2013-01-26
ကချင်ပြည်နယ်အတွင်း အစိုးရနဲ့ KIO တပ်တွေကြား ဖြစ်ပွားနေတဲ့ တိုက်ပွဲတွေကြောင့် ဗန်းမော်နဲ့ မြစ်ကြီးနား ကိုသွားတဲ့ ကားလမ်းကြောင်းတွေ ပြတ်တောက်နေတာ ကြာပြီဖြစ်တဲ့ အတွက် ဒေသခံတွေ အနေနဲ့ ရေကြောင်းကနေ တရားဝင်သွားလာခွင့် ရဖို့ ရေကြောင်း ဦးစီးဌာန အပြင် ဒေသဆိုင်ရာ အာဏာပိုင်တွေကို တင်ပြထားတယ်လို့ သိရပါတယ်။
နှစ်ဖက်တိုက်ပွဲတွေကြောင့် မြစ်ကြီးနားနဲ့ ဗန်းမော်ကို ကူးသန်းသွားလာနေတဲ့ကားလမ်းတွေ ပိတ်နေတာ အခုဆိုရင် တနှစ်ခွဲကျော်နေပြီ ဆိုတဲ့အကြောင်းကို ဒေသခံ တစ်ယောက်က RFA ကိုအခုလို ပြောပါတယ်။
"ကုန်းလမ်းတွေအားလုံးက ပိတ်ထားတယ်။ မြစ်ကြီးနားနဲ့ ဗန်းမော်ကားလမ်းလဲ နမ့်ဆန်ယန်ဘက်က သွားတဲ့လမ်းဆိုလဲ ပိတ်ထားတယ်။ ကသာဘက်ကပတ်မယ်ဆိုလဲ ရထားလမ်းက မိုင်း တဂျိန်းဂျိန်းနဲ့ လမ်းတွေဘာတွေ တံတားတွေဘာတွေ ချိုးဆိုတာနဲ့ ဆိုတော့ အခုနမ့်ဆန်ယန်ရဲ့ ဒီဘက် မလိချောင်းတံတားတွေကအစ ကူးတဲ့တံတားတွေက အကုန်လုံး ကားတွေက သွားလို့မရတော့ဘူး"
ဗန်းမော်နဲ့ မြစ်ကြီးနားဟာ ရေလမ်းခရီး မိုင် ၁၂၀ လောက်ရှိပြီး ယခုအခါ တစ်ရက်ကို လှေအသေး တစီးသာ သွားလို့ရနေတာကြောင့် ဒေသခံတွေအနေနဲ့ တစ်မြို့နဲ့တစ်မြို့ကြား ကူးသန်းသွားလာရာမှာ အဆင်မပြေမှုတွေရှိနေတဲ့အပြင်၊ ဖားကန့်ကျောက်စိမ်းတွင်းဒေသကို သွားတဲ့ကားလမ်းတွေလဲ တိုက်ပွဲတွေကြောင့် ဖွင့်လိုက်ပိတ်လိုက်နဲ့ အခုအချိန်အထိ တသမတ်တည်း သွားလာလို့ မရသေးဘူးလို့ သိရပါတယ်။
ဧရာဝတီမြစ်ကို အသုံးပြုနေတဲ့ ရေကြောင်းလမ်းကို မနှစ်က ဇူလိုင်လမှာ ဗန်းမော်မြို့မှာ စက်လှေတိမ်းမှောက်မှုကြောင့် ခရီးသည် အများအပြား သေဆုံးသွားပြီးတဲ့နောက်မှာ ပိတ်လိုက်တာ ယခုအချိန်အထိ ဖြစ်ပါတယ်။
No comments:
Post a Comment
စာဖတ်သူများကွန်မန်.ပေးနိုင်ပါသည်။