ရန်ကုန်တိုင်း၌ အန္တရာယ်ရှိမှုလွန်ကဲ အပူချိန်ရောက်၍ ဂရုပြုနေထိုင်သင့်

 

မြန်မာနိုင်ငံ တိုင်းဒေသကြီးနှင့်ပြည်နယ်များ၌ အပူချိန်မြင့်မားနေသော်လည်း ရန်ကုန်တိုင်းဒေသကြီးအတွင်းရှိ အပူချိန်မှာ အန္တရာယ်ရှိနိုင်မှု(Extreme Danger)အဆင့် အထိလွန်ကဲနေသည်ဟု မိုးလေ၀သပညာရှင် ဒေါက်တာ ထွန်းလွင်က ဆိုသည်။

 

"အရင်နှစ်တွေကလည်း ၅လပိုင်းလောက်ဆို ပူတာပဲလေ ဒါပေမဲ့ အခုနှစ်ကတော့အပူချိန်က တော်တော်ကို မြင့်လာတာတွေ့ရတယ်၊ ပိုဆိုးတာက ခရမ်းလွန်ရောင်ခြည်ကလည်း အဆင့်(၁၁)ကနေ  ဧပြီလကုန်ထိ အဆင့်(၁၃)အထိ မြင့်လာတော့ ပိုဆိုးတာပေါ့"ဟု ဒေါက်တာထွန်းလွင်က ပြောသည်။

 

အပူချိန် ၅၄ ဒီဂရီစင်တီဂရိတ်အထက်နှင့် ၁၃၀ ဒီဂရီ ဖာရင်ဟိုက်အထက်သက်ရောက်မူကို အန္တရာယ်ရှိမူ လွန်ကဲသည့်အဆင့်(Extreme Danger)အဖြစ် ကမ္ဘာ့ကျန်းမာရေးအဖွဲ့ WHOက သတ်မှတ်ထားကြောင်း သိ ရသည်။

ရန်ကုန်မြို့တွင် ကျရောက်နေသည့်အပူချိန်မှာ ၁၀၀ ဒီဂရီဖာရင်ဟိုက်အထက်၌ရှိကြောင်း မိုးလေ၀သပညာရှင် ဒေါက်တာထွန်းလွင်က ဆိုသည်။

 

ရန်ကုန်မြို့၏ အပူချိန်သည် ဧပြီလပိုင်းကုန်တွင် အန္တရာယ်ရှိမှုလွန်ကဲတဲ့အဆင့် (Extreme Danger) ရောက်နေ သောကြောင့် အသက်အရွယ်ကြီးရင့်သူများ၊ ကလေးသူငယ်များနှင့် ခံနိုင်ရည်မရှိသည့်သူများအနေဖြင့် Heat Stroke ရစေနိုင်ပြီး၊ လေဖြတ်ခြင်းနှင့် ဦးနှောက်သွေးကြောပြတ်ခြင်းတို့ကို ကြုံတွေ့နိုင်သည်ဟု ကျန်းမာရေး ပညာရှင်များက သုံးသပ်ပြောဆိုကြသည်။

 

"အပူချိန်မြင့်လာတာနဲ့အမျှ ခန္ဓာကိုယ်မှာ ရေဓာတ်ခမ်းခြောက်တာ၊ အားအင်းကုန်ခမ်းတာ၊ ချွေးထွက်များ တာတွေကြောင့် မူးဝေတာတို့၊ အစားအစာတွေ အထားမခံတာတွေကြုံလာမယ်။ အဲ့ဒါတွေစားမိမယ်ဆိုရင် ၀မ်းပျက်ဝမ်းလျောတာတို့ ဖြစ်လာနိုင်တယ်။ အခုလိုအပူချိန်မြင့်တော့ ဂရုတစိုက်နေ ထိုင်သင့်တယ်"ဟု အထွေထွေရောဂါကု ဒေါက်တာမြင့်ဦး (G.P) က သုံးသပ်ပြောဆိုသည်။

 

ယခုကဲ့သို့ နေအပူချိန်မြင့်မားနေချိန်တွင် အပြင်ထွက်ပါက မျက်လုံးအကာအကွယ် နေကာမျက်မှန်၊ ဦးခေါက် ထိခိုက်မှုမရှိစေရန် အကာအကွယ်ပေးနိုင်သော ဦးထုပ်၊ ထီး အသုံးပြုသင့်ကြောင်း၊ ခန္ဓာကိုယ်မှ ရေဓာတ်ခမ်း ခြောက်မှုအား ကာကွယ်နိုင်ရန် သစ်သီးဖျော်ရည်၊ ဓာတ်ဆားရည်များသောက်သုံးသင့်ပြီး ရေခဲရေသောက်သုံးမှု လျော့ချသင့်ကြောင်း ဆရာဝန်ကြီးများက အကြံပြု ပြောဆိုသည်။

 

"အပူချိန်က အရမ်းမြင့်နေတယ် ကြားတယ်။ အလုပ်သွားအလုပ်ပြန်ကို ထီးတို့၊ မျက်မှန်တို့ယူသွားရတယ်။ အပူဒဏ် အကာကွယ်အနေနဲ့ပေါ့။ အလုပ်ကပြန်လာပြီးဆိုရင်လည်း ရေခဲရေမသောက်ရဲဘူး။ တစ်ခုခုဖြစ်မှာ စိုးလို့"ဟု  ကြည်မြင်တိုင်မြို့နယ်နေ ကိုဇော်ဦးက ပြောသည်။

 

လက်ရှိဖြစ်ပေါ်နေသော ရန်ကုန်တိုင်းဒေသကြီးတွင်း အပူချိန်သည် ၂၀၁၀ ခုနှစ်က စံချိန်တင်မြင့်တက်ခဲ့သော အပူချိန်အောက်၌သာရှိပြီး ခရမ်းလွန်ရောင်ခြည် (UV) ကျရောက်မှုမှာ မြင့်တက်လျက်ရှိသည်ဟု မိုးလေ၀သနှင့် ဇလဗေဒညွှန်ကြားမှုဦးစီးဌာနက ဆိုသည်။