ဧရာဝတီတိုင်းဒေသကြီးအတွင်း အကြီးဆုံးစက်မှုဇုန် ဖြစ်လာမည့် ပုသိမ်ဆိပ်ကမ်းစက်မှုဇုန်စီမံကိန်း ဆောက်လုပ်ရတွင် ပါဝင်မည့် လယ်ယာမြေများအား တန်ဖိုးသတ်မှတ်ရာ၌ လယ်တစ်ဧကအတွက် ပေးမည့်နှုန်းထားများအား ဈေးနှုန်းသတ်မှတ်ပေးရန် လိုအပ်နေသည်ဟု သိရှိရသည်။
ပုသိမ်မြို့၏ တောင်ဘက်(၅)မိုင်ခန့်အကွာတွင် တည်ဆောက်ရန်ပြင်ဆင်နေသည့် ပုသိမ်ဆိပ်ကမ်း စက်မှုဇုန်စီမံကိန်းအကောင်အထည်ဖော်ရန် စီစဉ်နေရာမှ မြေတစ်ဧကဈေးနှုန်းကို တိကျစွာ သတ်မှတ် ပေးရန် အပါအ၀င် သက်ဆိုင်ရာကုမ္ပဏီမှ ပွင့်လင်းမြင်သာမှုရှိစွာ ဆောင်ရွက်ရန်လိုနေသည်ဟု ဒေသခံများမှ အကြံပြုပြောဆိုခြင်းဖြစ်သည်။
Ayeyarwaddy DevelopmentCo.,Ltdမှ တာဝန်ယူတည်ဆောက်သွားမည့် အဆိုပါ စီမံကိန်းတွင် ပုသိမ်မြို့ပေါ် အမှတ်(၈)နှင့်(၁၂)ရပ်ကွက်နှစ်ခုနှင့် ကန်ကြီးဒေါင့်မြို့နယ်အတွင်းရှိ ချောင်းစောက်၊ ရှမ်းရွာ၊ရှမ်းငူကျေးရွာအုပ်စုသုံးအုပ်စုမှ လယ်မြေဧက(၆၀၀၀)ခန့်တွင် တည်ဆောက်သွားမည်ဖြစ်ရာ လယ်မြေများကို ၀ယ်ယူရာ၌ မိမိတို့လုပ်ကိုင်စားသောက်နေသော လယ်မြေများကို ရောင်းချလိုသော လယ်သမားများ ရှိသကဲ့သို့ မည်သည့်ဈေးဖြင့် ဖြစ်စေ မရောင်းချလိုသည့် လယ်သမားများလည်း ရှိနေသည်ဟု ဒေသခံလယ်သမားများထံမှ သိရသည်။
ထိုကဲ့သို့ ဖြစ်ပေါ်နေသည့်အခြေအနေများကြောင့် ဧရာဝတီတိုင်းဒေသကြီး အစိုးရအဖွဲ့မှ ဒေသခံ လယ်သမား(၂၀၀)ခန့်နှင့် ကုမ္ပဏီမှတာဝန်ရှိသူများကို ပုသိမ်မြို့၊ ဧရာရွှေဝါခန်းမတွင် ဇူလိုင်လ (၂၆)ရက်နေ့က တွေ့ဆုံရှင်းလင်းပွဲတစ်ခုပြုလုပ်ခဲ့ပြီး ထိုရှင်းလင်းပွဲ၌ တိုင်းဒေသကြီးဝန်ကြီးချုပ်ကမှ ဒေသခံလယ်သမားများအား ယခုကဲ့သို့ ပြောကြားလိုက်ခြင်းဖြစ်သည်။
"ခင်ဗျားတို့တွေ သဘောမတူဘဲ ဘာမှမလုပ်ဘူး၊ အတင်းအဓမ္မလည်း မသိမ်းဘူး၊ ခင်ဗျားတို့က မပေးနိုင်ဘူး မရောင်းနိုင်ဘူးဆိုရင်လည်း မလုပ်ရုံပေါ့၊ ခင်ဗျားတို့ လုပ်နေတဲ့ လယ်ယာမြေတွေကို အတင်းရယူဖို့လည်း မဟုတ်ပါဘူး"ဟု ဧရာဝတီတိုင်းဒေသကြီးဝန်ကြီးချုပ်ဦးသိန်းအောင်က လယ်သမားများအား ရှင်းလင်းပြောကြားခဲ့ခြင်းဖြစ်သည်။
ဧရာဝတီတိုင်းအနေဖြင့် ရခိုင်ရိုးမနှင့်ဆက်စပ်နေသောကြောင့် တောင်ကုန်းတောင်တန်းများနှင့် လယ်သမားတို့ လုပ်ကိုင်နေသောလယ်မြေများသာ တိုင်းအတွင်းပါရှိသည့်အတွက် ဒေသဖွံ့ဖြိုးရန် စီမံကိန်းတစ်ခုလုပ်ပါက ဒေသခံလယ်သမားများအတွက် ကြိုတင်စဉ်းစားရကြောင်းနှင့် ဧရာဝတီ တိုင်းမှာမြန်မာနိုင်ငံတွင်စက်မှုလုပ်ငန်းများတွင် နောက်အကျဆုံးတိုင်း တစ်တိုင်းဖြစ်နေသဖြင့် နောင်လာနောင်သားတို့အတွက်မိမိတို့ ရရှိနေသော အကျိုးအမြတ်နှင့် ဒေသတွင်း ပြည်သူများ ရရှိမည့်အကျိုးအမြတ်ကို လယ်သမားများမှ စဉ်းစားချင့်ချိန်နိုင်ရန် မိမိအနေဖြင့်ယခုကဲ့သို့ ရှင်းလင်းပွဲပြုလုပ်ရခြင်းဖြစ်ကြောင်းကိုလည်း ၄င်းက ဆက်ပြောသည်။
အဆိုပါစီမံကိန်းဒေသ၌ ယခုအခါတစ်နှစ်လျှင် စပါးတင်းပေါင်းနှစ်သိန်းခွဲမှ သုံးသိန်းအထိ ထွက်ရှိ နေပြီး ကန်ကြီးဒေါင့်မြို့နယ် ရှမ်းငူနှင့် ချောင်းစောက်ကျေးရွာအုပ်စုမှ လယ်သမားအများစုမှာ မိမိတို့ လုပ်ကိုင်နေသော လယ်မြေများကို မရောင်းချနိုင်ကြောင်း ငြင်းဆိုထားပြီး အခြားရောင်းချ လိုသော ဒေသခံများကလည်း Ayeyarwaddy DevelopmentCo.,Ltdကုမ္ပဏီဘက်မှ တိကျသော ဈေးနှုန်း ထုတ်ဖော် ပြောကြားပေးရန် အလိုရှိနေခြင်းဖြစ်သည်။
"ဖွံ့ဖြိုးရေးလုပ်ငန်းလုပ်တဲ့နေရာမှာ သဘောတူတဲ့သူရှိသလို၊ သဘောမတူတဲ့လူလည်း ရှိပါတယ်၊ အဲ့ဒီတော့ စက်မှုဇုန်လုပ်မယ့် နေရာမှာ လယ်တစ်ဧကကို ဘယ်လောက် လောက်ပေးမယ်ဆိုတာကို ကျွန်တော်တို့ တောင်သူတွေက မသိခဲ့ရပါဘူး၊ ဘယ်လောက် သတ်မှတ်တယ်ဆိုတာကို မသိရတဲ့ အတွက်လယ်သမားတွေဘက်က ဘယ်လိုမှ ဆုံးဖြတ်လို့ မရသေးပါဘူး"ဟု ကန်ကြီးဒေါင့်မြို့နယ်၊ ချောင်းစောက်ကျေးရွာမှ လယ်သမားတစ်ဦးက ပြောသည်။
ယခုအခါလယ်သမားများအတွက် နိုင်ငံတော်မှစိုက်ပျိုးစရိတ်ချေးငွေများကို တစ်ဧကတစ်သိန်းနှုန်းဖြင့် လယ်သမားတစ်ဦးလျှင် ဆယ်ဧကနှုန်း ထုတ်ချေးခွင့်ရနေသဖြင့် အဆင်ပြေနေသဖြင့် ဆိပ်ကမ်းစက်မှု ဇုန် စီမံကိန်းလုပ်မည့်ကုမ္ပဏီအနေဖြင့် လုပ်ဆောင်မည့် စီမံကိန်းအဆင့်ဆင့်ကို ဒေသခံများကို ရှင်းပြ ရန် လိုအပ်ပြီး ဒေသခံများ၏ဘ၀ရှေ့ရေးအတွက် အာမခံချက် အပြည့်အ၀ပေးရမည် ဖြစ်ကြောင်း၊ စီမံကိန်း စတင်မည့်ရက်၊ စီမံကိန်း စတင်ပါက ဒေသခံများနှင့် ထိုက်တန်သည့်အလုပ်၊ ထိုက်တန်သော လစာပေးချေမှု၊ စီမံကိန်းပြီးပါက ဒေသခံများအား အလုပ်ခန့်ထားမှု၊ ရေနက်ဆိပ်ကမ်းကြောင့် နိုင်ငံ တော် ကုမ္ပဏီနှင့် ဒေသခံတို့၏ အကျိုးအမြတ်၊ စီမံကိန်းကြောင့် ဖြစ်ပေါ်လာမည့် ဆိုးကျိုးများကို ပွင့်လင်းမြင်သာစွာ တိတိကျကျထုတ်ပြန်ပေးရန် လိုလားနေခြင်းဖြစ်သည်။
အဆိုပါစီမံကိန်းသည် ပုသိမ်မြို့ အမှတ်(၈)ရပ်ကွက်ရှိ တန်(၁၀၀)ဒေသမှ တောင်ဘက် တလျောက် ကန်ကြီးဒေါင့်မြို့နယ် ရှမ်းငူကျေးရွာရှိ နတ်ကျွန်းဒေသအထိရှိနေပြီး အဆိုပါ နယ်မြေအတွင်း အိမ်ထောင်စုပေါင်း(၂၃၀၀)ကျော်၊ လူဦးရေ(၁၂၀၀၀)ကျော် နေထိုင်ပြီး အလုပ်လုပ်ကိုင်နိုင်သော လူဦးရေ(၈၃၀၀)ခန့်နေကြောင်း ထိုသူများအားလုံးကို အလုပ်အကိုင်ရရှိစေရန် စီမံကိန်း အဆောက် အဦးများ စတင်ဆောက်လုပ်သည့် စီမံကိန်း၌ပင် အလုပ်ရရှိစေလိုသဖြင့် သင်တန်းများ ကြိုတင် ဖွင့်လှစ် သင်ကြားကာ အလုပ်ခန့်သွားမည်ဖြစ်ကြောင်း စီမံကိန်းမန်နေဂျာကဆိုသည်။
"စီမံကိန်းနယ်မြေအတွင်းက အဆောက်အဦးတွေ၊ သာသနိကအဆောက်အအုံတွေ မထိခိုက်အောင် အတက်နိုင်ဆုံး လုပ်သွားမှာပါ၊ ဒီဒေသကလူတွေအပြင်၊ ပုသိမ်ကန်ကြီးဒေါင့် ဒေသတွေက လူဦးရေ(၅၉၀၀၀၀)အတွက်ပါ အလုပ်အကိုင်အခွင့်အလမ်းများ ရရှိအောင် ဦးတည်လုပ်ဆောင်သွားမဲ့ အစီအစဉ်တွေကို စီမံကိန်းထဲမှာ ထည့်သွင်းထားပါတယ်"ဟု ဧရာဝတီဖွံ့ဖြိုးရေးဆိပ်ကမ်းနှင့် စက်မှုဇုန် တည်ဆောက်ရေး စီမံကိန်းမန်နေဂျာ ဦးကိုကိုဇော်က ပြောသည်။
စီမံကိန်းပထမအဆင့်၌ လျှပ်စစ်ဓါတ်အားပေးစက်ရုံ၊ ရေသန့်စက်ရုံသားငါးစက်ရုံများ၊ အထည်ချုပ် စက်ရုံ၊ သစ်တောထွက်ပစ္စည်းစက်ရုံများနှင့် ဓါတ်မြေသြဇာပြင်ဆင်ထုတ်လုပ်သည့် စက်ရုံများ စသည့် စက်ရုံ(၅၀)ကျော်တည်ဆောက်သွားမည်ဖြစ်သည့်အတွက် စက်ရုံတစ်ရုံလျှင် လူတစ်ထောင်ခန့် အနည်းဆုံး အလုပ်ရရှိမည်ဖြစ်သဖြင့် ဒေသပေါက်ဈေးလစာများအတိုင်း အလုပ်အကိုင်များ ရရှိစေမည် ဖြစ်ကြောင်းနှင့် လယ်မြေများကိုလည်း ဒေသပေါက်ဈေးထက် ပိုမိုသည့် နှုန်းထားများနှင့် ၀ယ်ယူ သွားမည်ဖြစ်ကြောင်း ၄င်းကဆက်ပြောသည်။
ဧရာဝတီတိုင်းဒေသကြီးတွင် ပုသိမ်စက်မှုဇုန်၊ ဟင်္သာတစက်မှုဇုန်နှင့် မြောင်းမြစက်မှုဇုန် စသည့် ဧကတစ်ရာကျော်ခန့်တွင်သာ တည်ဆောက်ထားသော စက်မှုဇုန်အသေးစားသုံးခုသာ ရှိနေပြီး တိုင်းရင်းသား စီးပွားရေးလုပ်ငန်းရှင်များအနေဖြင့် ဧရာဝတီတိုင်းတွင် ယခုကဲ့သို့ ရင်နှီးမြုပ်နှံမှုများ လုပ်ဆောင်ရန် မစဉ်းစားကြောင်း၊ Ayeyarwaddy DevelopmentCo.,Ltd ဧရာဝတီ တိုင်းသား လုပ်ငန်းရှင်များဖြင့် ဖွဲ့စည်းထားသောကြောင့်သာ ယခုကဲ့သို့အကြီးစားရင်းနှီးမြုပ်နှံခြင်း ဖြစ်သည်ဟု ဧရာဝတီတိုင်းဒေသကြီးအစိုးရအဖွဲ့မှ ထုတ်ဖော်ပြောကြားထားသည်။
No comments:
Post a Comment
စာဖတ်သူများကွန်မန်.ပေးနိုင်ပါသည်။