မေလ ၁၅ ရက်နေ့က တောင်ကျချောင်းစီးဆင်းမှုကြောင့် ပိတ်ထားသော ဈေးဆိုင်ခန်းများကို တွေ့ရစဉ်
ပခုက္ကူနှင့် ပေါက်မြို့သို့သွားရာ ကားလမ်းတစ်လျောက်ရှိ ယောချောင်းနှင့် ကျောချောင်းတွင် တောင်ကျရေများ ကျဆင်းလာသည့်အတွက် မော်တော်ကားလိုင်းအချို့ ပြေးဆွဲခြင်းမရှိဘဲ ယာယီရပ်နားထားပြီး ပခုက္ကူမြို့တွင်လည်း ချောင်းရေကြီးမှု၊ မြေပြိုမှုများနှင့် ပတ်သက်ပြီး သတိပေးမှုများ ပြုလုပ်ခဲ့သည့်အတွက် ပခုက္ကူမြို့မဈေးနှင့် ပေါက်မြို့ဈေးတို့ရှိ ဈေးဆိုင်များ စောစီးစွာ ပိတ်သိမ်းသွားကြောင်း သတင်းရရှိသည်။
''ယောချောင်းရော ကျောချောင်းမှာပါ တောင်ကျရေ ကျနေတော့ ကားတွေက သိပ်မကူးရဲကြဘူး။ ကားကြီးတွေတောင် ရေအတက်ကျကြည့်ပြီး ကူးနေကြတယ်။ တချို့ခရီးသည်တင် ကားလိုင်းတွေကတော့ ပိတ်ထားကြတယ်။ လက်ရှိချောင်းရေ အနေအထားကလည်း ကားလေးသွားလို့ မရတော့ဘူး။ တောင်ပေါ်မိုး များရင်များသလို ချောင်းရေကကျတာဆိုတော့ သိပ်မကူးရဲကြဘူး'' ဟု ပေါက်မြို့နှင့် ပခုက္ကူမြို့သို့ မောင်းနှင်နေသော ယာဉ်မောင်း ကိုမောင်တာက ပြောကြားခဲ့သည်။
''မနေ့ညကတည်းက မိုးကရွာနေတော့ တောင်ကျရေလည်း များလာတယ်။ ခုလည်း မိုးက ဆက်ရွာနေတော့ ခရီးသွားလည်း သိပ်မရှိဘူး။ ရွာအတော်များများကလည်း ယောချောင်းကျောချောင်း ဘေးကဆိုတော့ ကိုယ့်ရွာတွေဘဲ ဂရုစိုက်နေရတယ်။ မြို့ထဲမှာလည်း မုန်တိုင်းနဲ့ပတ်သက်ပြီး သတိပေးချက်တွေ ထုပ်ပြန်ထားတော့ ဈေးဝယ်လည်း မရှိဘူး။ ဈေးဆိုင်တွေလည်း အစောကြီး ပိတ်သွားကြတယ်''ဟု ပေါက်မြို့ဒေသခံ ကိုရဲထွန်းဝင်းက ပြောကြားသည်။
''မုန်တိုင်းသတိပေးချက် ထုတ်ပြန်ထားတော့ တောသူတောင်သားက ဈေးဝယ်မလားဘူး။ အထူးသဖြင့် ယောချောင်း ကျောချောင်းဘက်က ရွာတွေက လုံးဝမလာဘူး။ တောင်ကျရေလည်း ကျနေတယ်ပြောတယ်။ မိုးကလည်း ရွာလိုက်တော့ ဈေးမှာလူအတော် ရှင်းသွားတယ်။ နေ့လယ်ပိုင်းကတည်းက ပိတ်ပြန်နေကြပြီ။ အုပ်ချုပ်ရေးပိုင်းကလည်း မြို့ပတ်ပြီး ချောင်းရေကြီးနိုင်ကြောင်း၊ မြေပြိုမှုတွေလည်း ဖြစ်နိုင်ကြောင်း ကြေညာထားတော့ ဈေးသည်တွေလည်း အစောကြီး ပြန်ကုန်ကြတာ'' ဟု ပခုက္ကူမြို့မဈေး အတွင်းရှိ ဈေးသည်တစ်ဦးက ဆိုသည်။
ပခုက္ကူမြို့တွင် ၂၀၁၁ ခုနှစ် အောက်တိုဘာလအတွင်း ဖြစ်ပေါ်ခဲ့သော ရွှေချောင်း ချောင်းရေကြီးမှုတွင် လူတစ်ရာကျော် ချောင်းရေနှင့်အတူ မျောပါသေဆုံးခဲ့ပြီး ပေါက်မြို့အရှေ့ဘက်တွင် စီးဆင်းနေသော ယောချောင်းအတွင်းတွင် ၂၀၁၂ ခုနှစ် စက်တင်ဘာ ၄ ရက်၌ ခရီးသည် ၄၁ ဦး တင်ဆောင်လာသော လှေမှာ တောင်ကျချောင်း ရေစီးဆင်းလာမှုကြောင့် တိမ်းမှောက်သွားပြီး ခရီးသည် ၁၃ ဦးချောင်းရေနှင့်အတူ မျောပါ သေဆုံးခဲ့ကြောင်း သိရသည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။