အမေရိကန်မှ ပေးအပ်သည့် USAID လူ့အခွင့်အရေးဆိုင်ရာ အကူအညီအတွက် မြန်မာနိုင်ငံကို အမေရိကန်ဒေါ်လာ သန်း ၁၇၀ တိုးမြှင့်ထောက်ပံ့လျက် ရှိကြောင်းသိရသည်။ USAID အနေဖြင့် မြန်မာနိုင်ငံအပေါ် အမေရိကန်၏ စီးပွားရေး ပိတ်ဆို့ မှုကြောင့် အကူအညီများ ရပ်ဆိုင်းထားရာမှ နှစ်ပေါင်း ၂၄ နှစ် ကြာပြီးနောက်တွင် ယခုကဲ့သို့ ပြန်လည်၍ ကူညီထောက်ပံ့မှုများ စတင်ပြုလုပ်ခဲ့ခြင်း ဖြစ်ကြောင်းသိရသည်။
"အမေရိကန်က မြန်မာနိုင်ငံအပေါ် စီးပွားရေး ပိတ်ဆို့ထားတဲ့ အချိန်က USAID အနေနဲ့ ဒီမှာ ရုံးခန်းဖွင့်ပြီး လုပ်တာမျိုး မရှိခဲ့ဘဲ ပြည်တွင်းမှာရှိတဲ့ တခြားပြည်ပ လူမှုရေး အဖွဲ့အစည်းတွေမှာ ပူးပေါင်းပါဝင်ပြီး မြန်မာနိုင်ငံကို ကူညီခဲ့တာမျိုးတွေ ရှိပါတယ်။ အခုအစိုးရသစ် လက်ထက်ရောက်လာတော့ အမေရိကန်က ပိတ်ဆို့မှုတွေ ဖြေလျှော့လိုက်တဲ့အတွက် ဒီအဖွဲ့က ၂၀၁၂ ခုနှစ် ဧပြီလကတည်းက ဒီမှာ ရုံးလာဖွင့်ပြီး ပြန်ဝင်လာခဲ့တယ်။ အခုပြည်တွင်းမှာရှိတဲ့ ပြည်ပလူမှုရေး အဖွဲ့အစည်း အချို့နဲ့ USAID တို့ ပူးပေါင်းလုပ်ဆောင်နေတဲ့ စီမံကိန်းတွေလည်း လက်ရှိအထိ လုပ်ဆောင်နေပါသေးတယ်။ အရင်ကတော့ ကျန်းမာရေးနဲ့ စီးပွားရေးဆိုင်ရာ ထောက်ပံ့မှုတွေမှာ အများဆုံး လုပ်ဆောင်ပေးခဲ့ပြီး သဘာဝဘေးအန္တရာယ် ကျရောက်ခဲ့တဲ့ ဒေသတွေမှာလည်း ကယ်ဆယ်ရေးနဲ့ ပြန်လည်ထူထောင်ရေး လုပ်ငန်းတွေကိုလည်း လုပ်ဆောင်ပေးခဲ့ပါတယ်" ဟု Marie Stopes International မှ တာဝန်ရှိသူ တစ်ဦးက ပြောကြားသည်။
USAID နှင့် ပြည်ပလူမှုရေး အဖွဲ့အစည်းများဖြစ်သည့် Pact Cesvi၊ Marie Stopes International နှင့် ကုလသမဂ္ဂ အဖွဲ့အစည်းတစ်ခုဖြစ်သည့် UN-Habitat တို့ ပူးပေါင်း၍ ၂၀၁၁ ခုနှစ်မှစ၍ ရန်ကုန်တိုင်းဒေသကြီး အပါအ၀င် စစ်ကိုင်း၊ မကွေး၊ မန္တလေးစသည့် မြန်မာနိုင်ငံ အလယ်ပိုင်းဒေသများ၌ မိခင်နှင့်ကလေး ကျန်းမာရေးဆိုင်ရာ လုပ်ငန်းများ၊ အသေးစား ချေးငွေလုပ်ငန်းများ၊ စိုက်ပျိုးရေးနှင့် ဆက်စပ်သည့် လုပ်ငန်းများ၊ ရေနှင့်ပတ်ဝန်းကျင် သန့်ရှင်းရေး လုပ်ငန်းများ စသည့်လုပ်ငန်းများတွင် ပါဝင်လုပ်ကိုင်လျက်ရှိကြောင်း သိရသည်။
USAID သည် မြန်မာနိုင်ငံသို့ အမေရိကန်သမ္မတ ဘားရတ်အိုဘားမား လာရောက်ခဲ့ပြီးနောက် လူသားချင်း စာနာထောက်ထားမှုဆိုင်ရာ ထောက်ပံ့မှုများနှင့် ဒီမိုကရေစီ ပြုပြင်ပြောင်းလဲမှုများအတွက် တိုးမြှင့်ထောက်ပံ့ ပေးမည်ဟုလည်း USAID ၏ တရားဝင် ၀က်ဘ်ဆိုက်တွင် ကြေညာခဲ့ပြီးဖြစ်ကြောင်း သိရသည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။