မိမိကိုယ်တိုင်ရိုက်ကူးထုတ်လုပ်ခဲ့သောအခွေအား ခိုးကူးခွေအဖြစ် ရောင်းချခဲ့သူများကို တရားဥပဒေ အရ အတိုင်း ရင်ဆိုင်ဖြေရှင်းသွားမည်ဖြစ်ကြောင်း ကချင်သရုပ်ဆောင်၊အဆိုတော်ဒေါင်လွဏ်းက ဆိုသည်။
“ ခုလောလောဆယ်မှာက တရားဥပဒေနဲ့ပဲ ရင်ဆိုင်မယ်၊ နစ်နာကြေးကိုလည်း တရား ဥပဒေ အတိုင်း တောင်းမယ်၊ တရားသူကြီးက ဘယ်လို စီရင်ချက်ချမလဲ အဲ့ဒီပေါ်မှာ ကျွန်တော်တို့က ကျေကျေနပ်နပ် လက်ခံမယ်၊”ဟု ၄င်းက ပြောသည်။
ကိုဒေါင်လွဏ်းသည် ခိုးကူးခွေရောင်းချသူ (၄) ဦးအား ဖမ်းဆီးထားမိပြီဖြစ်ကြောင်းနှင့် ယင်းကိစ္စ္စအား မြန်မာနိုင်ငံရုပ်ရှင်အစည်းအရုံး ဥက္ကဌကချင်ပြည်နယ် ဝန်ကြီးချုပ်၊ ရဲမင်းကြီး၊ တရားသူကြီးများ ထံသို့ အမှုအမြန်ဆုံးစီရင်ပေးပါရန် စာရေးတင်ပြ ထားပြီးဖြစ်ကြောင်းကိုလည်း သိရှိရသည်။
ပြီးခဲ့သည့် ဇွန်လကုန်ပိုင်းတွင်း ကိုဒေါင်လွဏ်းမှ ရဲတပ်ဖွဲ့ (၈) ဦးခန့်နှင့် ကချင်ပြည်နယ် မြစ်ကြီးနားမြို့ရှိ USA Lum Tuလျှပ်စစ်ပစ္စည်းအရောင်းဆိုင်တွင် “အမုန်း၌စတင်ခဲ့သောအချစ်” VCD ဇာတ်ကား အား ခိုးကူးရောင်းချသည်ဟု စွပ်စွဲကာ ဆိုင်ပိုင်ရှင်ထံ သိန်း (၆ဝဝ) တောင်းဆိုခဲ့ရာ ဆိုင်ပိုင်ရှင်မှ သိန်း (၂ဝဝ)တန် ခြံဝင်းတစ်ခုအား ကချင်ရိုးရာဓလေ့ထုံးအရ(ရှဝရှား) လျော်ပေးလိုက်သည်။
ထို့ပြင် ရှမ်းပြည်နယ်တွင်လည်း ဖမ်းဆီးမိသည့် ခွေကူးရောင်းချသူ တစ်ဦးထံမှ သိန်း (၂ဝဝ) တောင်းဆိုကာ ကချင်ရိုးရာ ဓလေ့ထုံးအရအမှုညှိနှိုင်းပြီးစီးခဲ့ကြောင်းကိုလည်း သိရှိရသည်။
ယခုအခါ ကိုဒေါင်လွဏ်းမှ ၄င်းခွေ ရောင်းချသူများအား ကချင်ရိုးရာဓလေ့ထုံးဖြင့် အမှုမပြီးစေလိုပဲ တရားဥပဒေအတိုင်း တရားရုံးတွင်သာ ရင်ဆိုင်သွားမည်ဖြစ်ကြောင်း ပြောသည်။
“ အခု ကျွန်တော်ခိုးကူးခွေတွေ လိုက်ဖမ်းတာကို သူများတွေက ကချင်အချင်းချင်း လိုက်ဖမ်းနေတယ်၊ ဘာညာဆိုပြီး ပြောနေကြတယ်၊ ဒီကိစ္စက ညှိလို့မရဘူးလေ၊ တစ်ချို့ကချင်တွေကလည်း နားမလည်ကြဘူး၊ ခုကျွန်တော်က တရားဥပဒေအတိုင်းပဲ သွားမယ်၊ ဟိုတစ်ခေါက်ပြီးသွားတဲ့ အမှုတွေကတော့ က္မန်တော်တို့ ကချင်ရိုးရာအတိုင်းသာ ပြီးသွားတယ်၊ရှမ်း၊ကုလားတွေကိုဆို ကျွန်တော်တို့ညှိဖို့လမ်းလည်းမရှိဘူး၊ ကျွန်တော် လုပ်နေတဲ့အလုပ်က သိန်းထောင်၊သောင်း ကုန်တယ်။ ကျွန်တော် ဒီလိုနာမည်ရအောင် ဘယ်လောက်ကြိုးစားထားတယ်၊ ဘယ်လောက် ရင်းနှီး လိုက်ရတယ်၊ ကျွန်တော်တောင်းတဲ့ သိန်း (၅ဝဝ) ဆိုတာက ပါးပါးလေးပဲ၊ သဘောတစ်ခုပေ့ါ၊ အဲ့လောက်နဲ့ပဲ ကျွန်တော် တန်ဖိုးမဖြတ်ချင်ဘူး” ဟု ၄င်းက ဆက်ပြောသည်။
ကိုဒေါင်လွဏ်းသည် ကချင်ဇာတ်လမ်းများကို အဓိထား ရိုက်ကူးထုတ်လုပ်သူဖြစ်ပြီး မြန်မာနိုင်ငံ ရုပ်ရှင်အစည်းအရုံးတွင် ထုတ်လုပ်ခွင့် မှတ်ပုံတင်ရရှိထားသူဖြစ်သည်။ ၄င်း ရိုက်ကူးသည့် DVDဇာတ်လမ်း (၈) ကား ရှိပြီဖြစ်ကြောင်း သိရသည်။ အချစ်နှင့်အဝေးဆုံး ကမ္ဘ္ဘာ၊ ရေသူမ၊အမှန်း၌စတင်ခဲ့သော အချစ်၊ အစ်ကိုကြီးက အဖအရာ စသည့် ဇာတ်ကားများအား ရိုက်ကူးခဲ့သည်။
နောက်ထပ် အိမ်ထောင်ရေးဇာတ်ကား တစ်ကားကိုလည်း စတင်ရိုက်ကူးနေပြီဖြစ်သည်။
“ ကိုဒေါင်လွဏ်းတို့က သေချာ စည်းစနစ်နဲ့ လုပ်ထားတယ်၊ Professional ပေါ့၊ ဆင်ဆာရှိတယ်၊ ထုတ်လုပ်ရေး လက်မှတ် အကုန်လုံးရှိတယ်၊ သူတို့လုပ်တာကို အပြစ်ပြောလို့မရဘူး၊ကျွန်တော်ဆို လည်း လုပ်မှာပဲ ဘာလို့လဲဆိုတော့ ပိုက်ဆံအများကြီးကုန်မှ လုပ်ထားတာ၊ခွေခိုးကူးတွေက အိမ်မှာ ထိုင်ပြီးတော့ ကူးပြီးဖြန့်တယ်၊ ဘယ်လောက်ထိ ရင်နာဖို့ကောင်းလဲ၊ ကျွန်တော်ကတော့ လုပ်သင့် တယ်ထင်တယ်၊ ဒါမှ တစ်ယောက်နဲ့ တစ်ယောက် Respect ဖြစ်မှာ” ဟု ကချင်အဆိုတော် အဘားဒီးက ပြောသည်။
ကချင်အနုပညာရှင်များအတွက် ကာကွယ်ပေးနိုင်မည့် ကချင်အနုပညာရှင် အစည်းအရုံးကိုလည်း ဖွဲ့စည်းရန် အကောင်အထည်ဖော် ဆောင်ရွက်နေပြီဖြစ်ကြောင်း၊ အဆိုပါ အစည်းအရုံးအား အောက်တိုဘာလတွင် ညီလာခံကျင်းပကာ ဥပဒေကြမ်းများလည်း ရေးဆွဲသွားမည်ဖြစ်ကြောင်း သိရသည်။
ကိုဒေါင်လွဏ်းမှ ၄င်း ဇာတ်ကားခွေများအား ခိုးကူးရောင်းချနေသူ မည်သူ့ကို မဆို ဆက်လက် ဖမ်းဆီးသွားမည်ဖြစ်ကြောင်း ယခုကဲ့သို့သတိပေးစကားပြောကြားခဲ့သည်။
ကျွန်တော် ကချင်တွေကိုပဲ ဖမ်းနေတာ မဟုတ်ဘူး၊ ခွေခိုးကူးတဲ့ ကုလား၊ဗမာ၊ရှမ်း၊ တရုတ် အကုန်ဖမ်းတယ်။နောက်ဆုံးအချုပ်မှာက ကချင်တွေက ပါလာမြဲ၊ ခုက အားလုံးကိုဖမ်းမယ်၊ ခိုးကူးခွေရောင်းတဲ့ လုပ်တဲ့သူတွေကို ဖမ်းမယ်၊ ကချင်ဆိုလည်း ဖမ်းရမှာပဲ၊ သူတို့က လွယ်လွယ်နဲ့ပြီးမယ်ထင်နေတာ” ဟု ကိုဒေါင်လွဏ်းက ဆိုသည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။