(၈)ရက်(၈)လ(၈၈)ခုနှစ် အထိမ်းအမှတ်နေ့အား မြန်မာနိုင်ငံသမိုင်းဝင် နေ့တစ်နေ့အဖြစ် တရားဝင် သတ်မှတ်ပေးရန် ၂၄နှစ်မြောက် ရှစ်လေးလုံး နှစ်ပတ်လည်နေ့အခမ်းအနား သဘောထား ကြေညာ ချက်တွင် ထည့်သွင်းထားကြောင်း (၈၈)ကျောင်းသား ကိုတိုးကျော်လှိုင်က ရှစ်လေးလုံး နှစ်ပတ်လည် နေ့အခမ်းအနားတွင် ပြောကြားခဲ့သည်။
“ နိုင်ငံရေးသဘောထား ကြေညာချက်မှာ ရှစ်လေးလုံး ဖြတ်သန်းမှု၂၄ နှစ်တာကာလမှာ ကျွန်တော်တို့ ဖြစ်စေချင်တဲ့ တိုက်တွန်းမှုတစ်ခု ထည့်သွင်းထားတာ ရှိပါတယ်၊ အဲဒါကတော့ ၈ ရက် ၈ လ ၈၈ (၈)လေးလုံး အခမ်းအနား အဲဒီ့ နေ့ဟာ ကျွန်တော်တို့ မြန်မာနိုင်ငံမှာ သမိုင်းဝင်နေ့တစ်နေ့ ဖြစ်သင့်ပါတယ်၊ သမိုင်းဝင်နေ့တစ်နေ့ ဖြစ်လည်း ဖြစ်ရပါမယ်၊ ဒါကြောင့် ဒီ ၈၈၈၈ ကို မြန်မာနိုင်ငံမှာ သမိုင်းဝင်နေ့တစ်နေ့အဖြစ် သတ်မှတ်ပေးဖို့ လိုအပ်တယ်လို့ ကျွန်တော်တို့က ယုံကြည်ပါတယ်’’ ဟု၈၈ ကျောင်းသား ကိုတိုးကျော်လှိုင်ကသြဂုတ်လ(၈)ရက်နေ့က တော်ဝင်နှင်းဆီတွင် ပြောကြား ခဲ့ခြင်း ဖြစ်သည်။
အဆိုပါနေ့သည် တစ်ပါတီစနစ်ချုပ်ငြိမ်းရေး၊ စစ်အာဏာရှင်စနစ်ကျဆုံးရေး၊ဒီမိုကရေစီရေးနှင့် လူ့အခွင့် အရေး များကို မြန်မာတစ်နိုင်ငံလုံးတွင်ရှိသည့် လူတန်းစားအသီးသီးမှ ဆန္ဒဖော်ထုတ် ခဲ့ကြသော သမိုင်းဝင် နေ့တစ်နေ့ဖြစ်သည်။
ယနေ့နိုင်ငံတော်အစိုးရအဖွဲ့အစည်းအနေဖြင့် ဒီမိုကရေစီရေးနှင့် လူ့အခွင့်အရေးများကို အာမခံကတိ ကဝတ်များးနှင့် ဒီမိုကရေစီနိုင်ငံတော်သစ်ဆီသို့သွားနေသည်ဟု ယုံကြည်ကြောင်း ထို ယုံကြည်ချက် အား ပိုမို ခိုင်မာလာစေရန် ရှစ်လေးလုံး နှစ်ပတ်လည်နေ့အား မြန်မာန်ိုင်ငံ၏သမိုင်းဝင်နေ့အဖြစ် သတ်မှတ်ပေးရန်လိုအပ်ကြောင်းကိုလည်း ကိုတိုးကျော်လှိုင်က ဆက်လက်ပြောကြားခဲ့သည်။
၈ရက် ၈လ ၈၈ (၂၄)နှစ် မြောက်ကျင်းပရေးကော်မတီမှ ထုတ်ပြန်ကြေငြာသော သဘောထား ကြေညာချက်တွင် အချက်(၇)ချက်ပါရှိပြီး ၄င်းအချက်များအား ၈၈ ကျောင်းသားခေါင်းဆောင် ကိုညိုထွန်းမှ ဖတ်ကြားသွားခဲ့သည်။
အဆိုပါအခမ်းအနားသို့ နိုင်ငံရေးပါတီအသီးသီးမှ အဖွဲ့ဝင်များနိုင်ငံရေး တက်ကြွလှုပ်ရှားသူများနှင့် ပြည်သူများ အပါအဝင် လူဦးရေ(၁ဝဝဝ)ကျော် တက်ရောက်ခဲ့ကြပြီး နံနက်(၉)နာရီအချိန်တွင် စတင်၍(၁၁)နာရီ (၃ဝ)မိနစ်တွင် ပြီးဆုံးခဲ့သည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။