သြဂုတ် ၂ ရက်က ပြုလုပ်သည့် ပြည်သူ့လွှတ်တော် အစည်းအဝေးတွင် မွန်ပြည်နယ်၊ ချောင်းဆုံမြို့နယ် ပြည်သူ့လွှတ်တော် ကိုယ်စားလှယ် ဦးလှမောင်(ခ) ဦးနိုင်လှမောင် မေးမြန်းသည့် ဓမ္မစေတီ ခေါင်းလောင်းကြီး ဆယ်ယူရေးနှင့် ပတ်သက်သော မေးမြန်းမှုကို ဖြေကြားရာတွင် အကူအညီ ပေးမည်ဟု ကမ်းလှမ်းထားသည့် စင်ကာပူ ကုမ္ပဏီသည် လိုအပ်သော အထောက်အထားများ ပြည့်စုံစွာ တင်ပြနိုင်ခြင်း မရှိသောကြောင့် ခွင့်ပြုချက် မပေးခဲ့ခြင်းဖြစ်ကြောင်း ယဉ်ကျေးမှု ၀န်ကြီးဌာန ဒုတိယ၀န်ကြီး ဦးသန်းဆွေက ရှင်းလင်းပြောကြားသည်။
ဒေါပုံမြစ်တွင် နစ်မြုပ်လျက်ရှိသော ဓမ္မစေတီ ခေါင်းလောင်းကြီးအား ၂၀၁၀ ခုနှစ်တွင် စင်ကာပူနိုင်ငံမှ SD Mark International LLP ကုမ္ပဏီမှ ကျွမ်းကျင်သည့် ပညာရှင်များ၊ သင်္ဘောများ ငှားရမ်းမှု အမေရိကန်ဒေါ်လာ ၁၀ သန်း အကုန်အကျခံကာ ရှာဖွေဆယ်ယူ သွားမည်ဟု ယဉ်ကျေးမှု ၀န်ကြီးဌာနသို့ ကမ်းလှမ်းခဲ့ခြင်း ဖြစ်ကြောင်း သိရသည်။
''ပြည်ပမှ ကုမ္ပဏီအနေဖြင့် ကမ်းလှမ်းလာသော စင်ကာပူ ကုမ္ပဏီသည် ကုမ္ပဏီ မိတ်ဆက်နှင့် အတွေ့အကြုံကိုသာ တင်ပြနိုင်ပြီး ငွေကြေးခိုင်ခိုင်မာမာ ရှိသည့်အထောက်အထား၊ သုတေသနပြုစု ဆောင်ရွက်မှုများ၊ အဆိုပါ ကုမ္ပဏီနှင့် ပတ်သက်၍ အခြားဆောင်ရွက်မှု မှတ်တမ်း အထောက်အထားများ ပြည့်စုံခိုင်လုံစွာ တင်ပြနိုင်မှုမရှိ၍ ကူညီခွင့်ပြုနိုင်ရေးအတွက် ထောက်ခံချက် ပေးနိုင်ခြင်းမရှိပါ။ ယဉ်ကျေးမှု ၀န်ကြီးဌာန တစ်ခုတည်း အနေဖြင့်လည်း ထောက်ခံခွင့်ပြု၍ မရပါ'' ဟု ဒုဝန်ကြီးက ပြောကြားသည်။
ဓမ္မစေတီ ခေါင်းလောင်းတော်ကို ဆယ်ယူရေး ကိစ္စရပ်တွင် တွေ့ကြုံနေရသည့် အခက်အခဲများမှာ ခေတ်မီနည်းပညာ ပစ္စည်းအပြည့်အ၀ မသုံးစွဲနိုင်ခြင်း၊ ခေါင်းလောင်းတော်ကြီး ရေတွင်ကျခဲ့သည့် အချိန်မှစ၍ နှစ်ပေါင်းငါးရာခန့်အကြာ ရေကြောင်းပြောင်းလဲမှု၊ နုန်းမြေပို့ချမှု၊ ပထ၀ီအနေအထား ပြောင်းလဲမှု၊ ငလျင်နှင့် မိုးလေ၀သ အန္တရာယ်များ ပေါ်ပေါက်မှု၊ မြို့ပြဧရိယာ ချဲ့ထွင်မှု၊ လူနေသိပ်သည်းမှု စသည့် အခက်အခဲများကြောင့် ဆယ်ယူရရှိရန် လျာထားသတ်မှတ်ထားသော အချိန်ကာလ မရှိသေးကြောင်း ယဉ်ကျေးမှုဒုဝန်ကြီးက ဆက်လက် ပြောကြားသည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။