမ်းထားစေအောင် ပြုလုပ်သောအမှုအား ရုပ်သိမ်းကာ ပုဒ်မ ၅၀၅ (ခ) နိုင်ငံတော် အကြည်ညိုပျက်စေမှုဖြင့် ပြောင်းလဲတရားစွဲဆိုခဲ့ခြင်းဖြစ်သည်။ 

 

"အမှုချိန်းထားတာက အသံဖိုင်ကို သက်သေခံအဖြစ် လက်ခံခြင်းရှိမရှိ တရားရုံးက အမိန့်ချဖို့ ချိန်းထားတာ အဲ့ဒါကို တရားလိုဘက်ကနေ အမှုကို ရုပ်သိမ်းဖို့လျှောက်တယ်။ တရားရုံးကနေရုပ်သိမ်းခွင့်ပြုလိုက်တယ်။ ကိုရဲမင်းဦးကို တရားရှင်လွှတ်လိုက်တယ်။ နောက်တစ်နာရီလောက်ကြာတော့ တရားလိုကနေ ပြစ်မှုဆိုင်ရာ ဥပဒေပုဒ်မ ၅၀၅ (ခ)နဲ့ တရားထပ်စွဲတယ်။ တရားရုံးကလက်ခံတယ်။ ရုံးချိန်းကို ထပ်ပေးလိုက်တယ်။" ဟု ကိုရဲမင်းဦး၏ ရှေ့နေ ဦးကျော်ဟိုးက ပြောသည်။

 

မေလ(၂၀)ရက်နေ့တွင် တရားလိုမှ သက်သေရုံးချိန်းခေါ်ယူရာ၌ ကိုရဲမင်းဦးသည် ဖေဖော်ဝါရီလအတွင်းက သာကေတမြို့နယ်အတွင်း ဖြစ်ပေါ်ခဲ့သည့် ဘာသာရေးအဆောက်အအုံဆောက်လုပ်မှုနှင့် ပတ်သက်၍ ပြသာနာ ကြီးထွားအောင် လုပ်ဆောင်စေခဲ့ကြောင်း ရန်ကုန်တိုင်း ရဲတပ်ဖွဲ့မှူး ဒုရဲမှူး ဦးမြင့်မောင်က ထွက်ဆိုခဲ့သည်။

 

"တခြားပုဒ်မက သူတို့တွေ အနေနဲ့ တရားစွဲဆိုဖို့အတွက် သိပ်အဆင်မပြေဘူးနဲ့တူပါတယ်။ ထိထိ ရောက်ရောက် အပြစ်ပေး ဒဏ်ပေးလို့မရဘူးထင်တယ် ဒါကြောင့် နောက်တစ်မှုပြောင်းပုံရတယ်။ ဒါက ကျွန်တော်အမြင်ပါ။ ၁၅၃ကို ပြန်ပြီး ရုပ်သိမ်းလိုက်တာ အမှုကို ရုပ်သိမ်းလိုက်ပြီဆိုတော့ ၀မ်းသာသွားတာ ပြီးတော့မှနောက်တစ်မှု ပြန်တတ်လိုက်တာ။"ဟု ကိုရဲမင်းဦး၏ အကိုဝမ်းကွဲ ကိုဖိုးသားက ပြောသည်။

 

ရုံးချိန်းများတွင် ပုဒ်မ ၅၀၅ (ခ) တစ်မှုတည်းဖြင့်သာ ရုံးထုတ်တော့မည်ဖြစ်ပြီး ဇွန်လ(၁၃)ရက်နေ့ တွင် ကျောက်တံတား တရားရုံး ၊ ဇွန်(၁၄)ရက်နေ့တွင် ဗဟန်းတရားရုံးတွင် နှင့် ဇွန်(၁၇)ရက်နေ့တွင် သာကေတ တရားရုံးတို့၌ ဆက်လက်ရုံးထုတ်သွားမည် ဖြစ်ကြောင်း သိရသည်။