၂၀၁၃-၁၄ ပညာသင်နှစ်တွင် အခြေခံပညာမူလတန်း မသင်မနေရ ကျင့်သုံးခြင်းသည် အခြေခံလူတန်းစားများ အတွက် အဆင်မပြေနိုင်ပဲ အခက်အခဲများစွာရှိနေသည်ဟု အခြေခံလူတန်းစားများက ဆိုသည်။
"ဒေါ်ကြီးတို့မှာ မြေးလေးနှစ်ယောက်ရှိတယ်။ သူတို့မိဘတွေကမရှိတော့ဘူး။ ဒေါ်ကြီးတို့လည်း မပြေလည်တဲ့ ကြားက ဒီ ဘ.က ကျောင်းလေးမှာထားပေးရတာ။ သူဖိုးအေဆို တစ်ရက် ၁၀၀၀-၁၅၀၀ လောက်ပဲ ၀င်ငွေ ရှိတာ။ မြေးလေး တစ်ယောက်လုပ်စာပဲ ရှိရတာ။ ဒီဖက်မှာ ကျောင်းထားဖို့မပြောနဲ့ နေစရာတောင်မရှိကြတဲ့ မိသားစုတွေ ရှိတယ်။" ဟု ကြည်မြင့်တိုင်တစ်ဖက်ကမ်းနေဒေါ်အုံးကြည်က ဆိုသည်။
၂၀၁၃-၂၀၁၄ ပညာသင်နှစ်တွင် အခြေခံပညာမှုလတန်း မသင်မနေရ ပညာသင်စနစ်အား စမ်းသပ်ကာလ အဖြစ် မြို့နယ် ၃ မြို့နယ်တွင်စတင်ကျင့်သုံးမည်ဖြစ်ကြောင်း ပညာရေးမှူးများထံမှ သိရသည်။
"ဒီနှစ်ကစပြီး ရန်ကုန်မှာဆို ဆိပ်ကြီး ခနောင်တို့မှာ မသင်မနေရပညာရေးစနစ်ကို စမ်းသပ်ကာလအဖြစ် စတင် ကျင့်သုံးမယ်။ အောင်လည်းအောင်မြင်မယ် ဘက်ဂျက်ကလည်းလုံလောက်မယ်ဆို ရှေ့ဆက်အကောင်အထည် ဖော်သွားဖို့ အစီအစဉ်တွေရှိပါတယ်။" ဟု ခရိုင်ပညာရေးမှူး ဦးအုန်လွင်ကဆိုသည်။
ကျောင်းဖွင့်စအချိန်များတွင် ကျောင်းတက်မှန်ကြသော်လည်း မိသားစုစီးပွားရေးအစဉ်မပြေမှုများကြောင့် ကျောင်းပျက်ရက်များလာ၍
ကျောင်းဆက်မတတ်နိုင်သူများခြင်းဖြစ်သည်ဟု ကြည့်မြင်တိုင်တစ်ဖက်ကမ်း ၀ါးရုံဆိပ်ကျေးရွာမှ သန္တိသုခဘုန်းတော်ကြီးသင်ပညာရေးကျောင်း၏ ကျောင်းအုပ်ဆရာတော် ဦးပညာသာမိက မိန့်ကြားသည်။
"စုံစမ်းတော့ မိဘတွေ အလုပ်သွားလုပ်နေတဲ့အချိန် ကျန်ခဲ့တဲ့သူ့အောက်က ကလေးအငယ်လေးတွေကို ထိန်းနေရတာတို့၊ မိသားစုစီးပွားရေးအတွက် ကျောင်းဖျက်ပြီး ဈေးဗန်းရွက်နေရတာတို့ ပြန်သိရတယ်။" ဟု ဆရာတော် ဦးပညာသာမိက မိန့်ကြားသည်။
မိသားစုစီးပွားရေးမပြေလည်မှု မိဘများ၏ပညာရေးအပေါ် အားပေးမှုလျော့နည်းခြင်းကြောင့် ကျောင်းသား ဦးရေများ လျော့နည်းလာပြီး ကျောင်းပျက်ရက်များ များပြားလာသောကြောင့် ကျောင်းဆက်မတက်ကြတော့ ကြောင်း သူငယ်တန်းပြဆရာမ ဒေါ်နှင်းမာထွေးက ဆိုသည်။
"သူငယ်တန်းမှာ အစကကျောင်းသား ၆၀ လောက်ရှိပြီး နောက်ပိုင်းအယောက် ၂၀ လောက်လျော့သွားတယ်။ စီးပွားရေးကြောင့်လည်းပါတယ်။ သူတို့ မိဘတွေကြောင့်လည်းပါတယ်။ ကလေးထိန်းရမယ်တို့ ဈေးရောင်းပေး ရမယ်တို့ အဲ့ဒါတွေကြောင့်ပါ။ ကျောင်းပျက်ရက်တွေများလာတော့ ကျောင်းလာမတက်ရဲကြတော့ဘူး။" ဟု ဆရာမ ဒေါ်နှင်းမာထွေးက ပြောသည်။
"သမီးကတော့ ကျောင်းဆက်တက်ချင်တယ်။ သမီးသူငယ်ချင်းတွေထဲမှာ ကျောင်းမနေနိုင်တဲ့ ကလေးတွေ ရှိတယ်။ အမေက အလုပ်မရှိဘူး အဖေက လယ်ထဲမှာဆိုတော့ ကျောင်းမတက်နိုင်ကြဘူး။" ဟု ၄ တန်းအောင် ကျောင်းသူ မနွယ်လေးက ပြောသည်။
အခြေခံပညာမူလတန်း မသင်မနေရပညာရေးစနစ်အား စမ်းသပ်ကာလအဖြစ် ပထမဆုံးပြုလုပ်ခဲ့ခြင်းဖြစ်ပြီး ကျောင်းအပ်နှံမည့်ကျောင်းသားများကို စာအုပ် ခဲတံအပြင် ကျပ်ငွေ ၁၀၀၀ ကိုပါ ထောက်ပံပေးသွားမည် ဖြစ်ကြောင်းသိရသည်။
ထို့အပြင် မူလတန်းအဆင့်အောင်မြင်ပြီး အလယ်တန်းကျောင်း ဆက်လက်တက်ရောက်နိုင်ရန်နှင့် အလယ်တန်းအဆင့်မှ ကျောင်းထွက်သွားသောကျောင်းသားများ
ကျောင်းဆက်တက်နိုင်ရေးအတွက်ပါ ကြိုးစားနေချိန်ဖြစ်သည်ဟု သိရသည်။.
"ဘာကြေးမှမကောက်ပဲ အခမဲ့သင်ပေးတဲ့ ဘ.က ကျောင်းကိုတောင် မှန်အောင် မတက်နိုင်ကြဘူး။ မိဘတွေကို ခေါ်ယူစည်းရုံးပြီးတော့ အသိပညာပေး ဟောပြောပွဲလေးတွေ လုပ်ဖို့လိုအပ်သလို နေ့စဉ်ပုံမှန်ထမင်းတစ်နပ် စားရဖို့ ရုန်းကန်ရှာနေရတဲ့ မိသားစုတွေရဲ့ စီပွားရေးပြေလည်ဖို့အတွက် ၀ိုင်းပြီးဖြေရှင်းဖို့လိုတယ်။" ဟု ဆရာတော် ဦးပညာသာမိက သုံးသပ်သည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။