NLD ကျန်းမာရေး ကွန်ရက်၏ ရန်ပုံငွေ ရှာဖွေပွဲကို ဧပြီ ၆ ရက်က ရန်ကုန်မြို့၊ Park Royal ဟိုတယ်တွင် ပြုလုပ်ခဲ့ပြီး အလှူငွေ စုစုပေါင်း ကျပ်သိန်းလေးထောင်ခန့် ရရှိခဲ့သည်။
အဆိုပါပွဲသို့ အမျိုးသား ဒီမိုကရေစီ အဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည် တက်ရောက်ခဲ့ပြီး ကျန်းမာရေး ကဏ္ဍတွင် ဆောင်ရွက်သင့်သည့် အချက်များနှင့် ပတ်သက်သည်များကို ပြောကြားခဲ့သည်။
ဒေါ်အောင်ဆန်းစုကြည်က ကျန်းမာရေး စောင့်ရှောက်မှုများနှင့် ပတ်သက်၍ ဆေးရုံအသစ်များ ဆောက်လုပ်နေခြင်းထက် ဆရာဝန်များ၊ သူနာပြုများ၊ ကျန်းမာရေး စောင့်ရှောက်မှု ၀န်ထမ်းများကို ဝေးလံခေါင်သီသည့် ဒေသများသို့ သွားရောက်ကာ တာဝန်ထမ်းဆောင်စေနိုင်မည့် အချက်များကို လုပ်ဆောင်ပေးခြင်းက ပိုအရေးကြီးကြောင်းနှင့် လက်ရှိ လိုအပ်နေသည်မှာ အမျိုးသား ကျန်းမာရေး အဆင့်မြှင့်တင်ရန်ဖြစ်ကြောင်း စသည်ဖြင့် ထည့်သွင်းပြောကြားခဲ့သည်။
"ကျွန်မ တစ်ချို့ဆေးရုံတွေ တွေ့ဖူးတယ်။ အခွံတွေချည်းပဲ ဖြစ်နေတယ်။ ဆရာဝန်တွေ မရှိတော့ လူနာတွေကလည်း လာမပြချင်ကြတော့ဘူး။ ဆရာဝန်တွေကလည်း နယ်တွေကို မသွားချင်ကြဘူး။ ဘာဖြစ်လို့လဲဆိုတော့ နေစရာ အိမ်မရှိလို့။ နေစရာ အိမ်တောင်မှ မရှိဘူးဆိုရင် ဆရာဝန်တွေ လာဖို့ကိုလည်း မျှော်လင့်လို့ မရပါဘူး" ဟု ပြောသည်။
နိုင်ငံရပ်ခြားတွင် နေထိုင်နေသည့် ဆရာဝန်များ အနေဖြင့်လည်း မြန်မာနိုင်ငံသို့ ယာယီအားဖြင့် ပြန်လာနိုင်ပါက ပြန်လာပြီး ပြည်တွင်း ဆရာဝန်များကို အကူအညီများနှင့် လေ့ကျင့်မှုများ ပေးစေလိုကြောင်း၊ ယင်းကဲ့သို့ လုပ်ဆောင်ပေးခြင်းမှာ တိုင်းပြည်အတွက် ကြီးမားသည့် အထောက်အကူ ဖြစ်သွားစေနိုင်ကြောင်း၊ ရန်ကုန်ဆေးရုံကြီးကိုလည်း အဆင့်မြှင့်တင်မှုများ ပြုလုပ်သွားရမည်ဖြစ်ကြောင်း စသည်ဖြင့်လည်း ဒေါ်အောင်ဆန်းစုကြည်က ဆက်လက်ပြောကြားသည်။
"ရန်ကုန်ဆေးရုံကြီးဟာ မြန်မာနိုင်ငံမှာ အကြီးဆုံး ဖြစ်ရုံသာမက အခုအချိန်ထိလည်း အကောင်းဆုံး ဖြစ်နေပါသေးတယ်။ အဲဒီလို တိုင်းပြည်တစ်ပြည်ရဲ့ အကောင်းဆုံး ဆေးရုံဟာ ဘယ်လောက် အဆင့်အတန်း ရှိသလဲဆိုတာကို ကြည့်လိုက်တာနဲ့ အကူအညီတွေ ဘယ်လောက် လိုအပ်နေပြီလဲဆိုတာ သိရပါလိမ့်မယ်" ဟု ၎င်းက ပြောသည်။
ဆင်းရဲသည့် မိသားစုများတွင် တစ်ယောက်ယောက် ကျန်းမာရေး ချို့တဲ့သွားပါက မိသားစု တစ်စုလုံး နာလန်မထူနိုင်အောင် ဖြစ်သွားလေ့ရှိကြောင်း၊ တစ်ခါတစ်ရံတွင် လူနာအား ဆေးဖိုးကို ကိုယ်တိုင်ပေးခိုင်းခြင်းသည် လူ့အသက်ကို အရောင်းအ၀ယ် လုပ်သည်နှင့် တူကြောင်း၊ ထို့ကြောင့် ဆေးဝါးထောက်ပံ့ခြင်းသည်လည်း အလွန်အရေးကြီးကြောင်းလည်း ဒေါ်အောင်ဆန်းစုကြည်က ပြောသည်။
ထို့ကြောင့် NLD ကျန်းမာရေး ကွန်ရက်အနေဖြင့် ပထမဦးဆုံးအနေဖြင့် ဆရာဝန်ကောင်းကောင်း မရှိသည့် ဒေသများသို့ အရည်အချင်းပြည့် ဆရာဝန်များ စေလွှတ်သွားမည်ဖြစ်ကြောင်းနှင့် ဒုတိယအဆင့်အနေဖြင့် ဆေးရုံများတွင် ဆေးဝါး လိုအပ်များကို ထောက်ပံ့ပေးသွားမည်ဖြစ်ကြောင်း ၎င်းက ပြောသည်။
အလှူငွေများ အနေဖြင့် ဦးဇော်ဇော် (Max Myanmar) ၏ ဧရာဝတီ ဖောင်ဒေးရှင်းမှ ကျပ်သိန်း (၅၀၀)၊ ဦးအောင်မိုးကျော် (IBTC) က ကျပ်သိန်း (၅၀၀)၊ အာရှတော်ဝင် ဆေးရုံပိုင်ရှင် ဒေါက်တာမြတ်သူက ကျပ်သိန်း (၁၀၀)၊ တရုတ်ပြည်သူ့ သမ္မတနိုင်ငံ သံရုံးက ကျပ် (၁၀) သိန်း စသည်ဖြင့် လှူဒါန်းခဲ့ခြင်း ဖြစ်သည်။
NLD အမျိုးသား ကျန်းမာရေး ကွန်ရက်ကို မြန်မာနိုင်ငံ အမျိုးသား ကျန်းမာရေး အဆင့်အတန်း တိုးတက်မြင့်မားလာအောင် ကူညီပေးနိုင်ရန်ဟူသော ရည်ရွယ်ချက်ဖြင့် ဖေဖော်ဝါရီ ၉ ရက်နေ့က ဆေးရုံအုပ်ကြီးဟောင်းများ အပါအ၀င် အဖွဲ့ဝင် ၁၄ ဦးဖြင့် စတင်ဖွဲ့စည်းခဲ့ခြင်း ဖြစ်သည်။
အဖွဲ့၏ ရည်မှန်းချက်များအဖြစ် ပြည်သူလူထုအကြား အခြေခံ ကျန်းမာရေး စောင့်ရှောက်မှု လုပ်ငန်းများ တိုးတက်လာစေရေး ကူညီဆောင်ရွက်ရန်၊ ကျန်းမာရေး စောင့်ရှောက်မှု တာဝန်ရှိသူများကို ထိခိုက်ဒဏ်ရာနှင့် အရေးပေါ် အသက်ကယ် သင်တန်းများ ပေးရန်၊ ပြည်တွင်းပြည်ပမှ ပညာရှင်များဖြင့် စဉ်ဆက်မပြတ် ဆေးပညာ သင်ကြားရေး အစီအစဉ်များ ဆောင်ရွက်ရန်ဟူသော အချက်များ ပါဝင်သည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။