မီးလောင်မှုကို ဒေသခံပြည်သူများ ၀ိုင်းဝန်းငြှိမ်းသတ်နေစဉ် (ဓာတ်ပုံ-သက်ထိန်ဝင်း (ပခုက္ကူ))
ပခုက္ကူမြို့နယ်၊ မြို့ခင်းသာအုပ်စု၊ တဲကုန်းကျေးရွာတွင် ဧပြီလ ၆ ရက်၌ မီးလောင်ကျွမ်းမှု ဖြစ်ပွားရာ နေအိမ် ၂၂ လုံး မီးလောင်ဆုံးရှုံးခဲ့ကြောင်း သတင်းရရှိသည်။
ဖြစ်စဉ်မှာ ၂၀၁၃ ခုနှစ်၊ ဧပြီလ ၆ ရက်၊ ညနေ ၄ နာရီခွဲ ခန့်တွင် ပခုက္ကူမြို့နယ်၊ မြို့ခင်းသာအုပ်စု တဲကုန်းကျေးရွာရှိ ဦးစိုးသိန်း၏ နေအိမ်ရှိ မီးဖိုမီးမှတစ်ဆင့် မီးကူးစက်လောင်ကျွမ်းမှု ဖြစ်ပွားခဲ့ရာ တဲကုန်းကျေးရွာရှိ နေအိမ် ၂၂ လုံး အပါအ၀င် အိမ်မွေးတိရိစ္ဆာန် အချို့ပါ မီးလောင်ဆုံးရှုံးခဲ့ကြောင်း သိရသည်။
မီးကြွင်းမီးကျန်များ လောင်ကျွမ်းနေသည်ကို တွေ့ရစဉ် (ဓာတ်ပုံ-သက်ထိန်ဝင်း (ပခုက္ကူ))
မီးလောင်ကျွမ်းမှုကို ညနေ ၅ နာရီ ခန့်တွင် အခြားနေအိမ်များသို့ မကူးစက်ရန် ထိန်းသိမ်းနိုင်ခဲ့ပြီး ည ၈ နာရီအထိ မီးကြွင်းမီးကျန်များအား ဆက်လက်ငြိမ်းသတ်နေကြောင်း သတင်းရရှိသည်။
"မီးဖိုမီးက စလောင်တယ်လို့ပဲ သိရသေးတယ်။ ဘယ်လိုဘယ်ပုံ လောင်တယ်ဆိုတာ မသိရသေးဘူး။ မီးလောင်တာက တအားမြန်တော့ ဘာပစ္စည်းမှ သယ်ချိန် မရလိုက်ဘူး၊ လူကိုပဲ မနည်းလွတ်အောင် ပြေးရတယ်။ ရေကလည်း ရှားတယ်။ ရွာပတ်ဝန်းကျင်ကလည်း တအားခြောက်သွေ့နေတော့ မီးကူးတာ မြန်လွန်းသွားတာ။ အနီးနားရွာက လူတွေကူညီကြလို့ အတော်လေး သက်သာသွားတာ။ လူနေအိမ် ၂၂ လုံးအပြင် ဆိတ်တွေရော ပါသွားတယ်။ အချိန်ကလည်း တောထဲသွားချိန်ဆိုတော့ ပစ္စည်းသယ်မဲ့လူက မရှိဘူး။ ဆုံးရှုံးမှုတန်ဖိုး အတော်များတယ်။ မီးဘေးဒုက္ခသည်တွေကတော့ လောလောဆယ် ဘုန်းကြီးကျောင်းနဲ့ နီးစပ်ရာ အိမ်တွေမှာ နေကြရတယ်" ဟု မီးလောင်မှုကြောင့် နေအိမ်ဆုံးရှုံးသွားသူ ဒေါ်မြင့်စိန်က ပြောသည်။
မီးလောင်မှုကို ဒေသခံပြည်သူများ ၀ိုင်းဝန်းငြှိမ်းသတ်နေစဉ် (ဓာတ်ပုံ-သက်ထိန်ဝင်း (ပခုက္ကူ))
အဆိုပါ မီးလောင်မှုဖြစ်စဉ်သို့ ပခုက္ကူမြို့နယ် မီးသတ်တပ်ဖွဲ့မှ မီးသတ်ယာဉ် ၁၀ စီး၊ သန္ဓေမီးသတ် ၁၀ ဦး၊ အရန်မီးသတ် ၅၀ ဦးလာရောက်ငြှိမ်းသတ်ခဲ့ပြီး ဒေသခံပြည်သူများမှလည်း ၀ိုင်းဝန်းကူညီ ငြိမ်းသတ်ခဲ့ကြကြောင်း သိရသည်။
"မီးလောင်မှုကြောင့် လူနေအိမ်ရော၊ တဲလေးတွေရော အားလုံးပေါင်း ၂၅ လုံး ပါသွားတယ်။ ညနေ ၅ နာရီလောက်မှာတော့ မီးစွယ်ကျိုးသွားပါတယ်။ လမ်းကြောင်း မကောင်းတာရော၊ မြို့နဲ့လှမ်းတာရောကြောင့် မီးငြိမ်းရတာ နည်းနည်းအဆင်မပြေဘူး" မီးသတ်တပ်ဖွဲ့ဝင်တစ်ဦး ကပြောသည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။